બ્રિટનના રોયલ એરફોર્સ (RAF) ફેરફોર્ડ એરબેઝ પર ઈંધણથી ભરેલી ત્રણ વૅન દ્વારા હુમલાનું કાવતરું ઘડવામાં આવ્યું હતું. અમેરિકન તપાસ એજન્સીઓના જણાવ્યા અનુસાર, તેનો મુખ્ય આરોપી મોહમ્મદ બાકિર સાદ દાઉદ અલ-અસાદી તે સમયે ન્યૂયોર્કની જેલમાં બંધ હતો. તે જેલમાંથી જ ફોન પર કોડ ભાષામાં પોતાના સાથીઓને સૂચનાઓ આપી રહ્યો હતો. અમેરિકાના ન્યાય વિભાગે 10 નવેમ્બરે આ મામલે ત્રણ લોકો—અલ-અસાદી, મોહસિન મોહાજેરી અને મોહમ્મદ અલી અલ-હસાની—વિરુદ્ધ આરોપો નક્કી કર્યા. અધિકારીઓનો દાવો છે કે ત્રણેયના ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) અને ઇરાકના સંગઠન કતાઇબ હિઝબુલ્લાહ સાથે સંબંધો હતા. એરબેઝ નજીકથી 3 શંકાસ્પદ વાહનો મળી આવ્યાં હતાં 27 સપ્ટેમ્બરે RAF ફેરફોર્ડ એરબેઝ નજીક ત્રણ શંકાસ્પદ વૅન મળી આવી હતી. તેમને એક દિવસ અગાઉ એરબેઝ તરફ મોકલવામાં આવી હતી. વૅન પર ઈંધણ પુરવઠા અને સ્વિમિંગ પૂલ સંબંધિત સેવાઓના નકલી લોગો લગાવવામાં આવ્યા હતા, જેથી તેઓ સામાન્ય ડિલિવરી વાહનો જેવી દેખાય. એક ખેડૂતે શંકાસ્પદ પ્રવૃત્તિઓ જોઈને પોલીસને જાણ કરી હતી. તપાસ દરમિયાન વૅનમાંથી પેટ્રોલ અને ઈંધણના ડ્રમ મળી આવ્યા, પરંતુ વિસ્ફોટકો મળ્યા નહોતા. ઓછામાં ઓછી બે વૅનને એરબેઝના પ્રવેશદ્વાર પર જ રોકી લેવામાં આવી હતી. અમેરિકી અભિયોજકોના જણાવ્યા અનુસાર, આ વૅનોનો ઉપયોગ વિસ્ફોટ કરીને હુમલો કરવા માટે થવાનો હતો. બ્રિટિશ પોલીસે આ મામલે અનેક લોકોની ધરપકડ કરી હતી. ઑક્ટોબરના અંતમાં કેટલાક શંકાસ્પદોને ફરીથી કસ્ટડીમાં લેવામાં આવ્યા હતા. તપાસ એજન્સીઓને શંકા હતી કે આ કાવતરામાં ઈરાનની ભૂમિકા હોઈ શકે છે. ઑગસ્ટથી હુમલાની તૈયારી ચાલી રહી હતી અમેરિકી તપાસ અનુસાર, 22 ઑગસ્ટે અલ-હસાનીને એક વ્યક્તિને એરબેઝની દેખરેખ રાખવા અને ત્યાંના વીડિયો મોકલવા માટે કહ્યું હતું. ત્યારબાદ એરબેઝની સુરક્ષા વ્યવસ્થા અને આસપાસના વિસ્તારોની માહિતી એકત્રિત કરવામાં આવી હતી. સપ્ટેમ્બરમાં હુમલા માટે વૅન અને ઈંધણના ડ્રમ્સ એકત્ર કરવામાં આવ્યા. 26 સપ્ટેમ્બરે ત્રણેય વૅનને એરબેઝ તરફ મોકલવામાં આવી. તપાસ એજન્સીઓનો આરોપ છે કે આ સમગ્ર કાવતરામાં અલ-હસાની, મોહાજેરી અને અલ-અસાદી સામેલ હતા. જેલમાંથી પરિવાર દ્વારા સંદેશા મોકલતો હતો અલ-અસાદી ન્યૂયોર્કની બ્રુકલિન જેલમાં બંધ હતો. અમેરિકન સરકારી વકીલો અનુસાર, તે પોતાની માતા અને બહેન મારફતે ઈરાકમાં રહેલા સાથીઓ સુધી સંદેશા પહોંચાડતો હતો. વાતચીતમાં હુમલા માટે ‘કામ’ જેવા કોડ શબ્દોનો ઉપયોગ કરવામાં આવતો હતો. 24 સપ્ટેમ્બરની એક ફોન કૉલમાં તેણે પરિવારના એક સભ્યને કહ્યું હતું, ‘તેને પૈસા આપી દો, જેથી આપણે આ કામ કરી શકીએ.’ તપાસ એજન્સીઓનો દાવો છે કે આ પૈસા અલ-હસાની સુધી પહોંચાડવાના હતા. આ વાતચીતના ત્રણ દિવસ બાદ વૅનને એરબેઝ તરફ મોકલવામાં આવી. અમેરિકા અને યુરોપમાં 20 હુમલાના કાવતરાનો આરોપ અમેરિકાના ન્યાય વિભાગ અનુસાર, આ નેટવર્ક પર અમેરિકા અને યુરોપમાં આશરે 20 હુમલાઓનું આયોજન કરવા અથવા તેમને અંજામ આપવાનો પ્રયાસ કરવાનો આરોપ છે. તેમાં યહૂદી સમુદાયનાં સ્થળોને નિશાન બનાવવાની ઘટનાઓ પણ સામેલ છે. અલ-અસાદી પર લંડનમાં યહૂદી સમુદાયના લોકો પર છરી વડે હુમલો કરવાની અને એક યહૂદી પ્રાર્થનાસ્થળ પર આગ લગાડનારા ઉપકરણથી હુમલો કરવાની સાજિશમાં સામેલ હોવાનો આરોપ છે. આ ઉપરાંત, માર્ચ અને એપ્રિલમાં ન્યૂયોર્કના એક યહૂદી પ્રાર્થનાસ્થળને નિશાન બનાવવાની યોજના ઘડવાનો પણ આરોપ છે.