ભારત અને ન્યૂઝીલેન્ડ વચ્ચે વેલિંગ્ટનમાં રમાયેલી બીજી વનડેમાં ભારતીય બોલર આકિબ નબીએ શાનદાર બોલિંગ કરીને સૌનું ધ્યાન ખેંચ્યું છે. પોતાની આંતરરાષ્ટ્રીય કારકિર્દીની ત્રીજી મેચ રમી રહેલા આકિબે આખરે વિકેટનું ખાતું ખોલ્યું છે. તેણે ન્યૂઝીલેન્ડના ઓપનર ટિમ સાઇફર્ટને આઉટ કરીને આંતરરાષ્ટ્રીય ક્રિકેટમાં પોતાની પ્રથમ વિકેટ મેળવી હતી. જોકે, તેનો જલવો અહીં અટક્યો નહોતો. ત્યારબાદ તેણે બીજા ઓપનર વિલ યંગને પણ પેવેલિયન મોકલી દીધો હતો. આમ, આકિબ નબીએ એકલા હાથે ન્યૂઝીલેન્ડની ઓપનિંગ જોડીને તોડી નાખી હતી.

ટિમ સાઇફર્ટ બન્યો આકિબ નબીનો પ્રથમ આંતરરાષ્ટ્રીય શિકાર

વેલિંગ્ટનમાં રમાયેલી બીજી વનડેમાં ભારતીય કેપ્ટન શુભમન ગિલે ટોસ જીતીને પહેલાં બોલિંગ કરવાનો નિર્ણય લીધો હતો. ભારતીય બોલરોએ શરૂઆતથી જ દબાણ બનાવ્યું હતું. મેચની બીજી ઓવરમાં જ આકિબ નબીએ ન્યૂઝીલેન્ડને પ્રથમ ઝટકો આપ્યો હતો.આકિબ નબીને અગાઉ ઓકલેન્ડમાં રમાયેલી શ્રેણીની પ્રથમ વનડેમાં એકપણ વિકેટ મળી નહોતી. જોકે, વેલિંગ્ટનમાં તેણે ટિમ સાઇફર્ટને આઉટ કરીને આંતરરાષ્ટ્રીય કારકિર્દીની પ્રથમ વિકેટ પોતાના નામે કરી હતી. સાઇફર્ટ ખાતું ખોલે તે પહેલાં જ પેવેલિયન પરત ફર્યો હતો. અંશુલ કંબોજે તેનો કેચ પકડી લીધો હતો.

સાઇફર્ટની વનડેમાં 100 રનની રાહ વધી

આકિબ નબીએ સાઇફર્ટને શૂન્ય રને આઉટ કરીને માત્ર ન્યૂઝીલેન્ડને ઝટકો આપ્યો નહોતો, પરંતુ તેના વનડે કરિયરની પ્રથમ 100 રન બનાવવાની રાહ પણ વધારી દીધી હતી.ટિમ સાઇફર્ટે પોતાની કારકિર્દીની પ્રથમ 5 વનડે મેચમાં કુલ 97 રન બનાવ્યા હતા. એટલે કે આ મેચમાં તેને 100 રન પૂરા કરવા માટે માત્ર 3 રનની જરૂર હતી. જોકે, આકિબ નબીની શાનદાર બોલિંગ સામે તે સફળ થઈ શક્યો નહોતો. તેણે 5 બોલનો સામનો કર્યો હતો, પરંતુ ખાતું ખોલ્યા વિના જ પેવેલિયન પરત ફરવું પડ્યું હતું.

વિલ યંગ પણ આકિબનો બીજો શિકાર બન્યો

ટિમ સાઇફર્ટની વિકેટ લીધા બાદ આકિબ નબીએ ન્યૂઝીલેન્ડના બીજા ઓપનર વિલ યંગને પણ આઉટ કર્યો હતો. આ સાથે વિલ યંગ તેની આંતરરાષ્ટ્રીય કારકિર્દીનો બીજો શિકાર બન્યો હતો.વિલ યંગે 17 બોલમાં માત્ર 5 રન બનાવ્યા હતા. આકિબ નબીએ તેને વિકેટ પાછળ કેચ આઉટ કરાવ્યો હતો. ભારતીય વિકેટકીપર કેએલ રાહુલે પોતાની જમણી તરફ ડાઇવ લગાવીને શાનદાર કેચ પકડ્યો હતો.આમ, આકિબ નબીએ ન્યૂઝીલેન્ડના બંને ઓપનરને માત્ર 11 રનના કુલ સ્કોર પર પેવેલિયન મોકલીને ભારતીય ટીમને મોટી સફળતા અપાવી હતી. પોતાની આંતરરાષ્ટ્રીય કારકિર્દીની પ્રથમ 2 વિકેટ એક જ મેચમાં મેળવીને આકિબે પોતાની ક્ષમતા સાબિત કરી હતી. વેલિંગ્ટનમાં તેનો આ સ્પેલ ભારતીય બોલિંગ માટે યાદગાર રહ્યો હતો.

આ પણ વાંચો – Gurnoor Brarનો કહેર! લાથમ અને ગ્લેન ફિલિપ્સ એક જ ઓવરમાં ક્લીન બોલ્ડ