તહેવારો નજીક આવતાં જ ફરસાણ અને મીઠાઈની દુકાનોમાં ખરીદીનો માહોલ જામવા લાગ્યો છે. બીજી તરફ, બજારમાં વેચાતી ખાદ્ય ચીજવસ્તુઓની ગુણવત્તા અંગે કોઈ બાંધછોડ ન થાય તે માટે ફૂડ સેફ્ટી વિભાગે પણ તપાસ તેજ કરી છે. ભુજ, અંજાર અને મુંદ્રામાં હાથ ધરાયેલી તપાસ દરમિયાન ફાફડા, જલેબી, ગાંઠિયા સહિતની વિવિધ ખાદ્ય ચીજવસ્તુઓના આશરે 60 નમૂના લેવામાં આવ્યા છે. હવે લેબોરેટરીના અહેવાલ પર નજર રહેશે, જેના આધારે આગળની કાર્યવાહી નક્કી થશે. તહેવારોમાં પરંપરાગત મીઠાઈઓ અને ફરસાણની માંગ વધતી હોવાથી ખાદ્ય પદાર્થોના ઉત્પાદન અને વેચાણ પર દેખરેખ રાખવી જરૂરી બને છે. આ બાબતને ધ્યાનમાં રાખીને ફૂડ એન્ડ ડ્રગ્સ કંટ્રોલ એડમિનિસ્ટ્રેશન (FDCA), ભુજ-કચ્છની ટીમે ત્રણેય તાલુકાના વિવિધ વિસ્તારોમાં આવેલી ખાદ્ય ચીજવસ્તુઓની દુકાનોમાં તપાસ કરી હતી. ફૂડ સેફ્ટી ઓફિસર એસ.બી. પટેલ અને એમ.એમ. પટેલની આગેવાની હેઠળ હાથ ધરાયેલી આ કામગીરીમાં વિવિધ ખાદ્ય પદાર્થોના નમૂના એકત્રિત કરવામાં આવ્યા હતા. તપાસ દરમિયાન ફાફડા, જલેબી, ગાંઠિયા, બુંદી, સેવ, ભાવનગરી ગાંઠિયા અને લાડુ જેવી લોકપ્રિય વાનગીઓના નમૂનાઓનો સમાવેશ થાય છે. આ નમૂનાઓને ગુણવત્તા અને ખાદ્ય સુરક્ષાનાં ધોરણોની ચકાસણી માટે પ્રયોગશાળામાં મોકલવામાં આવ્યા છે. અહેવાલ આવ્યા બાદ જ કોઈ ખાદ્ય પદાર્થની ગુણવત્તા અંગે સ્પષ્ટ સ્થિતિ સામે આવશે. હાલ તપાસમાં લેવાયેલા નમૂનાઓમાંથી કોઈ નમૂનો નિષ્ફળ ગયો હોવાની પુષ્ટિ થઈ નથી. દરમિયાન, વિભાગે વેપારીઓ સાથે બેઠકો યોજીને દુકાનોમાં સ્વચ્છતા જાળવવા, યોગ્ય ગુણવત્તાવાળા કાચા માલનો ઉપયોગ કરવા અને ખાદ્ય પદાર્થોની સુરક્ષા અંગે જરૂરી કાળજી રાખવા સૂચના આપી છે. તહેવારો દરમિયાન વધતા વેચાણ વચ્ચે સ્વચ્છતા અને ગુણવત્તા જાળવવાનો મુદ્દો પણ તપાસના કેન્દ્રમાં રહ્યો છે. વિભાગ દ્વારા આગામી દિવસોમાં પણ આવી તપાસ ચાલુ રાખવાની વાત સામે આવી છે. હવે લેબોરેટરીના પરિણામો બાદ કઈ દુકાન કે ખાદ્ય પદાર્થ અંગે કાર્યવાહી કરવાની જરૂર ઊભી થાય છે તે જોવાનું રહેશે. તહેવારોની ખરીદી વચ્ચે ગ્રાહકો માટે પણ ખાદ્ય પદાર્થોની ગુણવત્તા, સ્વચ્છતા અને વિશ્વસનીયતા મહત્ત્વના મુદ્દા બન્યા છે.