લાજપોર જેલ ફરી એકવાર ગેરકાયદે પ્રવૃત્તિઓ અને સુરક્ષાની ગંભીર ખામીઓના કારણે વિવાદના કેન્દ્રમાં આવી છે. જેલ પરિસરમાં હાથ ધરવામાં આવેલા આકસ્મિક ચેકિંગ દરમિયાન પાણીની પાઇપલાઇનમાંથી વધુ 4 બિનવારસી મોબાઈલ ફોન મળી આવ્યા છે. આ ચોંકાવનારી રિકવરી સાથે માત્ર છેલ્લા 15 જ દિવસની અંદર લાજપોર જેલમાંથી કુલ 22 જેટલા મોબાઈલ ફોન ઝડપાઈ ચૂક્યા છે. રાજ્યના પોલીસ વડા (DGP) દ્વારા તાજેતરમાં જેલોમાં પાડવામાં આવેલી ‘સર્જિકલ સ્ટ્રાઈક’ અને સઘન તપાસના દાવાઓ છતાં લાજપોર જેલમાંથી સતત ફોન મળી આવતા જેલ પ્રશાસનની સુરક્ષા વ્યવસ્થાના લીરેલીરા ઊડી ગયા છે. આ મામલે સચિન પોલીસ મથકે અજાણ્યા કેદીઓ અને મદદગારો સામે ગુનો નોંધી કાયદેસર તપાસ હાથ ધરવામાં આવી છે.
પાણીની પાઇપલાઇનમાં છુપાવ્યા હતા મોબાઈલ
જેલના બેરેક અને ખુલ્લા પરિસરમાં ચાલતી પાણીની પાઇપલાઇનની અંદર યુક્તિપૂર્વક પ્લાસ્ટિક કે વોટરપ્રૂફ મટીરિયલમાં લપેટીને આ ચાર મોબાઈલ સંતાડવામાં આવ્યા હતા.ગુપ્ત બાતમી કે શંકાના આધારે હાથ ધરાયેલા સર્ચ ઓપરેશન દરમિયાન પાઇપલાઇનમાંથી આ ફોન કબજે કરવામાં આવ્યા હતા.જેલમાં થ્રી-ટાયર સુરક્ષા, સીસીટીવી કેમેરા અને બોડી સ્કેનર હોવા છતાં આટલા મોટા પાયે મોબાઈલ બેરેક સુધી કેવી રીતે પહોંચ્યા તે મોટો રહસ્યમય પ્રશ્ન બન્યો છે.
વગદાર કેદીઓને અધિકારીઓના આશીર્વાદ હોવાની ચર્ચા
જેલ તંત્રની આંતરિક કામગીરી અને શંકાસ્પદ ભૂમિકા અંગે ઉઠેલા સવાલો.અગાઉ ડીજીપીની ટીમો દ્વારા પાડેલા દરોડા અને ત્યારપછીની સ્થાનિક તપાસમાં મળીને માત્ર 15 દિવસમાં કુલ 22 જેટલા મોબાઈલ ફોન મળી આવ્યા છે, જે દર્શાવે છે કે જેલની અંદરથી જ નેટવર્ક ખુલ્લેઆમ ઓપરેટ થઈ રહ્યું છે.ચર્ચા મુજબ જેલની અંદર ખંડણી, ગેરકાયદે વહીવટ કે કાળો કારોબાર ચલાવતા કેટલાક માથાભારે અને વગદાર કેદીઓને જેલના જ કેટલાક ભ્રષ્ટ અધિકારીઓ-કર્મચારીઓનું પીઠબળ છે.તાજેતરમાં દેખાડા પૂરતી અમુક સામાન્ય કેદીઓની અન્ય જેલોમાં બદલી કરવામાં આવી હતી, જ્યારે જેલમાં કાળો કારોબાર ચલાવતા મુખ્ય સૂત્રધારો અને વગદાર કેદીઓ હજુ પણ સુરક્ષિત હોવાનો ગણગણાટ શરૂ થયો છે.
સચિન પોલીસ મથકે ગુનો દાખલ
બનાવ અંગે કાયદેસરની કાર્યવાહી તેજ કરાઈ છે.જેલ પ્રશાસનની સત્તાવાર ફરિયાદના આધારે સુરતના સચિન પોલીસ સ્ટેશન માં પ્રિઝનર્સ એક્ટ અને સંબંધિત કલમો હેઠળ ગુનો દાખલ કરવામાં આવ્યો છે.પોલીસે જપ્ત કરેલા ચારેય મોબાઈલ ફોનના આઈએમઈએઆઈ (IMEI) નંબર, કોલ ડિટેઇલ રેકોર્ડ્સ (CDR) અને સિમકાર્ડની વિગતો મેળવવા એફએસએલ (FSL) ની મદદ લીધી છે.આ ફોન જેલમાં કોણ લાવ્યું હતું, તેમાં કયા કયા કેદીઓ દ્વારા બહાર વાતચીત કરવામાં આવતી હતી અને જેલ સ્ટાફમાંથી કોની મિલીભગત છે તે તમામ પાસાંઓ પર સચિન પોલીસે ઊંડાણપૂર્વક તપાસ શરૂ કરી છે.