​જૂનાગઢ જિલ્લાના માંગરોળ શહેરમાં આજે ઓઇલ અને સ્પેરપાર્ટની એક દુકાનમાં અચાનક ભીષણ આગ ફાટી નીકળવાની ઘટના સામે આવી છે. દુકાનમાંથી અચાનક આગની જ્વાળાઓ અને ધુમાડાના ગોટેગોટા નીકળતા જોઈને આસપાસના સમગ્ર વિસ્તારમાં ભારે અફડાતફડી અને ગભરાટનો માહોલ સર્જાયો હતો. સ્થાનિક લોકો કઈ સમજે તે પહેલાં જ આગે વિકરાળ સ્વરૂપ ધારણ કરી લીધું હતું. ​આગ લાગવાની આ હોનારતમાં દુકાનની અંદર રાખવામાં આવેલો ઓઇલ, વિવિધ સ્પેરપાર્ટ્સ સહિતનો તમામ કિંમતી સામાન બળીને સંપૂર્ણપણે ખાખ થઈ ગયો હતો. ઘટનાની જાણ થતાં જ માંગરોળ નગરપાલિકાની ફાયર ફાઇટર ટીમ તાત્કાલિક ઘટનાસ્થળે દોડી આવી હતી. ફાયર ફાઇટરની ટીમે પાણીનો મારો ચલાવીને ભારે જહેમત બાદ આગ પર સંપૂર્ણ કાબૂ મેળવ્યો હતો. ​પ્રાથમિક અનુમાન મુજબ આ ભીષણ આગ શોર્ટ સર્કિટના કારણે લાગી હોવાની આશંકા વ્યક્ત કરવામાં આવી રહી છે. સદનસીબે આ દુર્ઘટનામાં કોઈ જાનહાનિના અહેવાલ નથી, પરંતુ દુકાનમાં રહેલા સામાનને ખુબ જ મોટા પ્રમાણમાં નુકસાન થયું હોવાનું અનુમાન લગાવવામાં આવી રહ્યું છે.