આજકાલ દરેક ક્ષેત્રે આર્ટિફિશિયલ ઇન્ટેલિજન્સ (AI) નો ઉપયોગ ઝડપથી વધી રહ્યો છે. જે કાર્યો પૂરા કરવામાં પહેલાં કલાકો કે દિવસો લાગતા હતા, તે હવે AI ટૂલ્સની મદદથી મિનિટોમાં પૂર્ણ થઈ જાય છે. પરિણામે, ઘણી મોટી ટેક કંપનીઓએ કામગીરી સરળ બનાવવા માટે AI પર આધાર વધાર્યો છે. અગાઉ કર્મચારીઓની છટણી કરીને AI ટેકનોલોજી પર ખર્ચ વધારવાનો ટ્રેન્ડ જોવા મળ્યો હતો, પરંતુ હવે આ ટૂલ્સનો સતત વધતો ખર્ચ ખુદ કંપનીઓ માટે મોટી ચિંતાનું કારણ બની રહ્યો છે.

Apple નો મહત્વનો નિર્ણય: AI સ્ટાફના બજેટમાં ઘટાડો

AI પાછળ થતા ભારે ખર્ચને અંકુશમાં લેવા માટે ટેક જાયન્ટ એપલે તેના AI કર્મચારીઓના દૈનિક બજેટમાં ઘટાડો કરવાનો નિર્ણય લીધો છે. રિપોર્ટ્સ અનુસાર, કંપનીએ AI ટૂલ્સના ઉપયોગ માટે કર્મચારીઓની દૈનિક ખર્ચ મર્યાદા બદલી નાખી છે. અગાઉ જે એન્જિનિયરોને AI ટૂલ્સના ઉપયોગ માટે દરરોજ $300 (આશરે ₹25,000) સુધીનું બજેટ મળતું હતું, તે હવે ઘટાડીને વધુમાં વધુ $200 (આશરે ₹16,500) કરી દેવામાં આવ્યું છે. આ ઉપરાંત, એપલ તેની નોન-એન્જિનિયરિંગ ટીમોના ખર્ચમાં પણ કાપ મૂકવાનું વિચારી રહી છે.

કંપનીઓ શા માટે ઘટાડી રહી છે AI બજેટ અને શું છે આગામી રસ્તો?

મોટી ટેક કંપનીઓ AI બજેટમાં ઘટાડો કરી રહી છે તેની પાછળનું મુખ્ય કારણ નફાકારકતા (Profitability) જાળવી રાખવાનું અને AI પર થતા ખર્ચ સામે કંપનીને ખરેખર કેટલો લાભ થઈ રહ્યો છે તેનું મૂલ્યાંકન કરવાનું છે. કંપનીઓ હવે માત્ર અંધાધૂંધ AIનો ઉપયોગ પ્રોત્સાહિત કરવાને બદલે ખર્ચ નિયંત્રણ પર ધ્યાન આપી રહી છે. જો કોઈ કર્મચારીને પોતાના પ્રોજેક્ટ કે કામ માટે નિર્ધારિત દૈનિક મર્યાદા કરતાં વધુ AI ટૂલ્સની જરૂર પડે, તો તેમણે વધારાના બજેટની મંજૂરી મેળવવા માટે પોતાના વરિષ્ઠ અધિકારીઓ (Senior Officials) નો સંપર્ક કરવો પડશે.

આ પણ વાંચો : ChatGPT માં આવ્યું નવું ફીચર, હવે ફોટા અને ટેક્સ્ટથી બનાવો એનિમેશન