ગીર સોમનાથ જિલ્લાના ઘાટવડ ગામમાં દીપડાના આતંકની ચોંકાવનારી ઘટના સામે આવી છે. ઘાટવડ રેલવે ફાટક નજીક આવેલા એક વાડી વિસ્તારમાં 8 વર્ષના માસૂમ બાળક પર દીપડાએ અચાનક લોહિયાળ હુમલો કરી દેતાં સમગ્ર પંથકમાં ભય અને દહેશતનો માહોલ ફેલાઈ ગયો છે. ગીર સોમનાથના સીમ અને વાડી વિસ્તારોમાં અવારનવાર વન્યજીવોની અવરજવર રહેતી હોય છે, પરંતુ આ પ્રકારે રહિવાસી વિસ્તાર નજીક બાળક પર હુમલો થતાં ગ્રામજનોમાં ભારે અસંતોષ જોવા મળી રહ્યો છે.

શેરડીના વાડમાંથી ત્રાટક્યો દીપડો

ઘટનાની મળતી વિગતો અનુસાર, માતા પોતાના 2 બાળકો સાથે વાડી વિસ્તારમાં કામ કરી રહી હતી ત્યારે 8 વર્ષનો બાળક નજીકમાં રમી રહ્યો હતો. આ દરમિયાન શેરડીના ઘાટા વાડમાં છુપાઈને બેઠેલા દીપડાએ અચાનક બહાર આવીને બાળક પર ત્રાટકીને હુમલો કરી દીધો હતો. દીપડાના હુમલાથી ભયભીત થયેલા બાળકે જોરજોરથી બૂમાબૂમ કરી મૂકી હતી અને સાથે જ તેની માતા પણ દોડી આવી હતી. બૂમાબૂમ અને અવાજ થતાં જ દીપડો બાળકને છોડીને ઝાડીઓમાં ભાગી છૂટ્યો હતો, જેના કારણે બાળકનો જીવ ચમત્કારિક રીતે બચી ગયો હતો.

ઇજાગ્રસ્ત બાળકને હોસ્પિટલ ખસેડાયો

દીપડાના તીક્ષ્ણ પંજા વાગવાને કારણે 8 વર્ષનો બાળક લોહીલુહાણ થઈ ગયો હતો. ઘટના બાદ તુરંત જ પરિજનો અને સ્થાનિકો દ્વારા ઇજાગ્રસ્ત બાળકને સારવાર અર્થે નજીકની હોસ્પિટલમાં ખસેડવામાં આવ્યો છે, જ્યાં તેની સારવાર ચાલી રહી છે. આ બનાવની જાણ વનવિભાગને કરવામાં આવતાં વનકર્મીઓની ટીમ ઘટનાસ્થળે પહોંચી હતી. સ્થાનિક ગ્રામજનોએ માનવવસતિ અને વાડી વિસ્તારોમાં ભમતા આ હિંસક દીપડાને તાત્કાલિક પકડવા માટે પાંજરું ગોઠવવાની આકરી માંગ કરી છે.

આ પણ વાંચો : Ahmedabadના નારોલના યુવકનું ખેડામાં શંકાસ્પદ મોત, નવાગામ-નાયકા રોડ પર કારમાંથી મળ્યો અમિત શર્માનો મૃતદેહ