ભારત સામે ઘરઆંગણે રમાઈ રહેલી T20 આંતરરાષ્ટ્રીય શ્રેણીમાં સતત 2 હાર બાદ ન્યૂઝીલેન્ડના મુખ્ય કોચ રોબ વૉલ્ટરે ટીમની ખામીઓ સ્વીકારી છે. તેમણે કહ્યું કે બંને મેચમાં ન્યૂઝીલેન્ડ પાસે જીતવાની તક હતી, પરંતુ નિર્ણાયક સમયે ટીમ મેચને પોતાના પક્ષમાં ફેરવી શકી નહીં. રવિવાર, 25 ઓક્ટોબર, 2026ના રોજ વેલિંગ્ટનમાં ટીમના પહોંચ્યા બાદ ન્યૂઝીલેન્ડ ક્રિકેટ દ્વારા જાહેર કરાયેલા વીડિયોમાં વૉલ્ટરે કહ્યું કે ટીમે બંને મેચમાં લગભગ 80 ટકા સમય સારી ક્રિકેટ રમી હતી. જોકે, અંતિમ સમયે જરૂરી પ્રદર્શન કરવામાં નિષ્ફળ રહી હતી. 

‘નાની ભૂલોની મોટી કિંમત ચૂકવવી પડી’

વૉલ્ટરે કહ્યું કે બંને મેચમાં ન્યૂઝીલેન્ડ જીત મેળવી શક્યું હોત. કેટલીક મહત્વપૂર્ણ તકોનો લાભ લેવામાં આવ્યો હોત તો પરિણામ અલગ હોઈ શક્યું હોત. તેમણે સ્વીકાર્યું કે હારથી નિરાશા થઈ છે, પરંતુ ટીમના પ્રદર્શનનાં અનેક પાસાં સકારાત્મક રહ્યાં છે. બીજી T20 મેચમાં નો-બોલ અને ફિલ્ડિંગ દરમિયાન કેચ છોડવા જેવી ભૂલો ન્યૂઝીલેન્ડને ભારે પડી હતી. વૉલ્ટરના મતે, આવી ભૂલો કોઈ ખેલાડી જાણીજોઈને કરતો નથી, પરંતુ રમત દરમિયાન થતી નાની ભૂલો પણ પરિણામ પર મોટી અસર કરી શકે છે. તેમણે કહ્યું કે ટીમે આવી ભૂલોમાંથી શીખીને નિર્ણાયક ક્ષણોમાં વધુ સારું પ્રદર્શન કરવું પડશે. 

3 વિકેટ ગુમાવ્યા બાદ પણ 180 રન બનાવ્યા

બીજી T20 મેચમાં ન્યૂઝીલેન્ડે પાવરપ્લે દરમિયાન જ 3 વિકેટ ગુમાવી દીધી હતી. જોકે, ત્યારબાદ ગ્લેન ફિલિપ્સ અને બેવન જેકોબ્સે શાનદાર બેટિંગ કરીને ટીમને મુશ્કેલીમાંથી બહાર કાઢી હતી. બંને વચ્ચે ચોથી વિકેટ માટે 116 રનની ભાગીદારી થઈ હતી. ફિલિપ્સે 43 બોલમાં 70 રન બનાવ્યા હતા, જ્યારે જેકોબ્સે 46 બોલમાં 58 રનનું યોગદાન આપ્યું હતું. આ ભાગીદારીના કારણે ન્યૂઝીલેન્ડે 20 ઓવરમાં 5 વિકેટે 180 રન બનાવ્યા હતા. વૉલ્ટરે બંને બેટ્સમેનોની પ્રશંસા કરતાં કહ્યું કે 3 વિકેટ વહેલી ગુમાવ્યા બાદ 180 રન સુધી પહોંચવું સરળ નથી. તેમના મતે, આ સ્કોરનો બચાવ કરી શકાય તેમ હતો. 

મિચેલ સેન્ટનરની બોલિંગનાં વખાણ

ન્યૂઝીલેન્ડના કોચે કેપ્ટન મિચેલ સેન્ટનરની બોલિંગની પણ પ્રશંસા કરી હતી. સેન્ટનરે બીજી T20 મેચમાં 21 રન આપીને 4 વિકેટ ઝડપી હતી અને ભારતને મુશ્કેલીમાં મૂકી દીધું હતું. વૉલ્ટરે કહ્યું કે સેન્ટનરની બોલિંગમાં વિવિધતા, ગતિ પરનું નિયંત્રણ અને ક્રીઝનો ઉપયોગ કરવાની ક્ષમતા ઘણી અસરકારક રહી હતી. તેમણે સેન્ટરની શાંત નેતૃત્વશૈલીનાં પણ વખાણ કર્યાં હતાં. જોકે, ભારતે તિલક વર્માની અણનમ 51 રનની ઇનિંગ્સ અને નીતિશ કુમાર રેડ્ડીના 26 રનની મદદથી 181 રનનો લક્ષ્યાંક હાંસલ કર્યો હતો. ભારતે 4 વિકેટથી જીત મેળવીને શ્રેણીમાં 2-0ની લીડ મેળવી હતી. 

હવે ત્રીજી મેચ વેલિંગ્ટનમાં

ભારત અને ન્યૂઝીલેન્ડ વચ્ચેની ત્રીજી T20 આંતરરાષ્ટ્રીય મેચ મંગળવાર, 27 ઓક્ટોબરે વેલિંગ્ટનના Hnry સ્ટેડિયમમાં રમાવાની છે. ન્યૂઝીલેન્ડ માટે આ મેચ મહત્ત્વપૂર્ણ છે, કારણ કે હાર સાથે ભારત શ્રેણીમાં 3-0ની અજેય લીડ મેળવી શકે છે. વૉલ્ટરે જણાવ્યું કે વેલિંગ્ટનમાં પવનની બદલાતી દિશા અને ડ્રોપ-ઇન પિચ બંને ટીમો માટે પડકારરૂપ બની શકે છે. ન્યૂઝીલેન્ડે પરિસ્થિતિ પ્રમાણે ઝડપથી પોતાની રમત બદલવી પડશે. કોચને આશા છે કે ટીમ અગાઉની ભૂલોમાંથી શીખીને આગામી મેચમાં વધુ સંપૂર્ણ પ્રદર્શન કરશે.

આ પણ વાંચો: Ranji Trophy: મુંબઈને મોટો ફટકો, હરિયાણા સામેની મેચમાંથી શાર્દૂલ ઠાકુર બહાર