વડોદરા જિલ્લાના સાવલી-હાલોલ રોડ પર એક અત્યંત દર્દનાક માર્ગ અકસ્માતની ઘટના સામે આવી છે. કંબોલા ગામ નજીક આવેલી તિરુપતિ રીલ્સ પ્રાઈવેટ લિમિટેડ કંપની પાસેથી પસાર થઈ રહેલા એક કન્ટેનરના ચાલકે બેફામ લાપરવાહી દાખવીને વાહન રિવર્સ લેતી વખતે પૂરપાટ બાઈકને અડફેટે લીધી હતી. આ ભયાનક અકસ્માતમાં બે વ્યક્તિઓના ઘટનાસ્થળે જ કમકમાટીભર્યા મોત નીપજ્યા છે, જ્યારે એક નાનું બાળક ગંભીર રીતે ઘાયલ થયું છે.
રિવર્સ લેતી વખતે કન્ટેનરે બાઈકને કચડી નાખી, બાળક ઇજાગ્રસ્ત
પ્રાપ્ત વિગતો અનુસાર, કન્ટેનર ચાલકે પાછળ જોયા વગર જ અચાનક કન્ટેનર રિવર્સ લેતા તેની અડફેટે બાઈક આવી ગઈ હતી અને બાઈક પર સવાર લોકો નીચે કચડાઈ ગયા હતા. આ અકસ્માતમાં બે નિર્દોષ વ્યક્તીઓનાં ઘટનાસ્થળે જ પ્રાણ પંખેરું ઉડી ગયા હતા. બનાવની જાણ થતાં જ ‘112 જનરક્ષક’ ની ટીમ તાત્કાલિક ઘટનાસ્થળે દોડી આવી હતી અને લોહીથી લથપથ હાલતમાં પડેલા ગંભીર રીતે ઇજાગ્રસ્ત બાળકને ત્વરિત સારવાર અર્થે નજીકની હોસ્પિટલ ખાતે ખસેડવામાં આવ્યો હતો.
ગ્રામજનોનો રોષ ભભૂકી ઉઠ્યો, ન્યાય માટે ઉગ્ર નારેબાજી
આ ગંભીર અકસ્માતને પગલે આસપાસના ગ્રામજનો મોટી સંખ્યામાં ઘટનાસ્થળે ઉમટી પડ્યા હતા. બે નિર્દોષ વ્યક્તિઓના અચાનક મોતને કારણે સ્થાનિક લોકોમાં ભારે રોષ અને આક્રોશનો માહોલ ફેલાઈ ગયો હતો. ગ્રામજનોએ રોષે ભરાઈને તંત્ર વિરુદ્ધ અને ન્યાય માટે ઉગ્ર નારેબાજી કરી હતી. આ હૃદયદ્રાવક ઘટનાને કારણે સમગ્ર પંથકમાં શોકની લાગણી છવાઈ ગઈ છે અને પોલીસ દ્વારા કન્ટેનર ચાલક વિરુદ્ધ કાયદેસરની કાર્યવાહી હાથ ધરવામાં આવી છે.