દિલ્હીમાં વધતું વાયુ પ્રદૂષણ હવે ક્રિકેટના મેદાન સુધી પહોંચી ગયું છે. ભારત અને શ્રીલંકા વચ્ચે 13 ડિસેમ્બરે દિલ્હીના અરુણ જેટલી સ્ટેડિયમમાં રમાનારી પ્રથમ વનડે પર સંકટ ઊભું થયું છે. દિલ્હી એન્ડ ડિસ્ટ્રિક્ટ ક્રિકેટ એસોસિએશન (DDCA)એ ભારતીય ક્રિકેટ કંટ્રોલ બોર્ડ (BCCI)ને પત્ર લખીને આ મેચ દિલ્હીની બહાર અન્ય સ્થળે ખસેડવાની વિનંતી કરી છે.
પ્રદૂષણ અને રિનોવેશન બન્યાં મુખ્ય કારણ
DDCAના સૂત્રોના જણાવ્યા અનુસાર, ડિસેમ્બર મહિનામાં દિલ્હીની હવાની ગુણવત્તા ખરાબ રહેવાની શક્યતા છે. આ ઉપરાંત અરુણ જેટલી સ્ટેડિયમમાં રિનોવેશનનું કામ પણ ચાલી રહ્યું છે. આ બંને કારણોને લીધે એસોસિએશન નિર્ધારિત તારીખે મેચનું આયોજન કરવા માટે મુશ્કેલી અનુભવી રહ્યું છે. રિપોર્ટ મુજબ, DDCAની મુખ્ય ચિંતા સ્ટેડિયમના રિનોવેશન કરતાં દિલ્હીના પ્રદૂષણને લઈને વધુ છે. ગયા વર્ષે ડિસેમ્બરમાં દિલ્હીમાં સરેરાશ AQI 351 નોંધાયો હતો. 2 નવેમ્બર, 2026ના રોજ પણ પ્રદૂષણનું સ્તર આ જ આસપાસ હોવાનું અહેવાલોમાં જણાવાયું છે.
2017ની ઘટના ફરી ન બને તે માટે ચિંતા
દિલ્હીમાં શિયાળા દરમિયાન આંતરરાષ્ટ્રીય ક્રિકેટ યોજવા અંગે અગાઉ પણ સવાલો ઊભા થયા છે. ડિસેમ્બર 2017માં ભારત અને શ્રીલંકા વચ્ચે દિલ્હીમાં રમાયેલી ટેસ્ટ મેચ દરમિયાન પ્રદૂષણને કારણે શ્રીલંકાના કેટલાક ખેલાડીઓની તબિયત બગડી હતી. કેટલાક ખેલાડીઓને મેદાન પર ઊલટીઓ પણ થઈ હતી. DDCA આ પ્રકારની સ્થિતિ ફરી ઊભી ન થાય તે માટે સાવચેતી રાખવા માગે છે. આ જ કારણથી તેણે BCCIને મેચ અન્ય સ્થળે ખસેડવાની વિનંતી કરી છે.
અમદાવાદમાં રમાઈ શકે છે મેચ?
ભારત અને શ્રીલંકા વચ્ચેની ત્રણ મેચની વનડે શ્રેણીનું હાલનું કાર્યક્રમ મુજબ પ્રથમ મેચ 13 ડિસેમ્બરે દિલ્હીમાં, બીજી મેચ 16 ડિસેમ્બરે બેંગલુરુમાં અને ત્રીજી મેચ 19 ડિસેમ્બરે અમદાવાદમાં રમાવાની છે. જો BCCI દિલ્હીથી મેચ ખસેડવાની વિનંતી સ્વીકારશે તો શ્રેણીના કાર્યક્રમમાં ફેરફાર કરવો પડી શકે છે. અમદાવાદનું નામ પણ સંભવિત સ્થળ તરીકે ચર્ચામાં આવી શકે છે, પરંતુ ત્યાં મેચ યોજાશે તે અંગે હજુ કોઈ સત્તાવાર જાહેરાત થઈ નથી.
BCCIએ અગાઉ અહેવાલોને નકાર્યા હતા
ઉલ્લેખનીય છે કે 12 ઓક્ટોબરે BCCIના સચિવ દેવજીત સૈકિયાએ દિલ્હીથી અમદાવાદમાં મેચ ખસેડવાની ચર્ચાઓને ખોટી ગણાવી હતી. તેમણે સ્પષ્ટ કર્યું હતું કે તે સમયે સ્થળ બદલવાનો કોઈ નિર્ણય લેવાયો નહોતો. જોકે, હવે DDCA દ્વારા સત્તાવાર રીતે વિનંતી કરવામાં આવી હોવાથી BCCIએ આ મામલે આગળ નિર્ણય લેવાનો રહેશે.
હાલમાં 13 ડિસેમ્બરની મેચનું નવું સ્થળ જાહેર થયું નથી. BCCIનો અંતિમ નિર્ણય આવ્યા બાદ જ ભારત-શ્રીલંકા વનડે શ્રેણીના કાર્યક્રમ અંગે સ્પષ્ટતા થશે.
આ પણ વાંચો: Ranji Trophy: 91 બોલમાં સદી અને પછી તબાહી: ઉર્વિલ પટેલનો રણજી ટ્રોફીમાં ધમાકો!