ઇઝરાઇલથી ઑસ્ટ્રિયા જઈ રહેલી ઑસ્ટ્રિયન એરલાઇન્સની ફ્લાઇટને બોમ્બની ધમકી મળ્યા બાદ બલ્ગેરિયામાં ઇમરજન્સી લેન્ડિંગ કરવામાં આવ્યું. એરબસ A320 રવિવારે રાત્રે તેલ અવિવથી વિયેના જઈ રહ્યું હતું. ખતરાની સૂચના મળ્યા બાદ બલ્ગેરિયાની વાયુસેનાએ વિમાનને એસ્કોર્ટ કરવા માટે MiG-29 ફાઈટર પ્લેન મોકલ્યું. વિમાનમાં 51 મુસાફરો અને 6 ક્રૂ સભ્યો સવાર હતા. તમામને સુરક્ષિત બહાર કાઢવામાં આવ્યા. કોઈને ઇજા થઈ હોવાના અહેવાલ નથી. ફ્લાઇટ ત્રણ કલાક બાદ બલ્ગેરિયામાં લેન્ડ થઈ ફ્લાઇટ ટ્રેકિંગ ડેટા મુજબ, ઑસ્ટ્રિયન એરલાઇન્સની ફ્લાઇટ રવિવારે સાંજે તેલ અવિવના બેન ગુરિયન એરપોર્ટ પરથી રવાના થઈ હતી. જ્યારે વિમાન રોમાનિયા ઉપર હતું ત્યારે તેને બલ્ગેરિયાની રાજધાની સોફિયા તરફ વાળવામાં આવ્યું. લગભગ ત્રણ કલાક બાદ તે સોફિયાના વાસિલ લેવ્સ્કી એરપોર્ટ પર ઉતર્યું. બલ્ગેરિયાના પરિવહન મંત્રાલય અનુસાર, એલર્ટ મળ્યાના આશરે 30 મિનિટ બાદ વિમાનની સુરક્ષા તપાસ શરૂ કરવામાં આવી. બલ્ગેરિયન અને ઇઝરાયલી મીડિયાએ જણાવ્યું કે વિમાનને બોમ્બથી ઉડાવી દેવાની ધમકી આપવામાં આવી હતી. ઑસ્ટ્રિયન એરલાઇન્સે પણ ખતરાની પુષ્ટિ કરી છે, પરંતુ વધુ માહિતી આપી નથી. 6 દિવસ પહેલાં પણ ઇઝરાઇલ જઈ રહેલી ફ્લાઇટને બોમ્બની ધમકી મળી હતી અમેરિકાના ન્યૂયોર્કથી તેલ અવીવ પહોંચેલી ડેલ્ટા એરલાઇન્સની ફ્લાઇટને પણ 13 ઓક્ટોબરે બોમ્બની ધમકી મળી હતી. વિમાન ખાલી કરાવીને તેની તપાસ કરવામાં આવી, પરંતુ કોઈ વિસ્ફોટક મળ્યું નહોતું. તેના એક દિવસ પહેલાં ઇન્ડોનેશિયાઈ પાઇલટના કારણે ઇઝરાઇલે ઇથિયોપિયન એરલાઇન્સના કાર્ગો વિમાનને ઉતરવાની મંજૂરી આપી નહોતી. પાઇલટ બદલ્યા બાદ વિમાનને મંજૂરી મળી હતી. ખરેખરમાં, સપ્ટેમ્બરમાં ફ્લાઈદુબઈની ફ્લાઇટમાં બનેલી દુર્ઘટના બાદ ઇઝરાઇલે સુરક્ષા નિયમો કડક કરીને 11 દેશોના પાઇલટો અને ક્રૂ પર પ્રતિબંધ મૂકી દીધો છે. આ દેશોમાં અફઘાનિસ્તાન, અલ્જીરિયા, ઇન્ડોનેશિયા, ઈરાન, ઈરાક, કુવૈત, નાઇજર, કતાર, સાઉદી અરેબિયા, સોમાલિયા અને વેનેઝુએલાનો સમાવેશ થાય છે. આ દેશોના ઇઝરાઇલ સાથે રાજદ્વારી સંબંધો નથી. ગયા મહિને ફ્લાયદુબઈની ફ્લાઈટ હાઈજેક થઈ હતી 30 સપ્ટેમ્બરે દુબઈથી તેલ અવીવ જઈ રહેલી ફ્લાયદુબઈની ફ્લાઈટમાં ઓમાનના પાઈલોટે વિમાનને હાઈજેક કરી લીધું હતું. તેણે બીજા પાઈલટ પર છરીથી હુમલો કર્યો હતો. અહેવાલો મુજબ, હુમલાખોર વિમાનને ઈઝરાઇલના બેન ગુરિયન એરપોર્ટ પર તોડી પાડવાનો પ્રયાસ કરી રહ્યો હતો. જોકે, ઘણા મુસાફરોએ વચ્ચે આવીને તેને રોકી લીધો અને ફાઈટર જેટ્સની દેખરેખ હેઠળ વિમાનનું સાઉદી અરેબિયાના તાબુક એરપોર્ટ પર ઈમરજન્સી લેન્ડિંગ કરાવવામાં આવ્યું. ઇઝરાયલી ન્યૂઝ ચેનલ 12 અનુસાર, ફ્લાયદુબઈ પર થયેલા હુમલાના બીજા દિવસે ઇઝરાયલના પરિવહન મંત્રાલયે એરલાઇન્સને પત્ર મોકલ્યો હતો. તેમાં કહેવામાં આવ્યું હતું કે દુશ્મન દેશોના નાગરિકોને ઇઝરાયલ જતી ફ્લાઇટ્સમાં પાઇલટ, ક્રૂ મેમ્બર અથવા મુસાફર તરીકે મુસાફરી કરવાની મંજૂરી ન આપવામાં આવે.