દક્ષિણ આફ્રિકા અને ઓસ્ટ્રેલિયા વચ્ચેની ટેસ્ટ શ્રેણી હવે નિર્ણાયક તબક્કામાં પહોંચી ગઈ છે. 3 ટેસ્ટની શ્રેણી 1-1થી બરાબર થયા બાદ દક્ષિણ આફ્રિકાએ કેપટાઉનના ન્યૂલેન્ડ્સ ખાતે રમાનારી ત્રીજી અને અંતિમ ટેસ્ટ માટે પોતાની પ્લેઇંગ ઇલેવન જાહેર કરી છે. કેપ્ટન ટેમ્બા બાવુમાની આગેવાની હેઠળની ટીમમાં માત્ર એક ફેરફાર કરવામાં આવ્યો છે. ઈજાના કારણે એનરિક નોર્ખિયા બહાર થયો છે, જ્યારે તેની જગ્યાએ ઝડપી બોલર ગેરાલ્ડ કોએત્ઝીને તક આપવામાં આવી છે. આ મુકાબલો 27થી 31 ઑક્ટોબર દરમિયાન રમાશે. બંને ટીમો માટે આ માત્ર એક ટેસ્ટ નહીં, પરંતુ શ્રેણી જીતવાની નિર્ણાયક તક છે.
નોર્ખિયાની ઈજાથી કોએત્ઝી માટે તક
બીજી ટેસ્ટ દરમિયાન એનરિક નોર્ખિયાને ગ્રોઇન ઈજા થઈ હતી. તે પ્રથમ ઇનિંગ્સમાં માત્ર 3.3 ઓવર ફેંક્યા બાદ મેદાનની બહાર ગયો હતો અને ત્યારબાદ મેચમાં બોલિંગ કરી શક્યો નહોતો. હવે તે નિર્ણાયક ટેસ્ટમાંથી બહાર થઈ ગયો છે. તેના સ્થાને ગેરાલ્ડ કોએત્ઝીને સામેલ કરવામાં આવ્યો છે. કોએત્ઝી લગભગ 2 વર્ષ બાદ ટેસ્ટ ક્રિકેટમાં વાપસી કરશે. તેની ઝડપી બોલિંગ અને આક્રમક અભિગમ દક્ષિણ આફ્રિકાના બોલિંગ આક્રમણને નવી ધાર આપી શકે છે. જોકે, લાંબા સમય બાદ ટેસ્ટ રમવાનો હોવાથી તેના પ્રદર્શન પર પણ નજર રહેશે.
દક્ષિણ આફ્રિકાની પ્લેઇંગ ઇલેવન
દક્ષિણ આફ્રિકાની ટીમમાં એડન માર્કરમ, માર્ક્સ એકરમેન, ડેવિડ બેડિંગહામ, ટેમ્બા બાવુમા (કેપ્ટન), મેથ્યુ બ્રીટ્ઝકે, રાયન રિકલ્ટન (વિકેટકીપર), વિઆન મુલ્ડર, માર્કો યાનસેન, સિમોન હાર્મર, ગેરાલ્ડ કોએત્ઝી અને કાગિસો રબાડાનો સમાવેશ થાય છે.
ટીમે બીજી ટેસ્ટ જીતનાર મોટાભાગના ખેલાડીઓ પર વિશ્વાસ જાળવી રાખ્યો છે. ખાસ વાત એ છે કે સ્પિનર કેશવ મહારાજને પ્લેઇંગ ઇલેવનમાં સ્થાન મળ્યું નથી અને સિમોન હાર્મર મુખ્ય સ્પિન વિકલ્પ તરીકે રમશે. ઓસ્ટ્રેલિયાના ટોચના ક્રમમાં ડાબોડી બેટરોની સંખ્યાને ધ્યાનમાં રાખીને હાર્મરની ઓફ-સ્પિન ઉપયોગી સાબિત થઈ શકે છે.
શ્રેણી કેવી રીતે પહોંચી નિર્ણાયક મુકાબલા સુધી?
પ્રથમ ટેસ્ટમાં ઓસ્ટ્રેલિયાએ ડરબનમાં દક્ષિણ આફ્રિકાને 214 રનથી હરાવીને શ્રેણીમાં 1-0ની સરસાઈ મેળવી હતી. પરંતુ બીજી ટેસ્ટમાં દક્ષિણ આફ્રિકાએ જોરદાર વાપસી કરતાં ઓસ્ટ્રેલિયાને એક ઇનિંગ્સ અને 31 રનથી હરાવ્યું હતું. આ જીત સાથે શ્રેણી 1-1થી બરાબર થઈ ગઈ. હવે ત્રીજી ટેસ્ટમાં જીતનારી ટીમ શ્રેણી પોતાના નામે કરશે.
આ પણ વાંચો: Suresh Rainaની મોટી ભવિષ્યવાણી, માત્ર આ બે દિગ્ગજો જ ભારતને જીતાડશે વર્લ્ડ કપ!