તુર્કિયેના રક્ષા મંત્રી યાસર ગુલરે કહ્યું છે કે તેમનો દેશ હૂતી બળવાખોરો સામેની લડાઈમાં સામેલ નહીં થાય. ગુલરે એક ઇન્ટરવ્યૂમાં કહ્યું કે તુર્કિયેનો હેતુ સાઉદી અરેબિયાની સુરક્ષા મજબૂત કરવાનો અને દુશ્મનોને હુમલો કરતા રોકવાનો રહેશે. આ નિવેદન એવા સમયે સામે આવ્યું છે જ્યારે ઓગસ્ટમાં જ તુર્કિયે, સાઉદી અરેબિયા અને પાકિસ્તાને મક્કા રક્ષા સમજૂતી પર હસ્તાક્ષર કર્યા હતા. આ સમજૂતી હેઠળ એક પર થયેલો હુમલો ત્રણેય દેશો પર થયેલો હુમલો માનવામાં આવશે. આ પહેલાં પાકિસ્તાન અને અમેરિકા પણ સાઉદીને મદદ કરવાનો ઇનકાર કરી ચૂક્યા છે. યરુશલમ પોસ્ટના અહેવાલ મુજબ, પાકિસ્તાને કહ્યું હતું કે તેની સેના કોઈ બીજા દેશની ધરતી પરના યુદ્ધમાં સામેલ નહીં થાય. બીજી તરફ, રોઇટર્સના અહેવાલ મુજબ સાઉદી અરેબિયાએ સીધા અમેરિકી સૈન્ય હુમલાની માગ કરી હતી, પરંતુ અમેરિકી રાષ્ટ્રપતિ ટ્રમ્પે તેનો ઇનકાર કરી દીધો હતો. ગુલરે કહ્યું- સાઉદીની માગ પર મદદનો નિર્ણય કરીશું ગુલરે કહ્યું કે સાઉદી અરેબિયાની માગ પર તુર્કિયે સૈન્ય મદદ આપવા અંગે વિચાર કરશે. આથી નક્કી થશે કે સાઉદીને કેવા પ્રકારની અને કેટલી મદદ આપવામાં આવશે. તેમણે કહ્યું કે મદદના વ્યાપ અંગે નિર્ણય લેતા પહેલાં તુર્કિયેની સંસદમાંથી સમજૂતીને મંજૂરી મળવી જરૂરી છે. ત્યાર બાદ કાનૂની પ્રક્રિયાઓ અને સંસદની મંજૂરી અનુસાર આગળનો નિર્ણય લેવામાં આવશે. હકીકતમાં, મક્કા રક્ષા સમજૂતીને અત્યાર સુધી તુર્કિયેની સંસદમાં મંજૂરી મળી નથી. તેને 21 ઓક્ટોબરે સંસદમાં રજૂ કરવામાં આવી છે અને નિર્ણય હજુ બાકી છે. રિપોર્ટ- ટ્રમ્પ સરકારે હૂતી બળવાખોરો સાથે ગુપ્ત સમજૂતી કરી એક્સિઓસના ગયા મહિનાના એક અહેવાલ મુજબ અમેરિકાએ યમનના હૂતી બળવાખોરો સાથે ગુપ્ત સમજૂતી કરી છે. આ સમજૂતી હેઠળ હૂતીઓએ અમેરિકાને ખાતરી આપી છે કે તેઓ લાલ સમુદ્રમાં અમેરિકન અને આંતરરાષ્ટ્રીય જહાજોને નિશાન બનાવશે નહીં. આ સોદો ગયા મહિને ઓમાનની રાજધાની મસ્કટમાં આવેલા અમેરિકી દૂતાવાસમાં થયો હતો. તેમાં હૂતી પ્રતિનિધિઓએ ખાતરી આપી હતી કે તેઓ સાઉદી અરેબિયા સિવાયના અન્ય જહાજોને બાબ અલ-મંદેબમાંથી પસાર થવા દેશે. અમેરિકાના ઉપરાષ્ટ્રપતિ જેડી વેન્સે પણ કહ્યું હતું કે અમેરિકા હૂતીઓ સાથે સીધી વાતચીત કરી રહ્યું છે. જોકે, કોઈ ઔપચારિક ગુપ્ત સમજૂતીની જાહેરમાં પુષ્ટિ થઈ નહોતી. હૂતી બળવાખોરોએ આ મહિને સાઉદી પર 6 મોટા હુમલા કર્યા આ મહિને હૂતી બળવાખોરોએ સાઉદી અરેબિયાના મોટા એરપોર્ટ અને અન્ય મહત્વપૂર્ણ સ્થળો પર મિસાઇલો તથા અન્ય હથિયારોથી હુમલા કર્યા છે. આ હુમલાઓમાં ઓછામાં ઓછા 23 લોકોનાં મોત થયાં છે અને 370 લોકો ઘાયલ થયા છે. 6 ઓક્ટોબર: જિઝાન અને નજ્રાનના એરપોર્ટને નિશાન બનાવવામાં આવ્યા. સાથે જ છોડવામાં આવેલી બેલિસ્ટિક મિસાઇલને સાઉદી એર ડિફેન્સે અટકાવ્યાનો દાવો કર્યો. 7 ઓક્ટોબર: રિયાધ અને અબહા એરપોર્ટ પર હુમલા થયા. સાઉદી અધિકારીઓના જણાવ્યા અનુસાર ત્રણ વિદેશી નાગરિકોનાં મોત થયાં અને 36 લોકો ઘાયલ થયા. 8 ઓક્ટોબર: રિયાધ એરપોર્ટ પર વધુ એક હુમલો થયો. અધિકારીઓના જણાવ્યા અનુસાર, ત્રણ સાઉદી નાગરિકોનાં મોત થયાં. સરકારી એરલાઇન સાઉદિયાનું એક વિમાન પણ નુકસાનગ્રસ્ત થયું. 10 ઓક્ટોબર: રિયાધ એરપોર્ટ પર મિસાઇલ હુમલામાં 1 ભારતીય નાગરિક સહિત 13 લોકોનાં મોત થયાં અને 300થી વધુ લોકો ઘાયલ થયા. ત્યારબાદ એરપોર્ટ પરની ઉડાનો રોકવી પડી. 11 ઓક્ટોબર: રિયાધ એરપોર્ટ પર એક મિસાઇલ અથવા ડ્રોન પડ્યું. એક પાકિસ્તાની નાગરિકનું મોત થયું અને 11 લોકો ઘાયલ થયા. 22 ઓક્ટોબર:દમ્મામ એરપોર્ટ પર થયેલા હુમલામાં એક ભારતીયનું મોત થયું અને 8 લોકો ઘાયલ થયા. અરામકોના ઓઈલ મથક પર ડ્રોન હુમલામાં 2 લોકોનાં મોત થયાં. એક ભારતીય સહિત 2 લોકો ઘાયલ થયા. 2015થી સાઉદી અને હૂતાઓની લડાઈ ચાલુ છે ઈરાનની મદદથી હૂતીઓની તાકાત વધી ઈરાન અને હૂતી બળવાખોરો વચ્ચે લાંબા સમયથી સંબંધો છે. સાઉદી અરેબિયા અને અમેરિકાનો આરોપ છે કે ઈરાન હૂતીઓને હથિયારો, તાલીમ અને તકનીકી મદદ આપે છે. તેના કારણે હૂતી ડ્રોન અને મિસાઇલોથી હુમલા કરવામાં સક્ષમ બન્યા છે. જોકે, હૂતી માત્ર ઈરાનના ઈશારે ચાલતું સંગઠન નથી. તેમનું પોતાનું નેતૃત્વ અને યમનમાં પોતાના રાજકીય હિતો પણ છે. મધ્ય પૂર્વમાં ઈરાન અને અમેરિકા વચ્ચે ચાલી રહેલા યુદ્ધની વચ્ચે હૂતીઓના હુમલાઓએ સાઉદી અરેબિયાની મુશ્કેલીઓ વધારી દીધી છે. સાઉદી અરેબિયાને હવે યમનના હૂતીઓથી પણ પોતાના એરપોર્ટ અને તેલ મથકોની સુરક્ષા કરવી પડી રહી છે.