સર્બિયાની રાજધાની બેલગ્રેડમાં બુધવારે ઇઝરાયલી દૂતાવાસની બહાર એક સગીરે બે છરી લઈને પોલીસકર્મી પર હુમલો કરી દીધો. તેણે ‘અલ્લાહુ અકબર’ના નારા લગાવ્યા. જવાબમાં પોલીસકર્મીએ ગોળી ચલાવી, જેના કારણે હુમલાખોરનું મોત થયું. ઘટનાના પગલે સર્બિયામાં સુરક્ષાનું સ્તર વધારીને રેડ કરી દેવામાં આવ્યું, જે દેશમાં ખતરાનું સૌથી ઊંચું સ્તર છે. હુમલાખોર ISISનો સમર્થક હોવાની આશંકા સર્બિયાના કાર્યકારી ગૃહમંત્રી ઇવિકા ડાચિચે જણાવ્યું કે હુમલામાં પોલીસકર્મીના માથા પર સામાન્ય ઈજા થઈ છે. તેમણે કહ્યું કે ઘટના બાદ મહત્વપૂર્ણ સ્થળોએ પોલીસની તૈનાતી વધારવામાં આવશે. AP મુજબ, સુરક્ષા એજન્સીઓ પહેલેથી જ હુમલાખોર પર નજર રાખી રહી હતી. તેના પર આતંકવાદી સંગઠન ઇસ્લામિક સ્ટેટ (ISIS)નો સમર્થક હોવાની શંકા હતી. આરોપ છે કે તેણે પોતાના ઇન્સ્ટાગ્રામ અકાઉન્ટ પર ISISનો કાળો ધ્વજ પણ દર્શાવ્યો હતો. અધિકારીઓએ આ ઘટનાની તપાસ આતંકવાદી હુમલા તરીકે શરૂ કરી છે. ગૃહમંત્રીના જણાવ્યા અનુસાર, હુમલાખોર સગીર હતો અને તેની ઓળખ હજુ સુધી થઈ શકી નથી. બે વર્ષમાં બીજી વખત દૂતાવાસની બહાર હુમલો બેલગ્રેડમાં ઇઝરાયલી દૂતાવાસની બહાર સુરક્ષા કર્મચારીઓ પર હુમલાની આ બે વર્ષમાં બનેલી બીજી ઘટના છે. આ પહેલાં જૂન 2024માં એક હુમલાખોરે ક્રોસબો એટલે કે તીર ચલાવવાના હથિયારથી સર્બિયાના પોલીસ અધિકારીની ગરદન પર હુમલો કર્યો હતો. ઇઝરાયલનું દૂતાવાસ બેલગ્રેડના એક મોંઘા વિસ્તારમાં આવેલું છે. તેની નજીક જ અમેરિકાનું દૂતાવાસ પણ છે. ઇઝરાયલી દૂતાવાસની સુરક્ષા માટે પોલીસની એક વિશેષ યુનિટ તહેનાત રહે છે. તેના જવાનો પાસે આપોઆપ ચાલતી બંદૂકો હોય છે. સર્બિયામાં ચૂંટણી બાદ હજુ નવી સરકાર બની નથી સર્બિયામાં રવિવારે સંસદીય ચૂંટણી યોજાઈ હતી. લગભગ બે વર્ષથી ચાલી રહેલા વિરોધ પ્રદર્શનો બાદ યુવાનોના નેતૃત્વવાળા આંદોલને ભૂતપૂર્વ રાષ્ટ્રપતિ અલેક્ઝાન્ડર વુચિચના જૂથને હરાવી દીધું. જોકે, હજુ નવી સરકાર બની નથી. આવી સ્થિતિમાં વુચિચ અને તેમના સહયોગીઓનું પોલીસ પર નિયંત્રણ યથાવત્ છે. 40 દિવસ પહેલાં બનેલી પાર્ટી, જીતનારાઓમાં એક પણ વિદ્યાર્થી નહીં વિદ્યાર્થી ગઠબંધન ‘સ્ટુડન્ટ લિસ્ટ, સ્ટુડન્ટ્સ વિન’ પાર્ટીને ચૂંટણીના માત્ર 40 દિવસ પહેલાં જ માન્યતા મળી હતી. તેમ છતાં પાર્ટીએ જીત મેળવી. જોકે, જીતેલા 141 ઉમેદવારોમાં એક પણ વિદ્યાર્થી નથી. પાર્ટીએ વિદ્યાર્થીઓને બદલે રમતવીરો, ખેડૂતો અને સામાન્ય લોકોને ચૂંટણી મેદાનમાં ઉતાર્યા હતા. આ ઉમેદવારોની પસંદગી વિદ્યાર્થીઓએ પોતે કરી હતી. ચૂંટણી લડવા માટે જરૂરી નાણાં એકત્રિત કરવા વિદ્યાર્થીઓએ ક્રાઉડફન્ડિંગનો સહારો લીધો. પાર્ટીના વિજેતા ઉમેદવારોમાંથી લગભગ 65% પાસે ડોક્ટરેટ અથવા તેનાથી મોટી ડિગ્રી છે.