ગુજરાત સરકારના જળસંપત્તિ અને પાણી પુરવઠા વિભાગના રાજ્યકક્ષાના મંત્રી ઈશ્વરસિંહ પટેલે ગીર સોમનાથ જિલ્લાની મુલાકાત દરમિયાન પ્રથમ જ્યોતિર્લિંગ શ્રી સોમનાથ મહાદેવના શ્રદ્ધાપૂર્વક દર્શન કરી ધન્યતા અનુભવી હતી. મંત્રીની આ મુલાકાત ધાર્મિક આસ્થા અને વહીવટી સમીક્ષાનો સુંદર સમન્વય બની રહી હતી. ત્રિવેણી સંગમ ખાતે ભરતી નિયંત્રકની મુલાકાત
સોમનાથ પહોંચેલા મંત્રી ઈશ્વરસિંહ પટેલે સૌપ્રથમ રામમંદિર નજીક પવિત્ર ત્રિવેણી સંગમ સ્થળે આવેલા સોમનાથ ભરતી નિયંત્રકની સ્થળ મુલાકાત લીધી હતી. આ દરમિયાન તેમણે દરિયાઈ ભરતી-ઓટના નિયંત્રણ અને તેને લગતી વહીવટી તથા ટેકનિકલ કામગીરી અંગે અધિકારીઓ સાથે વિગતવાર ચર્ચા કરી સ્થિતિની સમીક્ષા કરી હતી. વૈદિક મંત્રોચ્ચાર વચ્ચે ગંગાજળ અર્પણ કર્યું
ભરતી નિયંત્રકની મુલાકાત બાદ મંત્રી શ્રી વિશ્વપ્રસિદ્ધ સોમનાથ મંદિરે પહોંચ્યા હતા. જ્યાં મંદિર પરિસરમાં સોમનાથ ટ્રસ્ટના ભૂદેવો દ્વારા કરવામાં આવેલા પવિત્ર વૈદિક મંત્રોચ્ચાર અને ભક્તિમય વાતાવરણ વચ્ચે મંત્રીએ ભગવાન સોમનાથ મહાદેવને ગંગાજળ અર્પણ કરી વિશેષ પૂજા-અર્ચના કરી હતી. પ્રથમ જ્યોતિર્લિંગના સાન્નિધ્યમાં તેમણે મહાદેવની આરતી કરી રાજ્યની સુખ-શાંતિ માટે પ્રાર્થના કરી હતી. સોમનાથ ટ્રસ્ટ દ્વારા સન્માન અને અધિકારીઓની ઉપસ્થિતિ
આ ધાર્મિક પ્રસંગે શ્રી સોમનાથ મંદિરના જનરલ મેનેજર વિજયસિંહ ચાવડાએ મંત્રી ઈશ્વરસિંહ પટેલનું ભાવભર્યું સ્વાગત કર્યું હતું અને તેમને સોમનાથ મહાદેવની તસવીર તથા પવિત્ર પ્રસાદ ભેટ અર્પણ કર્યા હતા. મંત્રીની આ મુલાકાત વેળાએ પાણી પુરવઠા વિભાગ, સિંચાઈ વિભાગ તેમજ ક્ષાર-અંકુશ વિભાગના ઉચ્ચ અધિકારીઓ અને કર્મચારીઓ પણ હાજર રહ્યા હતા.