માલદીવના વિપક્ષી નેતા અબ્દુલ્લા શાહિદની સગીર સાથે જાતીય શોષણના આરોપમાં ધરપકડ કરવામાં આવી છે. તેઓ માલદીવિયન ડેમોક્રેટિક પાર્ટી (MDP)ના પ્રમુખ છે. 64 વર્ષીય શાહિદને સોમવારે રાત્રે 10 વાગ્યે રાજધાની માલેમાં અદાલતના વોરંટના આધારે કસ્ટડીમાં લેવામાં આવ્યા હતા. પોલીસે જણાવ્યું કે શાહિદ પર 18 વર્ષથી ઓછી ઉંમરના એક સગીરનું જાતીય શોષણ કરવાનો આરોપ છે. ધરપકડ પહેલાં કહ્યું- અફવાઓ ન ફેલાવો ધરપકડના થોડા સમય પહેલાં શાહિદે સોશિયલ મીડિયા પર લોકોને તેમના વિશે ખોટી વાતો ન ફેલાવવાની અપીલ કરી હતી. તેમણે પોતાની વિરુદ્ધ ચાલી રહેલા આરોપોને બદનક્ષીભર્યા ગણાવ્યા હતા. સ્થાનિક મીડિયાના અહેવાલ મુજબ, હુલહુમાલે સ્થિત શાહિદના ઘરની બહાર અનેક પોલીસકર્મીઓ તહેનાત રહ્યા હતા. ત્યાંથી જ તેમને કસ્ટડીમાં લેવામાં આવ્યા હતા. રિમાન્ડ અને કસ્ટડી અંગે આગળ કોર્ટમાં કાર્યવાહી થવાની આશા છે. માલદીવ પોલીસે ધિવેહી ભાષામાં જાહેર કરેલા નિવેદનમાં ધરપકડની જાણકારી આપી હતી. પોલીસે કેસ સાથે જોડાયેલી અન્ય વિગતો આપી નથી. તેણે માત્ર એટલું જણાવ્યું કે તપાસ ચાલુ છે. ભારતવિરોધી રાજકારણને લઈને મુઇઝ્ઝુને ચેતવણી આપી હતી શાહિદની ધરપકડ એવા સમયે થઈ છે, જ્યારે માલદીવમાં રાષ્ટ્રપતિ મોહમ્મદ મુઇઝ્ઝુની વિદેશ નીતિને લઈને રાજકીય ચર્ચા તેજ બની છે. ખાસ કરીને પાકિસ્તાન સાથે તેમના વધતા સંપર્કો અને ભારત સાથેના સંબંધો પર તેની સંભવિત અસરને લઈને વિપક્ષ સવાલો ઉઠાવી રહ્યો છે. શાહિદે તાજેતરમાં મુઇઝ્ઝુના પાકિસ્તાન સાથેના વધતા સંપર્કોની ટીકા કરી હતી. તેમણે ચેતવણી આપી હતી કે માલદીવના રાષ્ટ્રપતિ 2023માં સત્તા સુધી પહોંચવા માટે ચલાવવામાં આવેલા ભારતવિરોધી અભિયાનને ફરીથી શરૂ કરી શકે છે. આ વિવાદ ત્યારે વધુ વકર્યો, જ્યારે મુઇઝ્ઝુએ 20થી 22 ઑક્ટોબર વચ્ચે પાકિસ્તાનની પ્રથમ મુલાકાત લીધી. 11 વર્ષ બાદ માલદીવના કોઈ રાષ્ટ્રપતિની આ પ્રથમ પાકિસ્તાન મુલાકાત હતી. ત્રણ દિવસની આ યાત્રા બંને દેશો વચ્ચેના રાજદ્વારી સંબંધોની 60મી વર્ષગાંઠ નિમિત્તે થઈ હતી. મુઇઝ્ઝુની આ મુલાકાતને લઈને વિપક્ષી નેતાઓએ ચિંતા વ્યક્ત કરી. તેમનું કહેવું હતું કે પાકિસ્તાન સાથેના ગાઢ સંબંધો વધારવાની માલદીવની વ્યૂહરચના પર અસર પડી શકે છે. MPDના રાષ્ટ્રપતિ પદના ઉમેદવાર બનવા માટે પ્રચાર કરી રહેલા શાહિદે આરોપ લગાવ્યો કે મુઇઝ્ઝુ 2023ની ચૂંટણીની જેમ વધુ એક ભારત વિરોધી અભિયાન શરૂ કરવાની તૈયારી કરી રહ્યા છે. મુઇઝ્ઝુની પાકિસ્તાન મુલાકાત દરમિયાન બંને દેશો વચ્ચે 20 સમજૂતી કરારો (MoU) પર હસ્તાક્ષર થયા. તેમાં આરોગ્ય, શિક્ષણ, વેપાર, કૃષિ, સાયબર સુરક્ષા, સંરક્ષણ અને દરિયાઈ સુરક્ષા જેવા ક્ષેત્રો સામેલ છે. 2028ની રાષ્ટ્રપતિ ચૂંટણીની તૈયારી કરી રહ્યા હતા