મહેસાણા જિલ્લાના વિજાપુર તાલુકાના મોરવડ, કુંડળ, મિઠીયા, તાબેનવા અને અમરાપુરા ગામોના ખેડૂતો ઉપર મોટી કુદરતી કે જીવાતની આપત્તિ આવી પડી છે. આ પાંચેય ગામોના ખેતરોમાં એરંડાના પાકમાં ઈયળોનો અત્યંત ભારે ઉપદ્રવ જોવા મળ્યો છે. ઈયળોના આ આતંકના કારણે એરંડાના પાકના લીલાછમ છોડ સંપૂર્ણપણે નાશ પામવાની આરે આવી ગયા છે અને સ્થિતિ એવી છે કે હવે પાક ખેતરોમાં વધુ સમય ઉભો રહી શકે તેમ નથી.

મોંઘા ખર્ચ છતાં ઉત્પાદન શૂન્ય થતા આર્થિક ફટકો

વર્ષભરની મહેનત અને અપેક્ષાઓ સાથે ખેડૂતોએ બિયારણ, ખાતર, દવા અને મજૂરી પાછળ હજારો રૂપિયાનો મસમોટો ખર્ચ કર્યો હતો, પરંતુ અચાનક ત્રાટકેલી ઈયળોના કારણે તમામ મહેનત પાણીમાં ગઈ છે અને ઉત્પાદન મળવાની કોઈ આશા ન રહેતા ખેડૂતોને મોટું આર્થિક નુકસાન સહન કરવાનો વારો આવ્યો છે, જેનાથી અન્નદાતાઓની આર્થિક સ્થિતિ અત્યંત કફોડી બની ગઈ છે.

તંત્ર સમક્ષ તાત્કાલિક સર્વે અને સહાયની ઉગ્ર માગ

આ ગંભીર પરિસ્થિતિને ધ્યાનમાં રાખીને નુકસાનગ્રસ્ત ખેડૂતો દ્વારા કૃષિ વિભાગ અને પ્રશાસન સમક્ષ સત્વરે પગલાં ભરવાની માગ કરવામાં આવી છે. ખેડૂતો માગ કરી રહ્યા છે કે, કૃષિ નિષ્ણાતો અને જવાબદાર અધિકારીઓ દ્વારા તાત્કાલિક ધોરણે સ્થળ તપાસ અને સર્વે કરવામાં આવે. આ સાથે જ પાક નુકસાન અટકાવવા માટે યોગ્ય માર્ગદર્શન અને ઉપચાર પૂરા પાડવામાં આવે તેમજ તાત્કાલિક યોગ્ય મૂલ્યાંકન કરી ખેડૂતોને પૂરતી આર્થિક સહાય અને સરકારી યોજનાઓનો લાભ આપવામાં આવે.

આ પણ વાંચો: Mehsana News: ફટાકડા ફોડવા બાબતે લોહીયાળ ખેલ, યુવક પર છરી વડે જીવલેણ હુમલો, Video