ગીર સોમનાથ જિલ્લાના વેરાવળમાં જૂનાગઢ રોડ પર ડો. ગોડસે હોસ્પિટલ નજીક ગોકુલનગરમાં ભંગારનાં બે ગોડાઉનમાં આગ લાગી. ગોડાઉનમાં ભંગાર અને પ્લાસ્ટિકનો જથ્થો હોવાથી આગ ફેલાઈ અને ધુમાડો નીકળ્યો. બપોરે અંદાજે સાડા ત્રણથી ચાર વાગ્યાની વચ્ચે આગ લાગી હતી. જાણ થતાં વેરાવળ ફાયર વિભાગની ટીમ સ્થળે પહોંચી હતી. વેરાવળની ચાર ફાયર ફાઇટર ગાડીઓ ઉપરાંત રેયોનની ફાયર ટીમને પણ બોલાવવામાં આવી હતી. કુલ સાત ફાયર ફાઇટરથી પાણીનો મારો ચલાવી આગ કાબૂમાં લેવાના પ્રયાસ થયા. ફાયર વિભાગે અત્યાર સુધીમાં અંદાજે 50 હજાર લીટર પાણી વાપર્યું હતું. વેરાવળ ફાયર સ્ટેશનના જમાદાર સુનીલ ચુડાસમાએ જણાવ્યું કે, બંને ગોડાઉનમાં ભંગાર, પ્લાસ્ટિક અને અન્ય સામાનનો મોટો જથ્થો હતો. અંદર ચાલવાની પૂરતી જગ્યા ન હોવાથી આગ બુઝાવવામાં મુશ્કેલી પડી. પ્લાસ્ટિકના કારણે ધુમાડો પણ વધુ હતો. ફાયર વિભાગની કામગીરી બાદ આગ કાબૂમાં આવી હતી. જોકે, ભંગારના ઢગલામાં અંદર આગ સળગતી રહેવાની શક્યતાને પગલે કુલિંગ શરૂ કરાયું હતું. વિભાગના જણાવ્યા મુજબ, આ કામગીરી પૂરી થતાં દોઢથી બે કલાક લાગી શકે તેમ હતું. આગ લાગવાનું ચોક્કસ કારણ જાણવા મળ્યું નથી. નુકસાનનો સત્તાવાર અંદાજ પણ જાહેર થયો નથી. રહેણાક અને ધંધાકીય વિસ્તાર નજીક આગ લાગતાં સ્થાનિકોમાં ચિંતા ફેલાઈ હતી. આગ સંપૂર્ણ બુઝાય અને સ્થળ સુરક્ષિત બને ત્યાં સુધી ફાયર વિભાગની કામગીરી ચાલુ રહી.