અમરેલી જિલ્લા ખોડલધામ સમિતિ દ્વારા નવરાત્રી મહોત્સવનું આયોજન કરાયું હતું. આ મહોત્સવમાં મોટી સંખ્યામાં લોકો ઉમટી પડ્યા. ગરબાના મેદાનમાં ભક્તિ અને ઉત્સાહનો માહોલ છવાઈ ગયો હતો. ખેલૈયાઓ માતાજીની આરાધના સાથે ગરબાના તાલે ઝૂમ્યા, જેમાં ગુજરાતી સંસ્કૃતિની ઝલક જોવા મળી. મહોત્સવમાં દીકરીઓ, બહેનો, યુવાનો અને વડીલો સહિત અનેક લોકો જોડાયા. પરંપરાગત ગરબા અને સંગીતના તાલથી વાતાવરણ ઉત્સવમય બન્યું હતું. નવરાત્રીના અંતિમ દિવસોમાં ભીડ વધુ જોવા મળી. અમરેલી જિલ્લા ખોડલધામ સમિતિના પ્રમુખ રમેશભાઈ કઠોરિયાએ માહિતી આપી. તેમણે જણાવ્યું કે મહોત્સવ ખોડલધામ કાગવડ અને ગુજરાત સરકારની ગાઈડલાઈન મુજબ યોજાયો છે. ગ્રાઉન્ડની પરમિશન, ફાયર સેફ્ટી અને ઇન્સ્યોરન્સ જેવી જરૂરી મંજૂરીઓ લેવાઈ હતી. અમરેલી શહેર, તાલુકા અને ગામડાઓમાં પણ શેરી ગરબા અને નવરાત્રી મહોત્સવની ઉજવણી થઈ રહી છે. ઘણા વિસ્તારોમાં મોડી રાત સુધી માં અંબાની આરાધના અને ભક્તિ કરવામાં આવી રહી છે.