મિડલ ઈસ્ટમાં હૂતી બળવાખોરોના હુમલા અને વધતા તણાવને પગલે એર ઈન્ડિયા અને એર ઈન્ડિયા એક્સપ્રેસે સાઉદી અરેબિયામાં રિયાધ અને દમ્મામ માટેની ફ્લાઇટ્સ પરનો પ્રતિબંધ 7 નવેમ્બર, 2026 સુધી લંબાવ્યો છે. એરલાઈને જણાવ્યું કે, જેદ્દાહથી આવતી-જતી સર્વિસ 31 ઓક્ટોબર સુધી સ્થગિત રહેશે. પાત્ર મુસાફરોને મફત રીબુકિંગનો વિકલ્પ અને કેન્સલેશન પર સંપૂર્ણ રિફંડ આપવામાં આવશે. એર ઈન્ડિયાએ જણાવ્યું છે કે, જેમની 24 ઓક્ટોબર, 2026ના રોજ અથવા તે પહેલાં કન્ફર્મ બુકિંગ થઈ હતી, તેઓ મફત રીબુકિંગનો લાભ લઈ શકશે. એરલાઈને ટિકિટ કેન્સલ કરવા પર સંપૂર્ણ રકમ પરત આપવાની જાહેરાત કરી છે. એરલાઈન્સે હેલ્પલાઇન નંબર જાહેર કર્યા એર ઇન્ડિયા એક્સપ્રેસે જણાવ્યું છે કે, 24 ઑક્ટોબર અથવા તે પહેલાં રિયાધ અને દમ્મામ સેક્ટર માટે બુકિંગ કરાવનારા અને જેમની મૂળ મુસાફરીની તારીખ 7 નવેમ્બર સુધીની હતી, તેઓ સાઉદી અરેબિયા અથવા બહેરીન અને ભારતમાં આવેલા કોઈપણ કાર્યરત એર ઇન્ડિયા એક્સપ્રેસ સ્ટેશન માટે એક વખતની મફત રીબુકિંગ સુવિધાનો લાભ લઈ શકે છે. 24 ઑક્ટોબર અથવા તે પહેલાં જેદ્દાહ માટે બુકિંગ કરાવનારા અને જેમની મૂળ મુસાફરીની તારીખ 31 ઑક્ટોબર સુધીની હતી, તેમના માટે 14 નવેમ્બર સુધીની મુસાફરી માટે મફત રીબુકિંગ સુવિધા લાગુ પડે છે. આ વિકલ્પમાં સાઉદી અરેબિયા અથવા બહેરીન અને ભારતમાં આવેલા કાર્યરત એર ઇન્ડિયા એક્સપ્રેસ સ્ટેશનોનો સમાવેશ થાય છે. એરલાઇને જણાવ્યું કે તેમની ટીમો કોન્ટેક્ટ સેન્ટર અને શહેરની બુકિંગ ઓફિસ મારફતે મુસાફરોને રીબુકિંગ અને રિફંડની વિનંતીઓમાં મદદ કરશે. એર ઇન્ડિયાના મુસાફરો એરલાઇનનો +91 11 69329333 અથવા +91 11 69329999 પર સંપર્ક કરી શકે છે. એર ઇન્ડિયા એક્સપ્રેસના મુસાફરો +91 124 6935600 પર કૉલ કરી શકે છે. આકાશા એર, ઈન્ડિગોએ પણ ફ્લાઈટ્સ પરનો પ્રતિબંધ લંબાવ્યો આકાશા એરે 23 ઓક્ટોબરે જાહેરાત કરી હતી કે, તેણે જેદ્દાહ માટેની ફ્લાઈટ્સનું સસ્પેન્શન 10 નવેમ્બર સુધી અને રિયાધ માટેનું સસ્પેન્શન 30 નવેમ્બર, 2026 સુધી લંબાવ્યું છે. એરલાઈને જણાવ્યું હતું કે, સુરક્ષાના વાતાવરણની સાવચેતીપૂર્વક તપાસ કર્યા બાદ આ નિર્ણય લેવામાં આવ્યો છે. કંપની સ્થિતિ પર નજીકથી નજર રાખી રહી છે અને રિયલ ટાઈમમાં પરિસ્થિતિનું મૂલ્યાંકન કરી રહી છે. સાઉદી એરપોર્ટ, એનર્જી પ્લાન્ટ અને અન્ય મહત્વપૂર્ણ ઈન્ફ્રાસ્ટ્રક્ચરને નિશાન બનાવીને કરવામાં આવી રહેલા ડ્રોન અને મિસાઈલ હુમલાની ચિંતાઓ વચ્ચે ફ્લાઈટ્સને આ વિસ્તરણ આપવામાં આવ્યું છે.