ઉત્તર પ્રદેશના રામપુરમાં 2007ના સીઆરપીએફ ગ્રુપ સેન્ટર પર થયેલા આતંકી હુમલાના કેસમાં આરોપી રહેલા મોહમ્મદ શરીફની 10 નવેમ્બર 2026ના રોજ ગોળી મારીને હત્યા કરવામાં આવી છે. બાઇક પર આવેલા 2 અજાણ્યા હુમલાખોરોએ પનવડિયા ગામ નજીક તેમના પર ફાયરિંગ કર્યું હતું. ગંભીર હાલતમાં તેમને હોસ્પિટલ લઈ જવામાં આવ્યા હતા, જ્યાં તેમનું મોત થયું હતું. ઘટના સમયે તેઓ પોતાના દીકરા સાથે જઈ રહ્યા હતા.

હુમલાખોરો ફાયરિંગ કરી ફરાર

પોલીસના જણાવ્યા અનુસાર, બાઇકસવાર 2 હુમલાખોરોએ મોહમ્મદ શરીફ પર ગોળીબાર કર્યો હતો અને ત્યારબાદ ઘટનાસ્થળેથી ફરાર થઈ ગયા હતા. શરીફ ખજૂરિયા પોલીસ સ્ટેશન વિસ્તારના બદનપુરી ગામના રહેવાસી હતા. હાઈકોર્ટમાંથી મુક્ત થયા બાદ તેઓ પરિવાર સાથે ગામમાં રહેતા હતા અને રોજ ખજૂરિયા પોલીસ સ્ટેશનમાં હાજરી આપતા હતા.

2007માં સીઆરપીએફ કેમ્પ પર થયો હતો આતંકી હુમલો

31 ડિસેમ્બર 2007ની રાત્રે રામપુરના સીઆરપીએફ ગ્રુપ સેન્ટર પર એકે-47 અને હેન્ડ ગ્રેનેડથી હુમલો કરવામાં આવ્યો હતો. આ હુમલામાં 7 સીઆરપીએફ જવાનો અને એક રિક્ષાચાલકનાં મોત થયાં હતાં, જ્યારે 5 લોકો ઘાયલ થયા હતા. આ હુમલાની જવાબદારી લશ્કર-એ-તૈયબાએ લીધી હતી.

2019માં ટ્રાયલ કોર્ટે ફટકારી હતી ફાંસીની સજા

આ કેસમાં 2019માં રામપુરની અદાલતે મોહમ્મદ શરીફ સહિત સબાઉદ્દીન, ઇમરાન શહજાદ અને મોહમ્મદ ફારૂકને ફાંસીની સજા સંભળાવી હતી. જ્યારે જંગ બહાદુર ખાનને આજીવન કેદની સજા ફટકારવામાં આવી હતી. અન્ય 2 આરોપીઓને નિર્દોષ જાહેર કરવામાં આવ્યા હતા.

હાઈકોર્ટે 2025માં મોટો ચુકાદો આપ્યો

આરોપીઓએ સજાના નિર્ણયને અલ્હાબાદ હાઈકોર્ટમાં પડકાર્યો હતો. 29 ઓક્ટોબર 2025ના રોજ હાઈકોર્ટે તપાસમાં ગંભીર ખામીઓ હોવાનું જણાવી મોહમ્મદ શરીફ સહિત 5 આરોપીઓને હત્યા, આતંકવાદ અને કાવતરાના આરોપોમાંથી મુક્ત કર્યા હતા. જોકે, આર્મ્સ એક્ટની કલમ 25(1-A) હેઠળ તેમને દોષિત ઠેરવી 10 વર્ષની સજા અને 1 લાખ રૂપિયાનો દંડ ફટકાર્યો હતો. ત્યારબાદ નવેમ્બર 2025માં શરીફ બરેલી સેન્ટ્રલ જેલમાંથી મુક્ત થયા હતા.

સુપ્રીમ કોર્ટમાં પણ ચાલી રહ્યો હતો કેસ

હાઈકોર્ટના ચુકાદા સામે ઉત્તર પ્રદેશ સરકારે સુપ્રીમ કોર્ટમાં અરજી કરી હતી. 11 ફેબ્રુઆરી 2026ના રોજ સુપ્રીમ કોર્ટે રાજ્ય સરકારની અરજી પર સુનાવણી કરવા સંમતિ આપી હતી અને આરોપીઓને નોટિસ પણ જારી કરી હતી. આ દરમિયાન મોહમ્મદ શરીફની હત્યાની ઘટના સામે આવી છે. પોલીસ હવે હુમલાખોરો અને હત્યા પાછળના કારણોની તપાસ કરી રહી છે. 

આ પણ વાંચો :   Delhi : પ્રણવ મુખર્જી વડાપ્રધાન બનવા ઇચ્છતા હતા તો તેમાં ખોટું શું? શર્મિષ્ઠા મુખર્જીએ સોનિયા ગાંધીને આપ્યો જવાબ