અમેરિકન યૌન અપરાધી જેફ્રી એપસ્ટીન સાથે પેટ્રોલિયમ મંત્રી હરદીપ સિંહ પુરીની અનેક તસવીરો વાયરલ થઈ રહી છે. આ તસવીરોને એટલા માટે મહત્વપૂર્ણ માનવામાં આવી રહી છે, કારણ કે પુરી સતત કહેતા રહ્યા છે કે તેઓ એપસ્ટીનને માત્ર પ્રતિનિધિમંડળ સાથે મળ્યા હતા, અલગથી ક્યારેય મુલાકાત થઈ નહોતી. તસવીરો સામે આવ્યા બાદ કોંગ્રેસ પ્રવક્તા સુપ્રિયા શ્રીનેતે સોશિયલ મીડિયા પોસ્ટમાં લખ્યું- જ્યારે પુરીએ કહ્યું હતું કે તેઓ એપસ્ટીનને ક્યારેય એકલા મળ્યા નહોતા, તો આ તસવીરોનો અર્થ શું છે? TMC સાંસદ મહુઆ મોઇત્રાએ કહ્યું- પુરી કહેતા હતા કે તેઓ એપસ્ટીનને ત્રણ-ચાર વખત પ્રતિનિધિમંડળ સાથે મળ્યા હતા, તો બંને તસવીરોમાં બાકીના સભ્યો ક્યાં હતા? અમેરિકન જસ્ટિસ ડિપાર્ટમેન્ટની વેબસાઇટની લિંક- https://www.justice.gov/epstein/files/DataSet%209/EFTA01191294.pdf વેબસાઇટ પર એપસ્ટીન-પુરીની 11 તસવીરો આ તસવીરો જસ્ટિસ ડિપાર્ટમેન્ટ દ્વારા જાહેર કરવામાં આવેલા દસ્તાવેજોના નવમા સેટમાં સામેલ કરવામાં આવી હતી. આ સેટમાં ઓછામાં ઓછી 11 તસવીરો છે. મંગળવારે આ તસવીર સોશિયલ મીડિયા પર ચર્ચામાં આવી હતી. આ તસવીરોમાં બંને લગભગ એક જ સ્થિતિમાં બેઠેલા દેખાય છે. તસવીરોના કોણમાં નજીવો તફાવત છે. રાહુલ ગાંધીના આરોપોને ફગાવ્યા હતા આ વર્ષના ફેબ્રુઆરીમાં હરદીપ સિંહ પુરીએ લોકસભામાં રાહુલ ગાંધી દ્વારા એપસ્ટીન ફાઇલોને લઈને લગાવવામાં આવેલા આરોપોને ફગાવી દીધા હતા. પુરીએ જણાવ્યું હતું કે સંયુક્ત રાષ્ટ્રમાં ભારતના રાજદૂતનું પદ છોડ્યા બાદ અને 2017માં કેન્દ્રીય મંત્રીમંડળમાં સામેલ થયા પહેલાં તેઓ એપસ્ટીનને મળ્યા હતા. તેમણે આ મુલાકાતોને સંપૂર્ણપણે વ્યાવસાયિક ગણાવી હતી અને કહ્યું હતું કે એપસ્ટીન વિરુદ્ધ લગાવવામાં આવેલા ફોજદારી આરોપો સાથે તેમનો કોઈ સંબંધ નહોતો. પૂરીએ ફેબ્રુઆરીમાં એક ઇન્ટરવ્યૂમાં કહ્યું હતું કે તેઓ ઇન્ટરનેશનલ પીસ ઇન્સ્ટિટ્યૂટ (IPI) સાથે જોડાયેલા એક ડેલિગેશનના સભ્ય તરીકે ગયા હતા. તે જ દરમિયાન તેઓ એપસ્ટીનને મળ્યા હતા. તેઓ જાહેર જીવનમાં વિવિધ પ્રકારના લોકોને મળે છે, જેમાંથી કેટલાકનો ગુનાહિત રેકોર્ડ પણ હોઈ શકે છે. પૂરીના જણાવ્યા મુજબ, IPIમાં તેમના બોસ ટેર્જે રોડ-લાર્સને એપસ્ટીનને ઓળખતા હતા. પૂરીએ કહ્યું- પહેલી મુલાકાત દરમિયાન મને ખબર નહોતી કે એપસ્ટીન કોણ છે. અમે તેમના વિશે ગૂગલ પર સર્ચ કર્યું. ત્યારબાદ અમે એકબીજા સાથે એ પણ ચર્ચા કરી કે અમારે તેમને મળવું જોઈએ કે નહીં? નવેમ્બર 2025માં પહેલીવાર નામ સામે આવ્યું ઈમેલમાં ઉલ્લેખ: હરદીપ સિંહ પૂરી અને જેફ્રી એપસ્ટીનના સંપર્કનો મામલો પહેલીવાર નવેમ્બર 2025માં જાહેર ચર્ચામાં આવ્યો હતો. તે સમયે હાઉસ ઑફ રિપ્રેઝન્ટેટિવ્સની સમિતિ તરફથી જાહેર કરવામાં આવેલા એક ઈમેલમાં એપસ્ટીન અને પૂરી વચ્ચેની વાતચીતનો ઉલ્લેખ થયો હતો. ઈમેલ ક્યારેના છે: આ પછી અમેરિકાના ન્યાય વિભાગ (DoJ) દ્વારા 30 જાન્યુઆરીએ એપસ્ટીન સાથે જોડાયેલા લાખો પાનાના દસ્તાવેજો જાહેર કરવામાં આવ્યા હતા. તેમાં જૂન 2014થી જૂન 2017 વચ્ચેના ઈમેલનો સમાવેશ થાય છે. ત્રણ મુલાકાતોનો ઉલ્લેખ: ઈમેલ મુજબ પુરી 4 ફેબ્રુઆરી 2015, 6 જાન્યુઆરી 2016 અને 19 મે 2017ના રોજ ન્યૂયોર્કમાં એપસ્ટીનના ઘરે ગયા હતા. એપસ્ટીન યૌન અપરાધી સાબિત થઈ ચૂક્યો હતો: 2008માં એપસ્ટીનને યૌન અપરાધના કેસમાં દોષિત ઠેરવવામાં આવ્યો હતો. એટલે કે પુરીએ જણાવેલી મુલાકાતો એવા સમયે થઈ હતી, જ્યારે એપસ્ટીનનો ગુનાહિત રેકોર્ડ પહેલેથી જ અસ્તિત્વમાં હતો. ‘એક્ઝોટિક આઇલેન્ડ’નો ઉલ્લેખ: એક ઈમેલમાં પુરીએ એપસ્ટીનના ‘એક્ઝોટિક આઇલેન્ડ’ એટલે કે અનોખા ટાપુનો ઉલ્લેખ કર્યો અને તેને ‘હેવ ફન’ કહ્યું, જેનો અર્થ થાય છે ‘મોજ કરો’. પુરીએ બાદમાં કહ્યું કે ‘હેવ ફન’ તેમની બોલવાની સામાન્ય રીત છે. કરોડપતિ ફાઇનાન્સર હતો યૌન અપરાધી એપસ્ટીન જેફ્રી એપસ્ટીન ન્યૂયોર્કનો કરોડપતિ ફાઇનાન્સર હતો. તેની મોટા નેતાઓ અને સેલિબ્રિટીઓ સાથે મિત્રતા હતી. તેના પર 2005માં સગીર છોકરી સાથે જાતીય શોષણનો આરોપ લાગ્યો હતો. 2008માં તેને સગીર પાસેથી સેક્સની માંગણી કરવાનો દોષી ઠેરવવામાં આવ્યો હતો. તેને 13 મહિનાની જેલની સજા થઈ હતી. 2019માં જેફ્રીની સેક્સ ટ્રાફિકિંગના આરોપોમાં ધરપકડ કરવામાં આવી હતી. પરંતુ ટ્રાયલ પહેલાં જ તેણે જેલમાં આત્મહત્યા કરી લીધી હતી. તેની પાર્ટનર ઘિસલેન મેક્સવેલને 2021માં તેને મદદ કરવાના આરોપોમાં દોષી ઠેરવવામાં આવી હતી. તે 20 વર્ષની સજા ભોગવી રહી છે. ——————— એપસ્ટીન ફાઇલ્સ સાથે જોડાયેલા આ સમાચાર પણ વાંચો… એપસ્ટીનના ‘કાળા ચિઠ્ઠા’માં 38,000 વખત ટ્રમ્પનું નામ:10 દેશમાં રાજીનામાં, 80 સામે તપાસ, શાહી પરિવારોથી લઈને અબજોપતિઓનાં નામ સેક્સ સ્કેન્ડલમાં ઊછળ્યાં અમેરિકામાં નાની છોકરીઓના યૌનશોષણ અને માનવ તસ્કરીના આરોપી અબજોપતિ જેફરી એપસ્ટીન સાથે સંકળાયેલા ગુપ્ત દસ્તાવેજો સાર્વજનિક થતાં જ દુનિયાના સત્તા અને પ્રભાવના ગલિયારાઓમાં ખળભળાટ મચી ગયો છે. અમેરિકાના જસ્ટિસ ડિપાર્ટમેન્ટ દ્વારા જાહેર કરાયેલા લગભગ 30 લાખ પાનાંના દસ્તાવેજો પછી અત્યારસુધીમાં 10 દેશોમાં 15થી વધુ ઉચ્ચ અધિકારીને પદ ગુમાવવું પડ્યું છે. 80થી વધુ મોટાં નામો વિરુદ્ધ તપાસ ચાલી રહી છે. વાંચો સંપૂર્ણ સમાચાર…