સુરેન્દ્રનગરમાં રૂ.6.10 કરોડના ખર્ચે આકાર લઈ રહેલા પ્રથમ 60 ફૂટના આઇકોનિક રોડનું નિર્માણ કાર્ય છેલ્લા 2 વર્ષથી લટકી પડતાં શહેરીજનોમાં ભારે રોષ વ્યાપી ગયો છે. મહાનગરપાલિકા દ્વારા રૂ.3.60 કરોડના મૂળ વિજયી પ્લાનને ડેવલપ કરીને રૂ.6.10 કરોડ મંજૂર કરવામાં આવ્યા હતા અને જે રોડનું કામ માત્ર 3 મહિનાની સમયમર્યાદામાં પૂર્ણ કરવાનું હતું, તે કામ 2 વર્ષથી ખોદીને મૂકી દેવામાં આવ્યું છે. આ વિસ્તારમાં 2 પૂર્વ ધારાસભ્યો વસવાટ કરતા હોવા છતાં તંત્ર દ્વારા કોઈ કામગીરી ન કરાતાં સ્થાનિકો અને વેપારીઓએ લોક જાગૃતિ માટે લાઉડસ્પીકરમાં હનુમાન ચાલીસા વગાડીને અનોખો વિરોધ નોંધાવ્યો હતો.
વિદ્યાર્થીઓ અને દુકાનદારો ધૂળ-ખાડાથી ત્રાહિમામ
આઇકોનિક રોડ વિસ્તારમાં શૈક્ષણિક સંસ્થાઓ અને વ્યાપારી મથકો આવેલા હોવાથી દરરોજ 5 હજારથી વધુ વિદ્યાર્થીઓ અને 300થી વધુ દુકાનદારો આ માર્ગ પરની દુર્દશા ભોગવી રહ્યા છે. બે વર્ષથી રોડ ખોદીને બિસ્માર હાલતમાં મૂકી દેવાતાં ઉડતી ધૂળ, ખાડા અને ટ્રાફિકની સમસ્યાથી વાહનચાલકો અને વેપારીઓ ત્રાહિમામ પોકારી ગયા છે. તંત્રની ઘોર બેદરકારીના કારણે અકસ્માતોનું જોખમ સતત તોળાતું રહેતાં લોકોની ધીરજ ખૂટી ગઈ છે.
રોડનું કામ તાત્કાલિક પૂર્ણ કરવા માગ
સ્થાનિક રહીશો, વિદ્યાર્થીઓ અને વેપારીઓએ એકસૂરે મ્યુનિસિપલ કોર્પોરેશન તેમજ જવાબદાર અધિકારીઓ પાસે આઇકોનિક રોડનું કામ યુદ્ધના ધોરણે પૂર્ણ કરવાની માગ કરી છે. હનુમાન ચાલીસા વગાડીને અનોખો વિરોધ કરી રહેલા લોકોએ સ્પષ્ટ ચીમકી આપી છે કે જો તંત્ર દ્વારા તાત્કાલિક કામગીરી પુનઃ શરૂ કરી રોડ તૈયાર કરવામાં નહીં આવે, તો આગામી દિવસોમાં સમગ્ર શહેરમાં વધુ ઉગ્ર જનઆંદોલન આચરવામાં આવશે.