વનરક્ષક અને વનપાલ કર્મચારીઓના આંદોલનના પાંચમા દિવસે 250થી વધુ કર્મચારીઓએ રક્તદાન કર્યું. સુરેન્દ્રનગર જિલ્લાના 27 કર્મચારીઓ પણ આ કાર્યક્રમમાં જોડાયા હતા.કર્મચારીઓએ પડતર પ્રશ્નો અને માગણીઓના ઉકેલ માટે આંદોલન શરૂ કર્યું છે. રક્તદાન કાર્યક્રમ દ્વારા તેમણે આંદોલન સાથે સમાજસેવાનો સંદેશ પણ આપ્યો હતો. ગુજરાત રાજ્ય કર્મચારી મહામંડળના પ્રમુખ સતિષભાઈ પટેલ અને મહામંત્રી ભરતભાઈ ચૌધરી કાર્યક્રમમાં હાજર રહ્યા હતા. તેમણે કર્મચારીઓના પ્રશ્નો અને રજૂઆતો સાંભળી હતી.મહામંડળે વનરક્ષક કર્મચારી મંડળના આંદોલનને સૈદ્ધાંતિક, નૈતિક અને સંગઠનાત્મક સમર્થન આપ્યું છે. અન્ય કર્મચારી સંગઠનોએ પણ સમર્થન આપ્યું હોવાનું જણાવાયું હતું. લેખિત સમર્થન સોમવારે જાહેર કરાશે. મહામંડળના પ્રમુખ સતિષભાઈ પટેલે કહ્યું હતું કે કર્મચારીઓની માગણીઓના ઉકેલ માટે સોમવારે મંત્રી સાથે પ્રતિનિધિમંડળની હાજરીમાં ચર્ચા કરાશે.કર્મચારીઓએ તેમના પ્રશ્નોનો વહેલી તકે ઉકેલ આવે તેવી આશા વ્યક્ત કરી હતી. આંદોલન આગળ ચાલુ રાખવામાં આવશે.