આણંદ જિલ્લાના આંકલાવ તાલુકામાંથી એક મોટી ચોરીની ઘટના સામે આવી છે. આંકલાવના બિલપાડ ગામના હરિજનવાસ વિસ્તારમાં તસ્કરોએ ભારે તરખાટ મચાવ્યો છે. અજાણ્યા તસ્કરોએ એક મકાનને નિશાન બનાવીને અંદર પ્રવેશ કર્યો હતો, અને લાખો રૂપિયાની કિંમતના સોના-ચાંદીના દાગીના તેમજ રોકડ રકમની ચોરી કરીને ફરાર થઈ ગયા હતા. આ ઘટનાને કારણે સ્થાનિક રહેવાસીઓમાં ભય અને ચિંતાનું વાતાવરણ છવાઈ ગયું છે.

દરવાજા અને તિજોરીના લોક તોડી લાખોની મતા ચોરી

પ્રાપ્ત વિગતો અનુસાર, તસ્કરોએ ખૂબ જ આયોજનબદ્ધ રીતે મકાનના મુખ્ય દરવાજાનું તેમજ અંદર રાખેલી લોખંડની તિજોરીનું લોક તોડી નાખ્યું હતું. તિજોરીમાં રાખેલા કિંમતી સોના-ચાંદીના દાગીના અને રોકડ રકમ પર તસ્કરોએ હાથ સાફ કરી લીધો હતો. તહેવારો કે સામાન્ય દિવસોમાં પણ વધતી જતી ચોરીની ઘટનાઓથી લોકોની સુરક્ષા સામે સવાલો ઉભા થઈ રહ્યા છે.

CCTV ફૂટેજમાં શંકાસ્પદ તસ્કરોની હિલચાલ કેદ

ઘટનાની જાણ થતા જ આસપાસના વિસ્તારમાં દોડધામ મચી ગઈ હતી. આસપાસના મકાનોમાં લગાવવામાં આવેલા સીસીટીવી ફૂટેજ તપાસવામાં આવતા તેમાં શંકાસ્પદ તસ્કરોની હિલચાલ સ્પષ્ટપણે કેદ થયેલી જોવા મળી છે. સીસીટીવી ફૂટેજના આધારે તસ્કરોની ઓળખ કરવા માટેના પ્રયાસો તેજ કરવામાં આવ્યા છે.

આંકલાવ પોલીસનો કાફલો ઘટના સ્થળે અને સઘન તપાસ શરૂ

ચોરીની આ ગંભીર ઘટનાની જાણ થતાં જ આંકલાવ પોલીસ સ્ટેશનનો કાફલો ત્વરિત ઘટના સ્થળે દોડી આવ્યો હતો. પોલીસે ઘટના સ્થળે પહોંચીને પ્રાથમિક પુરાવા એકત્ર કરવાની કવાયત હાથ ધરી છે, અને ફિંગરપ્રિન્ટ એક્સપર્ટની મદદ પણ લેવામાં આવી રહી છે. સીસીટીવી ફૂટેજ અને બાતમીદારોના આધારે તસ્કરોને ઝડપી પાડવા માટે પોલીસે ચક્રો ગતિમાન કર્યા છે.

આ પણ વાંચો: Khambhat : 12 ગુનામાં વોન્ટેડ કુખ્યાત આરોપી આશીફ રૂપાલ હથિયાર સાથે આખરે ઝડપાયો