ભારત અને ન્યૂઝીલેન્ડ વચ્ચે રમાઈ રહેલી 5 મેચની T20 શ્રેણી હવે અંતિમ તબક્કામાં પહોંચી ગઈ છે. આજે હેમિલ્ટનના સેડન પાર્ક ખાતે બંને ટીમો વચ્ચે શ્રેણીની પાંચમી અને અંતિમ T20 મેચ રમાશે. ભારતીય ટીમે શ્રેણી પહેલેથી જ પોતાના નામે કરી લીધી છે. જોકે, અંતિમ મેચમાં બંને ટીમો જીત સાથે શ્રેણીનો અંત લાવવા મેદાનમાં ઉતરશે. આ મેચમાં ફરી એકવાર ચોગ્ગા અને છગ્ગાનો વરસાદ જોવા મળી શકે છે.

વૈભવ સૂર્યવંશી અને કુલદીપ યાદવને મળી શકે છે તક

શ્રેણીની છેલ્લી મેચમાં ભારતીય ટીમ પોતાની પ્લેઇંગ-11માં કેટલાક ફેરફાર કરી શકે છે. ખાસ કરીને 15 વર્ષના યુવા બેટ્સમેન વૈભવ સૂર્યવંશીને ફરી એકવાર અંતિમ ઇલેવનમાં સામેલ કરવાની ચર્ચા ચાલી રહી છે. આ ઉપરાંત ચાઇનામેન સ્પિનર કુલદીપ યાદવને પણ રમવાની તક મળી શકે છે.જોકે, ભારતીય ટીમના સંભવિત ફેરફાર અંગે હજુ સુધી સત્તાવાર જાહેરાત કરવામાં આવી નથી. શ્રેણી જીતી ચૂકેલી ટીમ મેનેજમેન્ટ અંતિમ મેચમાં નવા ખેલાડીઓને તક આપીને તેમની ક્ષમતા ચકાસી શકે છે.

ભારતીય ટીમના નામે શરમજનક રેકોર્ડ

વર્ષ 2026માં ભારતીય ટીમે T20 ક્રિકેટમાં એક અનિચ્છનીય રેકોર્ડ પણ પોતાના નામે કર્યો છે. ભારતે આ વર્ષે રમેલી 39 મેચમાંથી 11 વખત 200થી વધુ રન આપ્યા છે. T20 ક્રિકેટના ઇતિહાસમાં એક જ કેલેન્ડર વર્ષમાં કોઈ ટીમ દ્વારા સૌથી વધુ વખત 200થી વધુ રન આપવાનો આ રેકોર્ડ છે.

ગ્લેન ફિલિપ્સે ભારતીય બોલરોને આપ્યો પડકાર

બીજી તરફ ન્યૂઝીલેન્ડના સ્ટાર બેટ્સમેન ગ્લેન ફિલિપ્સ આ શ્રેણીમાં શાનદાર ફોર્મમાં જોવા મળ્યા છે. તેમણે અત્યાર સુધી 4 મેચમાં 276 રન બનાવ્યા છે. આ દરમિયાન તેમના બેટમાંથી 2 અડધી સદી અને 1 સદી પણ જોવા મળી છે. આ પ્રદર્શન સાથે ફિલિપ્સ ભારત સામેની એક T20 શ્રેણીમાં સૌથી વધુ રન બનાવનારા બેટ્સમેન બની ગયા છે.

સેડન પાર્કની પીચ બેટ્સમેનોને મદદરૂપ થશે

હેમિલ્ટનના સેડન પાર્કની પીચ સામાન્ય રીતે બેટ્સમેનો માટે અનુકૂળ માનવામાં આવે છે. અહીંની સપાટ પીચ પર બેટ્સમેનોને મોટા શોટ રમવામાં સરળતા રહે છે. મેદાનની નાની બાઉન્ડ્રી પણ ચોગ્ગા અને છગ્ગા ફટકારવામાં મદદરૂપ બને છે.મેચ દરમિયાન ઝાકળની અસર પણ જોવા મળી શકે છે. ખાસ કરીને બીજી ઇનિંગમાં બોલિંગ કરવી મુશ્કેલ બની શકે છે. આવી સ્થિતિમાં ટોસ જીતનારી ટીમ પહેલાં બોલિંગ કરવાનું પસંદ કરી શકે છે. આ શ્રેણીમાં ભારતીય કેપ્ટન શ્રેયસ ઐયરે પણ મોટાભાગે ટોસ જીતીને પહેલાં બોલિંગ કરવાનો નિર્ણય લીધો છે.

કોણ જીતશે પાંચમી T20 મેચ?

પાંચમી T20 મેચમાં બંને ટીમો વચ્ચે રસાકસીભર્યો મુકાબલો જોવા મળી શકે છે. ચોથી મેચમાં ન્યૂઝીલેન્ડે જીત મેળવી હતી, પરંતુ અંતિમ મેચમાં ભારતીય ટીમનું પલડું થોડું ભારે માનવામાં આવે છે. સંભવિત જીતની ટકાવારી ભારતની તરફેણમાં 60 અને ન્યૂઝીલેન્ડની તરફેણમાં 40 માનવામાં આવી રહી છે. બીજી ઇનિંગમાં બેટિંગ કરનારી ટીમને ઝાકળનો ફાયદો મળી શકે છે.

ભારતની સંભવિત પ્લેઇંગ-11

અભિષેક શર્મા, સંજુ સેમસન/વૈભવ સૂર્યવંશી, ઈશાન કિશન (વિકેટકીપર), શ્રેયસ ઐયર (કેપ્ટન), તિલક વર્મા, અક્ષર પટેલ, નીતિશ કુમાર રેડ્ડી/શિવમ દુબે, નમન ધીર, અર્શદીપ સિંહ, પ્રિન્સ યાદવ/ભુવનેશ્વર કુમાર અને મયંક યાદવ.

ન્યૂઝીલેન્ડની સંભવિત પ્લેઇંગ-11

ટિમ સેફર્ટ (વિકેટકીપર), ફિન એલન, ડેરિલ મિચેલ, ગ્લેન ફિલિપ્સ, બેવન જેકોબ્સ, માઇકલ બ્રેસવેલ, મિચેલ સેન્ટનર (કેપ્ટન), નાથન સ્મિથ, એડમ મિલ્ને, જેકબ ડફી અને મેથ્યુ ફિશર.

આ પણ વાંચો – PAK VS SL: પાકિસ્તાને શ્રીલંકાને હરાવી ODI ટ્રાઇ-સિરીઝનો ખિતાબ જીત્યો