અમદાવાદ શહેરના જશોદાનગર વિસ્તારમાં આવેલ શિવાનંદ બંગ્લોઝમાં એક અત્યંત દુઃખદ ઘટના સામે આવી છે, જ્યાં 26 વર્ષીય પરિણીતાએ પતિના માનસિક અને શારીરિક ત્રાસથી કંટાળીને ગળેફાંસો ખાઈ જીવન ટૂંકાવી લીધું છે. મૃતકના પિતાએ નોંધાવેલી ફરિયાદ અનુસાર પતિ હાર્દિક બોડાણા લંડનથી પરત આવ્યા બાદ તેને ઓનલાઇન સટ્ટો રમવાની ઘાતક લત લાગી હતી. સટ્ટામાં મોટી રકમો હારી ગયા બાદ તે અવારનવાર પત્ની પાસે પિયરમાંથી પૈસા લાવવા માટે દબાણ કરતો હતો અને દહેજ બાબતે મેણાં-ટોણાં મારી ત્રાસ આપતો હતો.
પત્ની સાથે મારઝૂડ કરી ઘરની બહાર સૂવા મજબૂર કરી
નરાધમ પતિ પોતાની પત્ની જે કમાતી હતી તેનો આખો પગાર પણ બળજબરીથી પડાવી લેતો હતો. એટલું જ નહીં, પિયરમાંથી વધુ પૈસા ન લાવવા બદલ તે પત્ની સાથે અવારનવાર ક્રૂરતાપૂર્વક મારઝૂડ કરતો હતો અને તેને ઘરમાંથી કાઢી મૂકી રાત્રે ઘરની બહાર સૂવા મજબૂર કરતો હતો. આ સતત થઈ રહેલા અસહ્ય શારીરિક અને માનસિક ત્રાસથી કંટાળીને આખરે પરિણીતાએ ૧૫ ઓક્ટોબરના રોજ પોતાના બેડરૂમમાં પંખા સાથે ગળેફાંસો ખાઈને આપઘાત કરી લીધો હતો.
પિતાની ફરિયાદના આધારે પોલીસે તપાસ શરૂ કરી
પરિણીતાના કરુણ મોત બાદ મૃતકના પિતાએ જશોદાનગર ખાતે બનેલી આ ઘટના અંગે પોલીસનો સંપર્ક કર્યો હતો. પિતાની ફરિયાદના આધારે વટવા GIDC પોલીસ સ્ટેશને આરોપી પતિ હાર્દિક બોડાણા સામે આપઘાતની દુષ્પ્રેરણા અને દહેજ ઉત્પીડન સહિતની ગંભીર કલમો હેઠળ ગુનો દાખલ કર્યો છે. પોલીસે મૃતદેહનું પીએમ કરાવી આગળની કાયદેસરની કાર્યવાહી હાથ ધરી છે અને આરોપી પતિની અટકાયત કરવા માટે ચક્રો ગતિમાન કર્યા છે.