રમતગમત જગતમાંથી ભારત માટે એક અત્યંત ગૌરવપૂર્ણ અને ઐતિહાસિક સમાચાર સામે આવ્યા છે. ભારતીય મહિલા કુસ્તીબાજ મનીષા ભાનવાલાએ કઝાકિસ્તાનના અસ્તાનામાં યોજાયેલી વર્લ્ડ રેસલિંગ ચેમ્પિયનશિપમાં સુવર્ણચંદ્રક જીતીને નવો ઇતિહાસ રચી દીધો છે. 59 કિલોગ્રામ વજન વર્ગમાં ગોલ્ડ મેડલ જીતવાની સાથે જ મનીષા વિશ્વ ચેમ્પિયન બનનારી પ્રથમ ભારતીય મહિલા પહેલવાન બની ગઈ છે.

ફાઇનલમાં હારી ગયેલી બાજી કેવી રીતે જીતી?

ગોલ્ડ મેડલ માટેનો ફાઇનલ મુકાબલો શ્વાસ અધ્ધર કરી દે તેવો હતો. અમેરિકાની શક્તિશાળી ખેલાડી એબિગેલ નેટ સામે મનીષાની શરૂઆત અત્યંત નબળી રહી હતી. એક સમયે તે મુકાબલામાં 0-6 થી પાછળ ધકેલાઈ ગઈ હતી અને લાગતું હતું કે ગોલ્ડ મેડલ હાથમાંથી સરકી જશે. પરંતુ ત્યારબાદ મનીષાએ એવી જબરદસ્ત વાપસી કરી કે આખું સ્ટેડિયમ જોતું જ રહી ગયું. તેણે સળંગ પોઈન્ટ્સ મેળવીને આ મુકાબલો 8-6 થી પોતાના નામે કરી લીધો અને ભારતને ઐતિહાસિક ગોલ્ડ અપાવ્યો.

સુશીલ કુમારની ક્લબમાં સામેલ થઈ મનીષા

વિશ્વ કુસ્તીના મંચ પર ભારત માટે આ ક્ષણ સુવર્ણ અક્ષરે લખાશે. અગાઉ વર્ષ 2010માં દિગ્ગજ ભારતીય પહેલવાન સુશીલ કુમારે 66 કિલોગ્રામ વજન વર્ગમાં વિશ્વ ચેમ્પિયન બનીને ઈતિહાસ રચ્યો હતો. હવે 16 વર્ષ બાદ મનીષા ભાનવાલાએ આ જબરદસ્ત સિદ્ધિનું પુનરાવર્તન કરીને મહિલા કુસ્તીને એક નવી જ ઊંચાઈ પર પહોંચાડી દીધી છે.

ફિટનેસ માટે શરૂ કરેલી કુસ્તી બની ગઈ જિંદગી

મનીષાની આ સફર કોઈ ફિલ્મી કહાનીથી કમ નથી. વર્ષ 2013માં તેના પિતા સુરેશ ભાનવાલાએ દીકરી શારીરિક રીતે મજબૂત બને તે હેતુથી તેને ફિટનેસ માટે કુસ્તીના અખાડામાં મોકલી હતી. પરંતુ ધીમે ધીમે મનીષાને પોતાની અંદર છુપાયેલી પ્રતિભાનો અહેસાસ થયો અને તેણે આ રમતને જ પોતાનું કરિયર બનાવી લીધું.

એશિયન ગેમ્સની નિરાશાને બનાવી પોતાની તાકાત

તાજેતરમાં એશિયન ગેમ્સ 2026માં ક્વાર્ટર ફાઇનલમાં જાપાનની ખેલાડી સામે હાર્યા બાદ મનીષા અત્યંત નિરાશ હતી. પરંતુ તે હારથી તૂટી જવાના બદલે તેણે પોતાની બમણી તાકાત વર્લ્ડ ચેમ્પિયનશિપમાં લગાવી દીધી.0-6 થી પાછળ રહ્યા બાદ પણ જીત મેળવવી એ સાબિત કરે છે કે મનીષા શારીરિક કરતા પણ વધુ માનસિક રીતે કેટલી મજબૂત છે. મનીષાની આ કહાની દેશની લાખો દીકરીઓ માટે એક મોટી પ્રેરણા છે.મનીષા ભાનવાલાની આ ઐતિહાસિક સિદ્ધિ પર તમારું શું કહેવું છે? કોમેન્ટ કરીને ભારતની આ દીકરીને અભિનંદન જરૂર પાઠવો.

પિતાની છત્રછાયા ગુમાવી, છતાં હિંમત ન હારી

મનીષાની આ સફળતા પાછળ અનેક દર્દ અને બલિદાન છુપાયેલા છે. વર્ષ 2022માં જ્યારે તે એશિયન ચેમ્પિયનશિપ માટે જવાની તૈયારી કરી રહી હતી, બરાબર તે જ સમયે તેના પિતાનું હૃદયરોગના હુમલાથી નિધન થયું. જે પિતાએ કુસ્તીમાં મોકલી હતી, તેમની જ છત્રછાયા ગુમાવવી મનીષા માટે મોટો આઘાત હતો. પરંતુ તેણે પિતાના સપનાને પૂરું કરવા આંસુ લૂછીને અખાડામાં મહેનત ચાલુ રાખી.

આ પણ વાંચો –Ahmedabad 2036 Olympics: સંસદમાં રજૂ થશે નવો કડક એન્ટી-ડોપિંગ કાયદો