ભારત-A અને ન્યૂઝીલેન્ડ-A વચ્ચે ક્રાઇસ્ટચર્ચમાં 4 દિવસીય બીજી ટેસ્ટ મેચ રમાઈ રહી છે. લાલ બોલની આ મેચમાં પ્રથમ બેટિંગ કરવા ઉતરેલી ઈન્ડિયા-Aની ટીમે પ્રથમ દાવમાં 346 રનનો મજબૂત સ્કોર નોંધાવ્યો છે. એક સમયે ભારતીય ટીમ મુશ્કેલીમાં જોવા મળી રહી હતી, પરંતુ કેપ્ટન ધ્રુવ જુરેલ અને નીચેના ક્રમના બેટ્સમેન આકાશ દીપે શાનદાર બેટિંગ કરીને ટીમને મુશ્કેલીમાંથી બહાર કાઢી હતી. ધ્રુવ જુરેલે મુશ્કેલ પરિસ્થિતિમાં સદી ફટકારીને માત્ર દાવને સંભાળ્યો જ નહીં, પરંતુ 4 કલાકની બેટિંગથી મેચનું ચિત્ર પણ બદલી નાખ્યું હતું. બીજી તરફ આકાશ દીપે પણ પોતાની ફર્સ્ટ ક્લાસ કારકિર્દીનો સર્વશ્રેષ્ઠ સ્કોર નોંધાવ્યો હતો.
ધ્રુવ જુરેલે ફર્સ્ટ ક્લાસ કારકિર્દીની 8મી સદી ફટકારી
મેચના બીજા દિવસે ધ્રુવ જુરેલે પોતાની સદી પૂરી કરી હતી. પ્રથમ દિવસની રમતના અંતે તે 99 રન બનાવીને અણનમ રહ્યો હતો. બીજા દિવસે મેદાનમાં ઉતરતાની સાથે જ તેણે પોતાનો 1 રન પૂરો કરીને સદી નોંધાવી હતી.ઈન્ડિયા-Aના કેપ્ટન ધ્રુવ જુરેલે 171 બોલમાં 105 રનની મહત્વપૂર્ણ ઇનિંગ રમી હતી. આ દરમિયાન તેના બેટમાંથી 11 ચોગ્ગા અને 3 છગ્ગા આવ્યા હતા. ફર્સ્ટ ક્લાસ ક્રિકેટમાં આ તેની 8મી સદી છે. મુશ્કેલ સમયે રમાયેલી આ ઇનિંગ ભારતીય ટીમ માટે ખૂબ જ મહત્વપૂર્ણ સાબિત થઈ હતી.
4 કલાકની બેટિંગથી મેચનું ચિત્ર બદલી નાખ્યું
ધ્રુવ જુરેલની આ ઇનિંગની સૌથી ખાસ વાત તેની ધીરજ અને ક્રિઝ પર વિતાવેલો સમય હતો. તેણે કુલ 4 કલાક અને 7 મિનિટ સુધી બેટિંગ કરીને 105 રન બનાવ્યા હતા.જ્યારે ધ્રુવ જુરેલ બેટિંગ કરવા આવ્યો ત્યારે ઈન્ડિયા-Aની સ્થિતિ સારી નહોતી. ટીમે માત્ર 137 રનમાં 5 વિકેટ ગુમાવી દીધી હતી. એક સમયે ભારતીય ટીમ માટે 200 રન સુધી પહોંચવું પણ મુશ્કેલ લાગી રહ્યું હતું.આવી પરિસ્થિતિમાં ધ્રુવ જુરેલે એક છેડો મજબૂત રીતે સંભાળ્યો હતો. તેણે પહેલા માનવ સુથાર સાથે અને ત્યારબાદ આકાશ દીપ સાથે મહત્વપૂર્ણ ભાગીદારી કરીને ટીમને મજબૂત સ્થિતિમાં પહોંચાડી હતી.
માનવ સુથાર અને આકાશ દીપ સાથે કરી મહત્વપૂર્ણ ભાગીદારી
ધ્રુવ જુરેલે સાતમી વિકેટ માટે માનવ સુથાર સાથે 97 બોલમાં 62 રનની ભાગીદારી કરી હતી. આ ભાગીદારીમાં જુરેલે 51 બોલમાં 39 રનનું યોગદાન આપ્યું હતું. માનવ સુથારની વિકેટ પડ્યા બાદ પણ જુરેલે પોતાની બેટિંગ ચાલુ રાખી હતી.ત્યારબાદ તેણે આકાશ દીપ સાથે આઠમી વિકેટ માટે 142 બોલમાં 75 રનની મહત્વપૂર્ણ ભાગીદારી કરી હતી. આ ભાગીદારીમાં ધ્રુવ જુરેલે 70 બોલમાં 49 રન બનાવ્યા હતા. આ બંને ભાગીદારીએ ઈન્ડિયા-Aને 300 રનનો આંકડો પાર કરવામાં મોટી મદદ કરી હતી.
આકાશ દીપે ફર્સ્ટ ક્લાસ કારકિર્દીનો સર્વશ્રેષ્ઠ સ્કોર બનાવ્યો
ધ્રુવ જુરેલની સદીની સાથે આકાશ દીપની બેટિંગ પણ આ મેચનું મુખ્ય આકર્ષણ બની હતી. તેણે 9મા ક્રમે બેટિંગ કરવા ઉતરીને ન્યૂઝીલેન્ડ-Aના બોલરોનો મક્કમતાથી સામનો કર્યો હતો.આકાશ દીપે 116 બોલમાં 68 રનની શાનદાર ઇનિંગ રમી હતી. આ દરમિયાન તેણે 10 ચોગ્ગા અને 2 છગ્ગા ફટકાર્યા હતા. આ તેની ફર્સ્ટ ક્લાસ કારકિર્દીનો અત્યાર સુધીનો સૌથી મોટો વ્યક્તિગત સ્કોર છે. આ પહેલાં લાલ બોલની ક્રિકેટમાં તેનો સર્વશ્રેષ્ઠ સ્કોર 66 રન હતો.આ રીતે ધ્રુવ જુરેલની સદી અને આકાશ દીપની કારકિર્દીની શ્રેષ્ઠ ઇનિંગના આધારે ઈન્ડિયા-Aએ પ્રથમ દાવમાં 346 રન બનાવીને ન્યૂઝીલેન્ડ-A સામે મજબૂત પડકાર ઊભો કર્યો છે.
આ પણ વાંચો – IND vs NZ 5th T20I : હેમિલ્ટનમાં આજે ભારત અને ન્યૂઝીલેન્ડ વચ્ચે ટક્કર,કોણ મારશે બાજી?