સુરત પોલીસ બેડામાં ભારે ખળભળાટ મચાવતી ઘટનામાં નવસારીમાંથી દારૂના જથ્થા સાથે સુરતના ચાર પોલીસકર્મીઓ ઝડપાઈ ગયા હતા. આ મામલે પોલીસે ચાર પોલીસ કર્મચારીઓ અને એક ખાનગી વ્યક્તિ મળી કુલ પાંચેય આરોપીઓ વિરૂદ્ધ કાયદેસરનો ગુનો દાખલ કર્યો છે. ઘટનાની ગંભીરતાને ધ્યાને રાખીને પોલીસે તમામ આરોપીઓને કોર્ટમાં રજૂ કરીને એક દિવસના રિમાન્ડ મેળવ્યા છે. તપાસ અધિકારીઓ એ દિશામાં ઊંડાણપૂર્વક તપાસ કરી રહ્યા છે કે આરોપી પોલીસકર્મીઓ પોતાની ચાલુ ફરજ દરમિયાન કાયદો નેવે મૂકીને દમણ ગયા હતા કે કેમ.
રિમાન્ડ પૂર્ણ થતાં તમામ આરોપીઓને પુનઃ કોર્ટમાં રજૂ કરાશે
ઝડપાયેલા તમામ પાંચેય આરોપીઓના એક દિવસના રિમાન્ડ મંજૂર કરવામાં આવ્યા હોવાથી, રિમાન્ડની મુદત પૂર્ણ થતાં જ પોલીસ તેમને ફરીથી કોર્ટ સમક્ષ રજૂ કરશે. રિમાન્ડ દરમિયાન પૂછપરછ કરીને દારૂ ક્યાંથી લાવવામાં આવ્યો હતો અને તેનો શું ઉપયોગ થવાનો હતો તે અંગેના મહત્ત્વના પુરાવા એકત્ર કરવામાં આવી રહ્યા છે. ખાખી યુનિફોર્મને દાગ લગાડનારી આ ઘટનાને પગલે ઉચ્ચ પોલીસ અધિકારીઓ દ્વારા પણ સમગ્ર મામલે આકરી તપાસના આદેશો આપવામાં આવ્યા છે.
અગાઉ પણ દારૂની હેરાફેરીમાં સંડોવણી હતી કે નહીં તેની ગહન તપાસ
પોલીસ તપાસનો મુખ્ય ગાળિયો એ વાત પર પણ કસાયો છે કે આરોપી પોલીસકર્મીઓ અગાઉ પણ દારૂની ગેરકાયદેસર હેરાફેરી કે બૂટલેગિંગના નેટવર્કમાં સંડોવાયેલા હતા કે નહીં. નવસારી પોલીસે આરોપીઓના મોબાઈલ કોલ ડિટેલ્સ અને લોકેશનના આધારે વધુ તપાસ હાથ ધરી છે. જો અગાઉની સંડોવણી સામે આવશે તો આરોપીઓ સામે વધુ કડક કાયદાકીય અને ખાતાકીય પગલાં ભરવામાં આવશે, જેનાથી પોલીસ બેડામાં ભ્રષ્ટ કર્મચારીઓમાં ભારે ફફડાટ વ્યાપી ગયો છે.