યમનના હૂથી બળવાખોરોએ શનિવારે સાઉદી અરેબિયાના તેલ મથકો અને એરપોર્ટ્સ પર હુમલો કર્યો છે. હૂથી પ્રવક્તા યાહ્યા સરીના જણાવ્યા મુજબ, નિશાન પર સાઉદી તેલ કંપની અરામ્કોનું યાન્બૂ મથક, રાબિગ તેલ રિફાઇનરી અને રિયાધ, દમ્મામ તેમજ નજરાનના એરપોર્ટ્સ હતા. સાઉદી સિવિલ ડિફેન્સે મક્કા અને મદીનામાં મિસાઇલોના ટુકડા પડવાની ચેતવણી આપી છે. લોકોને સુરક્ષિત સ્થળોએ રહેવા માટે કહેવામાં આવ્યું છે. ઉલ્લેખનીય છે કે, આ મહિને સાઉદી અરેબિયા પર હૂથીઓએ 6 મોટા હુમલા કર્યા છે. અદનમાં નૌસેનાના ઠેકાણાઓ પર હુમલાનો દાવો હૂથી પ્રવક્તા યાહ્યા સરીના જણાવ્યા અનુસાર તેમની સેનાએ અદનમાં સૈન્ય કેમ્પ અને નૌસેનાના અડ્ડાને નિશાન બનાવ્યા. તેમના જણાવ્યા અનુસાર, આ ઠેકાણાઓ પર સાઉદી સેનાની દેખરેખ હતી. અદન એ યમનની આંતરરાષ્ટ્રીય સ્તરે માન્યતા પ્રાપ્ત સરકારનું વચગાળાનું કેન્દ્ર છે. અહીં તાજેતરના દિવસોમાં પણ હુમલા થયા છે. 15 ઑક્ટોબરે અદનમાં રાષ્ટ્રપતિ ભવન પરિસર પર મિસાઇલ હુમલો થયો હતો. યમનના અધિકારીઓના જણાવ્યા અનુસાર, તેમાં પાંચ લોકોનાં મોત થયાં અને 16 લોકો ઘાયલ થયા. વડાપ્રધાન શાયા અલ-જિંદાની અને સરકારના અન્ય અધિકારીઓ સુરક્ષિત રહ્યા. 16 ઑક્ટોબરે અદન એરપોર્ટ પરિસરમાં પણ બે મિસાઇલો પડી હતી. યમનના અધિકારીઓના જણાવ્યા અનુસાર, આ મિસાઇલો કાહિરા જવા માટે તૈયાર એક મુસાફર વિમાનથી આશરે 500 મીટર દૂર પડી હતી. આ ઘટનામાં કોઈનાં મોત કે ઘાયલ થયાના અહેવાલ નથી. સાઉદી અરેબિયાએ બે મિસાઇલોને અટકાવ્યાનો દાવો કર્યો સાઉદી અરેબિયાના નેતૃત્વ હેઠળના સૈન્ય ગઠબંધને જણાવ્યું કે, તેણે પશ્ચિમ સાઉદી અરેબિયાના તાઇફ અને યાન્બૂ તરફ છોડવામાં આવેલી બે મિસાઇલોને રસ્તામાં જ અટકાવી દીધી. આ પછી સાઉદી સિવિલ ડિફેન્સે તાઇફ, યાન્બૂ, મક્કા અને જેદ્દાહમાં લોકોને જોખમની ચેતવણી આપી. લોકોને નજીકના સુરક્ષિત સ્થળે જવા માટે કહેવામાં આવ્યું. હૂથીઓનો દાવો—સાઉદીએ હુમલા કર્યા હૂથી મીડિયા ચેનલ અલ-મસીરાના જણાવ્યા મુજબ, સાઉદી અરેબિયાએ સના અને તેની આસપાસના વિસ્તારોમાં અનેક હુમલા કર્યા. ચેનલે મોખા શહેરની આસપાસ લગભગ 20 હવાઈ હુમલા થયાની પણ માહિતી આપી. સનાની આસપાસ આવેલી એક રહેણાંક ઇમારત પર પણ હુમલો થયો. આ ઇમારતમાં સિમેન્ટ ફેક્ટરીમાં કામ કરતા લોકો રહેતા હતા. હૂથી મીડિયાના જણાવ્યા મુજબ, હુમલામાં છ મહિલાઓ અને એક બાળકનાં મોત થયાં, જ્યારે ત્રણ લોકો ઘાયલ થયા. સાઉદી અરેબિયા અને હૂથીઓ વચ્ચે દુશ્મનાવટ કેમ છે આ સંઘર્ષની શરૂઆત યમનના ગૃહયુદ્ધથી થઈ હતી. યમનમાં હૂથીઓએ 2014માં રાજધાની સના પર કબજો કરી લીધો હતો. ત્યારબાદ 2015માં સાઉદી અરેબિયાએ અનેક દેશો સાથે મળીને તેમની વિરુદ્ધ સૈન્ય અભિયાન શરૂ કર્યું. સાઉદી અરેબિયા ઇચ્છતું હતું કે, યમનની આંતરરાષ્ટ્રીય માન્યતા પ્રાપ્ત સરકાર ફરીથી સત્તામાં આવે અને હૂથીઓનો કબજો સમાપ્ત થાય. ત્યારબાદ ઘણા વર્ષો સુધી યમનમાં હવાઈ હુમલા થતા રહ્યા. પરંતુ હૂથીઓને સંપૂર્ણપણે પાછળ ધકેલવામાં સાઉદી ગઠબંધન સફળ થઈ શક્યું નહીં. હૂથી હજુ પણ યમનના મોટા ભાગમાં પોતાની પકડ જાળવી રાખી રહ્યા છે. તેમની લડાઈની અસર હવે સાઉદી અરેબિયાની સુરક્ષા પર પણ પડી રહી છે. ઓક્ટોબરમાં સાઉદી અરેબિયા પર હૂથીઓના મોટા હુમલા 3 ઓક્ટોબર: હૂથીઓએ દાવો કર્યો કે, તેમણે રિયાધમાં સાઉદી કંપની અરામકોના તેલ મથક પર મિસાઇલ અને ડ્રોનથી હુમલો કર્યો. ત્યાં આગ લાગવા અને ધુમાડો ઊઠવાની માહિતી મળી હતી. 10 ઓક્ટોબર: રિયાધના કિંગ ખાલિદ એરપોર્ટ પર હુમલો થયો. અહેવાલ મુજબ, 12 લોકોનાં મોત થયા અને 309 લોકો ઘાયલ થયા. હૂથીઓએ હુમલાની જવાબદારી લીધી. 11 ઑક્ટોબર: રિયાધ એરપોર્ટ પર ફરી હુમલો થયાના સમાચાર આવ્યા. એક વ્યક્તિનું મોત થયું અને 11 લોકો ઘાયલ થયા. દમ્મામ શહેરના કિંગ ફહદ એરપોર્ટ પર પણ હુમલા થયા. 13-14 ઑક્ટોબર: ધહરાનમાં અરામકોના મુખ્યાલયમાં આગ લાગી. સાઉદી ઊર્જા મંત્રાલયે તેની પુષ્ટિ કરી. હૂથીઓએ રિયાદ એરપોર્ટ અને તેલના ઠેકાણાઓ પર હુમલો કરવાનો પણ દાવો કર્યો. 19 ઑક્ટોબર: સાઉદી ગઠબંધને જણાવ્યું કે તેણે યાન્બૂ તરફ આવી રહેલી એક મિસાઇલને અટકાવી દીધી. તેણે ડ્રોન અને ક્રૂઝ મિસાઇલોને પણ નષ્ટ કરવાની વાત કહી. 19 ઑક્ટોબરે હૂથીઓએ યાન્બૂ, શાયબા તેલક્ષેત્ર અને રિયાદ-અભા એરપોર્ટ પર હુમલો કરવાનો દાવો કર્યો. 24 ઑક્ટોબર: હૂથીઓએ રિયાધમાં સંરક્ષણ મંત્રાલય, યાન્બૂમાં અરામકોના ઠેકાણા અને દમ્મામ એરપોર્ટ પર હુમલો કરવાનો દાવો કર્યો. 24 ઑક્ટોબરે સાઉદી ગઠબંધને જણાવ્યું કે તેણે તાઇફ અને યાન્બૂ તરફ આવી રહેલી બે મિસાઇલોને અટકાવી દીધી.
—————————– આ સમાચાર પણ વાંચો… ટ્રમ્પ ઝૂક્યા, ભારત પર 100% ટેરિફનું જોખમ ટળ્યું:રશિયા પર પ્રતિબંધો અટકાવ્યા, કહ્યું- આનાથી અમેરિકાને જ ફાયદો અમેરિકી રાષ્ટ્રપતિ ટ્રમ્પે રશિયા પર કડક પ્રતિબંધો લાદતા કાયદાને હાલ પૂરતો અટકાવી દીધો છે. ટ્રમ્પે શુક્રવારે આ નિર્ણય સાથે જોડાયેલા આદેશ પર હસ્તાક્ષર કર્યા અને કહ્યું કે આ પગલું અમેરિકાના રાષ્ટ્રીય હિતમાં છે. સંપૂર્ણ સમાચાર વાંચો…