ગુજરાતના સૌથી મોટા ઔદ્યોગિક હબ ગણાતા ભરૂચ જિલ્લાના અંકલેશ્વર GIDC વિસ્તારમાંથી એક અત્યંત ચોંકાવનારી અને કરોડો રૂપિયાની કૌભાંડ સમાન ઘટના સામે આવી છે. અંકલેશ્વરથી હજીરા પોર્ટ પર મોકલવામાં આવતો કંપનીનો અત્યંત કિંમતી એવો 16,500 કિલોગ્રામ (16.5 ટન) પિગમેન્ટ પાવડરનો જથ્થો રહસ્યમય સંજોગોમાં ગાયબ થઈ ગયો છે. બજારમાં આ ચોરાયેલા માલની અંદાજિત કિંમત રૂ. 1.12 કરોડ જેટલી થાય છે. આટલી મોટી રકમનો માલ ગાયબ થવાની ઘટનાથી ઉદ્યોગ જગતમાં અને વેપારીઓમાં ભારે હડકંપ મચી ગયો છે.

કન્ટેનરનું સીલ તોડી અસલ માલ કાઢી રેતી-માટી ભરી દીધાની આશંકા

પ્રાપ્ત વિગતો અનુસાર, પિગમેન્ટ પાવડરની કુલ 44 જંબો બેગ્સ કન્ટેનરમાં ભરીને સુરક્ષિત રીતે રવાના કરવામાં આવી હતી. પરંતુ જ્યારે માલ ગંતવ્ય સ્થાને પહોંચ્યો ત્યારે જે હકીકત સામે આવી તેણે સૌને ચોંકાવી દીધા. તસ્કરો કે ભેળસેળ કરનારાઓએ ચતુરાઈપૂર્વક કન્ટેનરનું સીલ તોડી નાખ્યું હતું અને અંદરથી અસલ કિંમતી પાવડર બહાર કાઢી લીધો હતો. તેના બદલે કન્ટેનરમાં રેતી અને માટી ભરી દીધી હોવાની પ્રબળ આશંકા વ્યક્ત કરવામાં આવી રહી છે, જેથી વજનમાં કોઈ તફાવત ન પડે અને ચોરી પકડાઈ ન શકે.

અંકલેશ્વર GIDC પોલીસે ગુનો નોંધી સઘન તપાસ હાથ ધરી

આ સમગ્ર ગોટાળા અને ચોરીના કેસમાં પ્રાથમિક રીતે ટ્રકચાલક સામે સીધી શંકા વ્યક્ત કરવામાં આવી રહી છે. ઘટના અંગે જાણ થતા જ કંપનીના સંચાલકો દ્વારા તુરંત જ પોલીસનો સંપર્ક કરવામાં આવ્યો હતો. અંકલેશ્વર GIDC પોલીસ સ્ટેશનમાં આ મામલે સત્તાવાર રીતે ગુનો દાખલ કરવામાં આવ્યો છે. પોલીસે રૂા. 1.12 કરોડના આ માલની હેરાફેરી કરનાર શંકાસ્પદ ટ્રકચાલકની શોધખોળ હાથ ધરી છે તેમજ આ માર્ગ પરના ટોલનાકા અને સીસીટીવી ફૂટેજના આધારે તપાસના ચક્રો ગતિમાન કર્યા છે.

આ પણ વાંચો : Ahmedabadના ગોતામાં ભેખડ ધરાશાયી થવા મામલે AMC એસ્ટેટ ઓફિસરનું નિવેદન, સ્વીકાર્યું કે વગર પ્લાને ચાલતું હતું ખોદકામ