અમેરિકામાં ડીઝલના વધતા ભાવો વચ્ચે રશિયાથી આશરે 3 લાખ બેરલ ડીઝલ લઈને એક ટેન્કર અમેરિકા માટે રવાના થયું છે. જહાજ 10 નવેમ્બરે ન્યૂયોર્ક પહોંચી શકે છે. અમેરિકાના રાષ્ટ્રપતિ ડોનાલ્ડ ટ્રમ્પ અને રશિયાના રાષ્ટ્રપતિ વ્લાદિમીર પુતિન વચ્ચે વૈશ્વિક બજારમાં ઈંધણનો પુરવઠો વધારવા અંગે સહમતિ થયા બાદ આ પહેલી ખેપ છે. ટ્રમ્પ પ્રશાસન રશિયા પર લગાવવામાં આવેલા કેટલાક પ્રતિબંધોમાં ઢીલ આપીને ઈંધણનો પુરવઠો વધારવાનો પ્રયાસ કરી રહ્યું છે. એનબીસી ન્યૂઝ અનુસાર, માલ્ટાના ધ્વજવાળું ટેન્કર ‘એગિયોઈ ફાનેદેસ’ શુક્રવારે રશિયાના પ્રિમોર્સ્ક બંદરેથી રવાના થયું. ઊર્જા બજાર પર નજર રાખતી કંપની એનર્જી એસ્પેક્ટ્સે પોતાના સૂત્રોને ટાંકીને જણાવ્યું કે જહાજ પર આશરે 2.98 લાખ બેરલ ડીઝલ લાદવામાં આવ્યું છે. અમેરિકામાં ડીઝલના ભાવમાં 78%નો વધારો અમેરિકામાં આ વર્ષે ડીઝલની સરેરાશ કિંમત 3.55 ડૉલર પ્રતિ ગૅલનથી વધીને 6.32 ડૉલર થઈ ગઈ છે. એટલે કે તેમાં આશરે 78%નો વધારો થયો છે. ઈરાન યુદ્ધ અને રશિયા-યુક્રેન યુદ્ધને કારણે તેલનો પુરવઠો પ્રભાવિત થયો છે, જેના કારણે ઊર્જાના ભાવમાં વધારો થયો છે. ડીઝલ મોંઘું થવાની અસર માત્ર વાહનચાલકો પૂરતી સીમિત રહેતી નથી. ખેતી, માલની હેરફેર અને ખાદ્ય પદાર્થોની કિંમતો પર પણ તેની અસર પડે છે. સામાનની હેરફેર મોંઘી થવાથી કંપનીઓનો ખર્ચ વધે છે, જેનો બોજ આખરે સામાન્ય લોકો પર પણ પડી શકે છે. ટ્રમ્પ રશિયા પરના પ્રતિબંધોમાં ઢીલ આપી રહ્યા છે ટ્રમ્પ પ્રશાસને આશરે બે અઠવાડિયા પહેલાં રશિયા પર લાદવામાં આવેલા કેટલાક પ્રતિબંધોમાં ઢીલ આપી હતી. ત્યારબાદ કેટલીક વધુ પાબંદીઓમાં પણ રાહત આપવામાં આવી. આ પગલું એવા સમયે લેવામાં આવ્યું છે, જ્યારે રશિયાનું યુક્રેન વિરુદ્ધ યુદ્ધ ચાલુ છે. ટ્રમ્પ રશિયા સાથેના સંબંધો સુધારવા અને યુક્રેન પરનું યુદ્ધ સમાપ્ત કરવા માટે દબાણ બનાવવાનો પ્રયાસ પણ કરી રહ્યા છે. ક્રેમલિનના પ્રવક્તા દિમિત્રી પેસ્કોવે શુક્રવારે જણાવ્યું હતું કે રશિયન ઊર્જા મંત્રાલયે પ્રથમ ટેન્કર રવાના થયાની માહિતી આપી છે. તેમણે કહ્યું કે આગળ પણ ઇંધણનો જથ્થો નિયમિત રીતે મોકલવામાં આવી શકે છે. અમેરિકાના દૈનિક વપરાશ કરતાં આ જથ્થો ઘણો ઓછો છે અમેરિકામાં દરરોજ આશરે 38 લાખ બેરલ ડીઝલનો વપરાશ થાય છે. આવી સ્થિતિમાં રશિયાથી આવી રહેલો આશરે 2.98 લાખ બેરલનો જથ્થો દેશની એક દિવસની જરૂરિયાત પણ પૂરી કરી શકશે નહીં. ઊર્જા બજારની કંપની એનર્જી એસ્પેક્ટ્સના વિશ્લેષકોનું માનવું છે કે આ જથ્થાથી કિંમતો પર અસર મર્યાદિત રહેશે. બેન્ક ઑફ અમેરિકાના કોમોડિટી નિષ્ણાત ફ્રાન્સિસ્કો બ્લાન્ચના જણાવ્યા મુજબ, વિશ્વમાં ડીઝલ જેવા રિફાઇન્ડ ઇંધણનો પુરવઠો ઘટી રહ્યો છે. હોર્મુઝ સ્ટ્રેટની આસપાસ જહાજો પર થયેલા હુમલાઓ અને રશિયાની તેલ રિફાઇનરીઓ પરના હુમલાઓએ પણ પુરવઠાને અસર કરી છે. કિંમતો ઘટાડવા માટે ટ્રમ્પ અનેક પગલાં લઈ રહ્યા છે ડીઝલની કિંમતો ઘટાડવા માટે ટ્રમ્પ વહીવટીતંત્રે અનેક પગલાં લીધાં છે. તેમાં ઑફ-રોડ ઉપયોગ માટેના ડીઝલનો વધુ ઉપયોગ કરવાની મંજૂરી આપવી અને યુરોપિયન દેશો પર તેમના ડીઝલ ભંડાર જાહેર કરવા દબાણ બનાવવાનો સમાવેશ થાય છે. અહેવાલ મુજબ, અમેરિકન વહીવટીતંત્રે કાચા તેલ અને ડીઝલના વ્યૂહાત્મક ભંડારમાંથી નવો જથ્થો જાહેર કરવાનો પ્રયાસ પણ કર્યો હતો, પરંતુ આંતરરાષ્ટ્રીય ઊર્જા એજન્સીએ આ માંગ સ્વીકારી નહોતી. આ છતાં નિષ્ણાતોને કિંમતોમાં ટૂંક સમયમાં મોટો ઘટાડો થવાની અપેક્ષા નથી. બ્લાન્ચના મતે, સરકારી પગલાં થોડા સમય માટે રાહત આપી શકે છે, પરંતુ ડીઝલની કિંમતો ઘટાડવાનો કોઈ સરળ ઉકેલ નથી.