ગુજરાતના હીરા અને ટેક્સટાઇલ હબ સમાન સુરત શહેરમાં દિવાળીના તહેવારો દરમિયાન કોઈ અનીચ્છનીય બનાવ ન બને અને કાયદો-વ્યવસ્થા જળવાઈ રહે તે માટે પોલીસ તંત્ર અત્યારથી જ પૂરતી તૈયારીઓ સાથે મેદાને ઉતર્યું છે. શહેરના સુરક્ષાદાયક માહોલને બગાડવા માંગતા તત્વો પર અંકુશ મેળવવા માટે સુરત SOG (સ્પેશિયલ ઓપરેશન ગ્રુપ) દ્વારા શહેરની તમામ મુખ્ય સિક્યુરિટી એજન્સીઓના સંચાલકો સાથે એક ઉચ્ચ સ્તરીય બેઠક યોજવામાં આવી હતી. આ બેઠકનો મુખ્ય ઉદ્દેશ્ય તહેવારોની સિઝનમાં વધતી ચોરી, ઘરફોડ ચોરી અને લૂંટફાટની ઘટનાઓને સંપૂર્ણપણે અટકાવવાનો છે.

સોસાયટીઓમાં રાત્રિ સિક્યુરિટી ગાર્ડ ફરજિયાત

આ બેઠક દરમિયાન પોલીસ અધિકારીઓ દ્વારા સુરક્ષા એજન્સીઓ અને સોસાયટીના હોદ્દેદારોને કેટલીક અત્યંત મહત્વપૂર્ણ અને કડક સૂચનાઓ આપવામાં આવી છે. ખાસ કરીને રેસિડેન્શિયલ સોસાયટીઓમાં સુરક્ષાનું સ્તર ઊંચું લાવવા માટે રાત્રિના સમયે સિક્યુરિટી ગાર્ડ ફરજિયાત રાખવા સૂચન કરાયું છે. આ ઉપરાંત, સોસાયટીના તમામ મુખ્ય પ્રવેશદ્વારો અને અંદરના વિસ્તારોમાં CCTV કેમેરા કાર્યરત રાખવા અને તે લગાવવાની તાકીદ કરવામાં આવી છે. સોસાયટીઓમાં કામ કરતા કે નવા આવતા તમામ સિક્યુરિટી ગાર્ડ્સનો પૂરેપૂરો ડેટા એકત્ર કરવા તથા તેમની પૃષ્ઠભૂમિ ચકાસવા પર પણ વિશેષ ભાર મૂકવામાં આવ્યો છે.

નાગરિકોને સાવચેત રહેવા પોલીસની અપીલ

તહેવારો ટાણે શહેરમાં બહારથી આવતા શંકાસ્પદ ઇસમો પર બાજ નજર રાખવા માટે પોલીસ દ્વારા સૂચવવામાં આવ્યું છે કે કોઈપણ અજાણ્યા કે શંકાસ્પદ વ્યક્તિની યોગ્ય પૂછપરછ અને નોંધ કર્યા પછી જ તેને સોસાયટી કેરેસિમર વિસ્તારમાં પ્રવેશ આપવો. સુરત પોલીસ દ્વારા નાગરિકોને પણ અપીલ કરવામાં આવી છે કે તેઓ પોતાના ઘરની સુરક્ષા બાબતે જાગૃત રહે અને લાંબી રજાઓમાં બહારગામ જતા પહેલા સ્થાનિક પોલીસ સ્ટેશન કે સોસાયટીના આગેવાનોને જાણ કરે, જેથી સંયુક્ત સહકારથી સુરક્ષિત વાતાવરણ પૂરું પાડી શકાય.

આ પણ વાંચો : Ahmedabad News : ‘સરદાર પટેલ રત્ન એવોર્ડ એ વ્યક્તિગત સન્માન નહીં, પણ આદર્શો પ્રત્યેની મોટી જવાબદારી…