ગુજરાતના યુવા વિકેટકીપર બેટર ઉર્વિલ પટેલે રણજી ટ્રોફી 2026-27માં પોતાની બેટિંગથી ધમાલ મચાવી દીધી છે. કેરળ સામે અમદાવાદના નરેન્દ્ર મોદી સ્ટેડિયમમાં રમાઈ રહેલી મેચના બીજા દિવસે ઉર્વિલે શાનદાર બેવડી સદી ફટકારી હતી. આ તેની પ્રથમ શ્રેણી ક્રિકેટ (ફર્સ્ટ ક્લાસ) કારકિર્દીની પહેલી બેવડી સદી છે. તેણે 227 બોલમાં અણનમ 210 રન બનાવ્યા હતા. તેની આ ઇનિંગમાં 17 ચોગ્ગા અને 6 છગ્ગાનો સમાવેશ થાય છે.
91 બોલમાં સદી, 214 બોલમાં બેવડી સદી
ઉર્વિલે શરૂઆતથી જ આક્રમક અંદાજ અપનાવ્યો હતો. તેણે માત્ર 91 બોલમાં પોતાની સદી પૂરી કરી હતી. ત્યારબાદ પણ તેની બેટિંગની ગતિ અટકી નહોતી. તેણે 214 બોલમાં 200 રનનો આંકડો પાર કરીને પોતાની પ્રથમ ફર્સ્ટ ક્લાસ બેવડી સદી નોંધાવી હતી. અંતે તે 210 રન બનાવીને અણનમ રહ્યો હતો.
ગુજરાતની ઇનિંગને મજબૂત બનાવી
ગુજરાતે ટોસ જીતીને પ્રથમ બેટિંગ કરવાનો નિર્ણય લીધો હતો. ટીમને આર્યા દેસાઈ અને અભિષેક દેસાઈએ સારી શરૂઆત અપાવી હતી. આર્યાએ 95 રન બનાવ્યા હતા, જ્યારે અભિષેકે 42 રનનું યોગદાન આપ્યું હતું. જોકે, મધ્યક્રમની વિકેટો પડતાં ગુજરાતની ઇનિંગને સંભાળવાની જવાબદારી ઉર્વિલે ઉઠાવી હતી. ઉર્વિલે વિશાલ જયસ્વાલ સાથે મહત્વપૂર્ણ ભાગીદારી કરી હતી. વિશાલે પણ 77 રનની ઉપયોગી ઇનિંગ રમી હતી. ત્યારબાદ ઉર્વિલે નીચલા ક્રમના બેટરો સાથે મળીને ગુજરાતનો સ્કોર 500ને પાર પહોંચાડ્યો હતો. ગુજરાતે પ્રથમ ઇનિંગ 534 રન પર જાહેર કરી હતી.
IPLમાં CSKનો ખેલાડી છે ઉર્વિલ
ઉર્વિલ પટેલ IPLમાં ચેન્નાઈ સુપર કિંગ્સ (CSK)નો હિસ્સો છે. તેને ફ્રેન્ચાઇઝીએ ₹30 લાખમાં પોતાની ટીમમાં સામેલ કર્યો હતો. ઉર્વિલ તેની આક્રમક બેટિંગ માટે જાણીતો છે. ખાસ કરીને મર્યાદિત ઓવરના ક્રિકેટમાં તેની ઝડપી બેટિંગની ચર્ચા રહી છે. હવે રણજી ટ્રોફીમાં બેવડી સદી ફટકારીને તેણે લાંબી ઇનિંગ રમવાની ક્ષમતા પણ સાબિત કરી છે.
કેરળ સામેની આ ઇનિંગ ઉર્વિલની કારકિર્દી માટે મહત્વપૂર્ણ સિદ્ધિ બની છે. તેની આ બેટિંગથી ગુજરાતે પ્રથમ ઇનિંગમાં મોટો સ્કોર ઊભો કર્યો છે અને મેચમાં મજબૂત સ્થિતિ મેળવી છે.