મુંબઈના જુહુ વિસ્તારમાં રવિવારે સાંજે બોલિવૂડ અભિનેતા જેકી શ્રોફના પુત્ર ટાઇગર શ્રોફ પર ત્રણ અજાણ્યા હુમલાખોરો દ્વારા જીવલેણ હુમલો કરવામાં આવ્યો હતો. આ ભીષણ ગોળીબારની ઘટનામાં અભિનેતા ટાઇગર શ્રોફ ચમત્કારિક રીતે આબાદ બચી ગયા હતા.પરંતુ તેમની કાર ચલાવી રહેલા ડ્રાઇવરને ગોળી વાગતાં તેઓ ઘાયલ થયા હતા. ઇજાગ્રસ્ત ડ્રાઇવરને સારવાર માટે નાણાવટી હોસ્પિટલ ખસેડાયા છે.મુંબઈના જુહુ ખાતે આ ગોળીબારની ઘટના બની તે સમયે ઘટનાસ્થળે સલમા શેખ નામની એક મહિલા વ્લોગર હાજર હતી.તે સમયે સલમા શેખ સોશિયલ મીડિયા પર લાઇવ વીડિયો બનાવી રહી હતી અને તેના કેમેરામાં આ આખી ઘટના કેદ થઈ ગઈ હતી. 

બાપ રે આ તો ખૂબ જ ખોટું થઈ ગયું

વીડિયોમાં સ્પષ્ટ જોઈ શકાય છે કે સલમા શેખ અભિનેતા ટાઇગર શ્રોફને જોતાં જ તેમની સાથે વાતચીત કરવાની ઇચ્છા વ્યક્ત કરે છે.તે દરમિયાન લોકોનું ટોળું ટાઇગર શ્રોફની કારને ચારેય તરફથી ઘેરીને તેમના ફોટા પાડી રહ્યું હતું.આ ભીડ વચ્ચે અચાનક જ સતત અનેક રાઉન્ડ ગોળીબારનો અવાજ સંભળાય છે.આ અફરાતફરી વચ્ચે ભીડમાંથી જ કોઈ વ્યક્તિ મોટેથી બૂમ પાડીને કહે છે કે ટાઇગર શ્રોફ પર હુમલો થઈ ગયો છે.આ અવાજ સાંભળીને વ્લોગર સલમા શેખ પોતાના લાઇવ વીડિયોમાં અત્યંત ગભરાટ સાથે કહેતી સંભળાય છે કે આ હુમલો કેવી રીતે થઈ ગયો? ટાઇગર બેટા પર ગોળી ચલાવી દીધી ગોળી મારીને તે લોકો ભાગી ગયા છે. તેણે કહ્યું કે જલ્દી આમને પટ્ટી બાંધો, બાપ રે આ તો ખૂબ જ ખોટું થઈ ગયું. 

શૂટર ટાઇગર શ્રોફની કાર પર ફાયર કરતો દેખાય છે

સલમા શેખે બાદમાં જણાવ્યું હતું કે હુમલો કરનારા શખ્સો ગોળીબાર કરીને તાત્કાલિક ભાગી ગયા હતા. આ બધું એટલી ઝડપથી અને અચાનક થઈ ગયું કે કોઈને કંઈ સમજાયું જ નહીં કે ક્યારે અને કેવી રીતે શું બની ગયું.જ્યાં સુધી સ્થળ પર હાજર લોકો સમગ્ર બાબતને સમજી શકે ત્યાં સુધીમાં તો હુમલાખોરો દ્વારા અંધાધૂંધ ગોળીઓ ચલાવી દેવામાં આવી હતી.રવિવારે સાંજે બનેલી આ સનસનાટીભરી ઘટનાની વિગતો અનુસાર એક બાઇક પર સવાર થઈને ત્રણ હુમલાખોરો આવ્યા હતા.આ ત્રણેય હુમલાખોરોમાંથી બે શખ્સો કાર તરફ આગળ વધીને ગોળીબાર કરે છે, જ્યારે એક શખ્સ બાઇક ચાલુ રાખીને તેના પર જ બેસી રહે છે.અચાનક એક શૂટર ટાઇગર શ્રોફની કાર પર મલ્ટિપલ રાઉન્ડ ફાયર કરતો જોવા મળે છે. તેની સાથે રહેલો બીજો શૂટર પણ ફાયરિંગ કરવાનો પ્રયાસ કરે છે પરંતુ કદાચ તેની બંદૂકમાંથી ગોળી ચાલી શકી ન હતી. 

ટાઇગર શ્રોફના ડ્રાઇવરને ગોળી વાગી

આ હુમલાખોરોએ કાર પર કરેલા આડેધડ ફાયરિંગમાં ટાઇગર શ્રોફના ડ્રાઇવરને ગોળી વાગી હતી.આ ગોળીબાર બાદ ત્રણેય હુમલાખોરો તે જ બાઇક પર બેસીને ઘટનાસ્થળેથી ઝડપથી ફરાર થઈ જતા દેખાય છે.ગોળી વાગવાથી ઘાયલ થયેલા ડ્રાઇવરને તાત્કાલિક સારવાર માટે નાણાવટી હોસ્પિટલ લઈ જવામાં આવ્યા છે. આ ઘાતક હુમલા બાદ કુખ્યાત લોરેન્સ બિશ્નોઇ ગેંગ દ્વારા આ હુમલાની સંપૂર્ણ જવાબદારી સ્વીકારવામાં આવી છે.આ ગોળીબારની ઘટના બાદ સોશિયલ મીડિયા પર એક પોસ્ટ ખૂબ જ ઝડપથી વાયરલ થઈ રહી છે,જેમાં લોરેન્સ ગેંગના અનિલ પંડિત નામના વ્યક્તિએ આ ફાયરિંગની જવાબદારી લીધી છે.વાયરલ થયેલી આ પોસ્ટમાં અનિલ પંડિત દ્વારા સ્પષ્ટ ચેતવણી આપવામાં આવી છે કે સલમાન ખાન સાથે કામ કરનારા તમામ લોકોનું આવું જ પરિણામ આવશે અને તેમનો પણ આવો જ અંજામ થશે.

આ પણ વાંચોઃ Tiger Shroff Firing Case: ટાઈગર શ્રોફ ફાયરિંગ કેસમાં એક્શન! એકની ધરપકડ