પાકિસ્તાનના પૂર્વ ફાસ્ટ બોલર મોહમ્મદ આમિરના ઇન્ડિયન પ્રીમિયર લીગ (IPL)માં રમવા અંગે ક્રિકેટ જગતમાં ચર્ચા શરૂ થઈ હતી. અહેવાલો અનુસાર, બ્રિટિશ નાગરિકતા મેળવી ચૂકેલા આમિર IPL 2027ના મિની ઓક્શનમાં UKના ખેલાડી તરીકે નામ નોંધાવી શકે છે. જોકે, આ ચર્ચા વચ્ચે આમિરે પોતે જ સ્પષ્ટતા કરી છે કે IPL અંગે ચાલી રહેલા સમાચાર સાચા નથી.
સોશિયલ મીડિયા પર આમિરે શું કહ્યું?
34 વર્ષીય આમિરે 2 નવેમ્બરે સોશિયલ મીડિયા પ્લેટફોર્મ X પર પોસ્ટ કરીને IPLમાં ભાગ લેવાની અટકળોનું ખંડન કર્યું હતું. તેણે લખ્યું હતું કે, ““Hi everyone, just wanted to clarify that the news regarding IPL is not true.” ” આમિરની આ પોસ્ટ બાદ તેના IPLમાં પ્રવેશ અંગેની ચર્ચા પર હાલ પૂરતું પૂર્ણવિરામ મૂકાયું છે.
બ્રિટિશ પાસપોર્ટ મળ્યા બાદ શરૂ થઈ હતી ચર્ચા
આમિરને મે 2026માં બ્રિટિશ નાગરિકતા મળી હતી અને તેની પાસે UKનો પાસપોર્ટ છે. તે હાલમાં ઇંગ્લેન્ડમાં રહે છે. બ્રિટિશ નાગરિકતા મળ્યા બાદ તે ઇંગ્લેન્ડની કેટલીક સ્થાનિક T20 સ્પર્ધાઓમાં સ્થાનિક ખેલાડી તરીકે પણ રમી ચૂક્યો છે. આમિરના નામની ચર્ચા ત્યારે વધી જ્યારે તેણે અફઘાનિસ્તાન પ્રીમિયર લીગના ડ્રાફ્ટમાં UKના નાગરિક તરીકે નોંધણી કરાવી. 3 નવેમ્બરે દુબઈમાં યોજાનારા APL ડ્રાફ્ટ માટે તેને પ્લેટિનમ કેટેગરીમાં રાખવામાં આવ્યો છે. આ જ ઘટનાને આધારે અહેવાલોમાં અનુમાન લગાવવામાં આવ્યું હતું કે તે IPL 2027ના ઓક્શનમાં પણ બ્રિટિશ ખેલાડી તરીકે નામ નોંધાવી શકે છે.
IPLમાં પાકિસ્તાની ખેલાડીઓની ગેરહાજરી વચ્ચે ખાસ ચર્ચા
પાકિસ્તાની ખેલાડીઓએ IPLની પ્રથમ સિઝન એટલે કે 2008માં ભાગ લીધો હતો. પરંતુ ત્યારબાદ ભારત-પાકિસ્તાન વચ્ચેના રાજકીય તણાવને કારણે પાકિસ્તાની ખેલાડીઓ IPLમાં રમ્યા નથી. આમિરને બ્રિટિશ નાગરિકતા મળવાથી તેની સ્થિતિ અલગ બની શકે તેવી ચર્ચા હતી. અગાઉ પાકિસ્તાનમાં જન્મેલા અઝહર મહમૂદે બ્રિટિશ નાગરિક તરીકે IPLમાં ભાગ લીધો હતો. તે 2012થી 2015 દરમિયાન કિંગ્સ ઇલેવન પંજાબ અને કોલકાતા નાઇટ રાઇડર્સ તરફથી રમ્યો હતો.
IPLમાં રમવાનો નિર્ણય હજુ ચર્ચાનો વિષય
આમિરે ઓગસ્ટ 2026માં પણ IPLમાં રમવા અંગે કહ્યું હતું કે તે હજુ આ અંગે નિર્ણય પર પહોંચ્યો નથી. તેણે 2027થી પાકિસ્તાન સુપર લીગમાં વિદેશી ખેલાડી તરીકે રમવાની વાત કરી હતી. જોકે, હવે 2 નવેમ્બરે તેણે IPL અંગેના તાજેતરના અહેવાલોને ખોટા ગણાવ્યા છે. હાલની સ્થિતિએ આમિરનું APL ડ્રાફ્ટમાં UKના ખેલાડી તરીકે નામ નોંધાવવું એક હકીકત છે, પરંતુ IPL 2027ના ઓક્શનમાં નામ નોંધાવવાની વાતની તેણે સ્પષ્ટ ના પાડી છે.
આ પણ વાંચો: ‘હવે મહેનત શા માટે કરું?’ Sarfaraz Khanનો ટીમ ઇન્ડિયાની પસંદગી પર સવાલ