બાંગ્લાદેશના પૂર્વ પ્રધાનમંત્રી શેખ હસીનાએ શુક્રવારે કહ્યું છે કે જો જનતા ઇચ્છશે તો તેઓ ફરી એકવાર બાંગ્લાદેશની સત્તા સંભાળવા માટે તૈયાર છે. ન્યૂઝ એજન્સી IANSને આપેલા ઇન્ટરવ્યૂમાં હસીનાએ કહ્યું કે તેઓ ડિસેમ્બર 2026માં બાંગ્લાદેશ પરત ફરશે. તેમને ધરપકડ અથવા મૃત્યુદંડનો કોઈ ડર નથી. હસીનાએ બાંગ્લાદેશમાં હિંદુ, બૌદ્ધ અને ખ્રિસ્તી સમુદાયો પર થયેલા હુમલાઓને લઈને ચિંતા વ્યક્ત કરી. તેમણે કહ્યું કે લઘુમતીઓ સુરક્ષિત નથી અને મામલાની નિષ્પક્ષ તપાસ થવી જોઈએ. પ્રત્યર્પણ અંગે કહ્યું- બંને દેશોના સંબંધો પર અસર નહીં પડે શેખ હસીનાને તેમના પ્રત્યર્પણના મામલે સવાલ કરવામાં આવ્યો. તેના જવાબમાં તેમણે કહ્યું કે ભારત એક સ્વતંત્ર દેશ છે. સરકાર પોતાના કાયદા અને પ્રક્રિયા મુજબ નિર્ણય કરશે. મને આશા છે કે મારો મામલો બંને દેશોના સંબંધોમાં અડચણ નહીં બને. તારિક રહેમાન સરકાર ઘણી વાર હસીનાના પ્રત્યાર્પણની માંગ કરી ચૂકી છે. ભારતે પણ પ્રત્યાર્પણની માંગ મળ્યાની પુષ્ટિ કરી છે. વિદેશ મંત્રાલયનું કહેવું છે કે આ મામલાની તપાસ નિર્ધારિત કાનૂની પ્રક્રિયા હેઠળ કરવામાં આવી રહી છે. દેશ પરત ફરવાની વાત રિપીટ, કહ્યું- જીવનની પરવા નથી પૂર્વ પીએમ હસીનાને મૃત્યુદંડ અને ધરપકડને લઈને સવાલ કરવામાં આવ્યો. તેમણે કહ્યું કે મને ખબર છે કે પરત ફરતાં જ મારી ધરપકડ થઈ શકે છે, જેલમાં મોકલવામાં આવી શકે છે અથવા મારો જીવ પણ લઈ શકાય છે. પરંતુ હું ડરીને પીછેહઠ કરનારાઓમાંની નથી. 1981માં પણ હું સૈન્ય શાસન છતાં બાંગ્લાદેશ પરત ફરી હતી. 2007માં ધરપકડના જોખમથી વાકેફ હોવા છતાં પાછી આવી હતી. આજે મારા દેશના લોકો મુશ્કેલીમાં છે. આવી સ્થિતિમાં હું તેમનાથી દૂર રહી શકતી નથી. હું મારા લોકોની વચ્ચે રહેવા માગું છું, ભલે તેના માટે મારે મારો જીવ જ કેમ ન ગુમાવવો પડે. હસીનાએ કહ્યું- મેં કોઈ નિર્દોષને મારવાનો આદેશ આપ્યો નથી વિદ્યાર્થી આંદોલન દરમિયાન થયેલાં મૃત્યુ માટે હસીનાને ફાંસીની સજા સંભળાવવામાં આવી છે. આ અંગે હસીનાએ કહ્યું કે મેં ક્યારેય કોઈ નિર્દોષને મારવાનો આદેશ આપ્યો નથી. PM તરીકે લોકોના જીવ બચાવવાની મારી જવાબદારી હતી. હું ટ્રિબ્યુનલની કાર્યવાહી અને નિર્ણયને સ્વીકારતી નથી. મને પોતાનો બચાવ કરવાનો નિષ્પક્ષ અવસર મળ્યો નહોતો. આ નિર્ણયને પડકારવા માટે હું કાનૂની માર્ગો શોધીશ. હકીકતમાં, બાંગ્લાદેશમાં 2024માં સરકારી નોકરીઓમાં અનામતના વિરોધમાં વિદ્યાર્થી આંદોલન શરૂ થયું હતું. ત્યાં સરકારી નોકરીઓમાં 1971ના મુક્તિ સંગ્રામમાં લડનારા લોકોના પરિવારો માટે 30% સુધીની બેઠકો અનામત હતી. વિદ્યાર્થીઓનું કહેવું હતું કે તેના કારણે સામાન્ય યુવાનો માટે સરકારી નોકરી મેળવવાની તકો ઘટી રહી હતી. તેઓ ઇચ્છતા હતા કે ભરતીમાં પરીક્ષા અને યોગ્યતાના આધારે વધુ નોકરીઓ આપવામાં આવે. આ જ માંગને લઈને શરૂ થયેલું આંદોલન ધીમે-ધીમે સરકાર વિરુદ્ધના પ્રદર્શનમાં ફેરવાઈ ગયું. સરકારની કાર્યવાહીમાં મોટી સંખ્યામાં લોકો માર્યા ગયા. સંયુક્ત રાષ્ટ્રના અંદાજ મુજબ, જુલાઈ અને ઑગસ્ટ 2024 દરમિયાન આશરે 1,400 લોકોનાં મૃત્યુ થયાં હતાં. બાંગ્લાદેશ મોટી શક્તિઓ વચ્ચેના ખેંચતાણનું મેદાન ન બને ચીન સાથે લડાકુ વિમાન ખરીદવાના સોદા અંગે હસીનાએ કહ્યું કે બાંગ્લાદેશને પોતાની સેનાને આધુનિક બનાવવાનો સંપૂર્ણ અધિકાર છે. અમારી સરકારે પણ સેનાના આધુનિકીકરણ પર કામ કર્યું હતું અને ચીન સહિત અનેક દેશો સાથે સહયોગ કર્યો હતો. પરંતુ આટલી મોટી ખરીદી પહેલાં કેટલીક બાબતો જોવી જરૂરી છે. શું દેશને આ વિમાનોની જરૂર છે? શું તે તેમનો ખર્ચ ઉઠાવી શકે છે? શું સોદો પારદર્શક રીતે થયો છે? અને તેની અન્ય દેશો પર શું અસર પડશે? ભારત આપણો પડોશી છે અને ચીન સંરક્ષણ તથા વિકાસમાં મહત્વપૂર્ણ ભાગીદાર છે. બાંગ્લાદેશે તમામ દેશો સાથે સારા સંબંધો જાળવવા જોઈએ. તેને મોટી શક્તિઓ વચ્ચેની પરસ્પર ખેંચતાણનું મેદાન ન બનવું જોઈએ.