અમરેલી જિલ્લામાંથી એક મોટા સમાચાર સામે આવ્યા છે. જિલ્લાના ખાંભા ગીર વિસ્તારમાં ભૂકંપનો આંચકો અનુભવાતા સ્થાનિક લોકોમાં થોડા સમય માટે ફફડાટ ફેલાઈ ગયો હતો. ગાંધીનગર સ્થિત સિસ્મોલોજી (ભૂકંપ વિજ્ઞાન) વિભાગ દ્વારા આ ભૂકંપના આંચકાની સત્તાવાર પુષ્ટિ કરવામાં આવી છે.

ખાંભા ગીરના આ ગામોમાં અનુભવાયા આંચકા

મળતી માહિતી મુજબ, ખાંભા ગીરના ગ્રામ્ય વિસ્તારોમાં 2.4 ની તીવ્રતાનો આંચકો નોંધાયો હતો. આ આંચકો ખાંભા ગીરના ગીદરડી, ધાવડીયા, તાતણીયા, ઉમરીયા, નાના વિસાવદર અને લાસા સહિતના આસપાસના ગામોમાં અનુભવાયો હતો. અચાનક ધરતી ધ્રુજારી અનુભવાતા લોકો પોતાના ઘર અને વ્યવસાયિક સ્થળોમાંથી બહાર દોડી આવ્યા હતા.

ભૂકંપનું કેન્દ્રબિંદુ અને તંત્રની નજર

સિસ્મોલોજી વિભાગના જણાવ્યા અનુસાર, આ ભૂકંપનું કેન્દ્રબિંદુ ઉનાથી નજીક આશરે 36 કિમી દૂર નોંધાયું હતું. સદનસીબે 2.4 ની ઓછી તીવ્રતાના કારણે આ આંચકાથી કોઈ જ પ્રકારના જાનમાલના નુકસાનના સમાચાર પ્રાપ્ત થયા નથી. તંત્ર દ્વારા આ વિસ્તાર પર સતત નજર રાખવામાં આવી રહી છે.

આ પણ વાંચો: Amreli: સણોસરામાં માનવભક્ષી દીપડાનો ખૂની ખેલ! કપાસના ખેતરમાં રમતા 8 વર્ષના બાળકને ફાડી ખાધો