દેશમાં ડિજિટલ પેમેન્ટ્સ અને UPI વ્યવહારો દરરોજ સફળતાના નવા શિખરો સર કરી રહ્યા છે. તહેવારોની મોસમ અને ગ્રાહકોની ખરીદીને કારણે ઓક્ટોબર મહિનામાં પહેલીવાર UPI વ્યવહારોનું સરેરાશ દૈનિક મૂલ્ય 1 લાખ કરોડને પાર પહોંચી ગયું છે. આખા ઓક્ટોબર મહિના દરમિયાન UPI દ્વારા કુલ 31.53 લાખ કરોડના ઐતિહાસિક વ્યવહારો નોંધાયા હતા.

સપ્ટેમ્બર અને મે મહિનાના જૂના રેકોર્ડ તૂટ્યા

આ પહેલા સપ્ટેમ્બર 2026 માં એક જ દિવસમાં 98,000 કરોડના વ્યવહારોનો રેકોર્ડ નોંધાયો હતો, જેને ઓક્ટોબરના આંકડાઓએ પાછળ છોડી દીધો છે. દેશના ઇતિહાસમાં કોઈપણ એક મહિનામાં UPI વ્યવહારોનો આંકડો 30 લાખ કરોડને વટાવી ગયો હોય તેવી આ પ્રથમ ઘટના છે. આ અગાઉ મે મહિનામાં 29.90 લાખ કરોડના સૌથી વધુ વ્યવહારો થવાનો રેકોર્ડ રહ્યો હતો.

ડિજિટલ પેમેન્ટ્સમાં 89% હિસ્સા સાથે 25.47 અબજ ટ્રાન્ઝેક્શન

ઓક્ટોબર મહિના દરમિયાન આ ડિજિટલ પેમેન્ટ પ્લેટફોર્મ પરથી કુલ 25.47 અબજ વ્યવહારો સફળતાપૂર્વક પ્રક્રિયા કરવામાં આવ્યા હતા, જે મુજબ પ્રતિદિન સરેરાશ 821 મિલિયન વ્યવહારો થવા જાય છે. હાલમાં ભારતમાં થતી કુલ ડિજિટલ ચૂકવણીઓમાં એકલું UPI જ 89 ટકાનો વિશાળ હિસ્સો ધરાવે છે.

દિવાળી સુધી UPI સંપૂર્ણપણે ફ્રી, MDR ચાર્જ મુલતવી

ગ્રાહકો અને વેપારીઓ માટે રાહતના સમાચાર એ છે કે દિવાળી સુધી UPI ચુકવણી સંપૂર્ણપણે મફત રહેશે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ પેમેન્ટ કંપનીઓ અને વેપારી સંસ્થાઓની વિનંતી બાદ MDR (Merchant Discount Rate) ચાર્જ વસૂલવાનો નિર્ણય મુલતવી રાખ્યો છે, જેથી તહેવારોની મોસમમાં ગ્રાહકો ખરીદી માટે ઉત્સાહિત રહે.

MDR ચાર્જ અને સોશિયલ મીડિયા પર વિરોધ

ઉલ્લેખનીય છે કે સપ્ટેમ્બર મહિનામાં 2,000 થી વધુના વ્યવહારો પર 0.40% MDR લાદવાની જાહેરાત કરવામાં આવી હતી અને વિવિધ ટ્રાન્ઝેક્શન અનુસાર અલગ-અલગ ફી પણ પ્રસ્તાવિત હતી, જેનાથી અંદાજે 15,000 કરોડની આવક થવાની અપેક્ષા રાખવામાં આવી હતી. જોકે, આ નિર્ણયનો સોશિયલ મીડિયા પર ભારે વિરોધ જોવા મળ્યો હતો. સ્પષ્ટતા મુજબ, પ્રસ્તાવિત યોજના હેઠળ સામાન્ય વ્યક્તિ-થી-વ્યક્તિ (P2P) UPI વ્યવહારો હંમેશાંની જેમ સંપૂર્ણપણે ફ્રી જ રહેશે.

આ પણ વાંચો : Oil PSU Profit: ઓઇલ કંપનીઓનો નફો છલકાયો! માત્ર 3 મહિનામાં ₹30,106 કરોડ છાપી લીધા !