વલસાડ નગરપાલિકાની ડમ્પિંગ સાઇટ પર કચરામાં લાગેલી આગ ચોથા દિવસે પણ કાબૂમાં આવી નથી. આગ ઓલવવા આસપાસની નગરપાલિકાઓ અને કંપનીઓના ફાયર ફાઇટરોની મદદ લેવાઈ રહી છે. ધુમાડાથી આસપાસના રહેણાંક વિસ્તારોના લોકોને મુશ્કેલી પડી રહી છે. મળતી માહિતી મુજબ, ચાર દિવસ પહેલાં ડમ્પિંગ સાઇટ પર કચરામાં આગ લાગી હતી. પવન અને કચરાના મોટા ઢગલાને કારણે આગ ફેલાઈ હતી. વલસાડ ફાયર વિભાગના પ્રયાસો છતાં આગ કાબૂમાં આવી ન હતી. પરિસ્થિતિને પગલે વાપી, પારડી, અતુલ અને આસપાસની ઔદ્યોગિક વસાહતોના ફાયર ફાઇટરોને સ્થળે બોલાવાયા છે. ફાયર જવાનો સતત પાણીનો મારો ચલાવી આગ ઓલવવાનો પ્રયાસ કરી રહ્યા છે. ડમ્પિંગ સાઇટ પર પ્લાસ્ટિક અને અન્ય જોખમી કચરો સળગવાથી કાળો ધુમાડો આસપાસની સોસાયટીઓ અને ગામોમાં ફેલાયો છે. લોકોને આંખોમાં બળતરા અને શ્વાસ લેવામાં તકલીફ થઈ રહી છે. નાના બાળકો, વૃદ્ધો અને અસ્થમાના દર્દીઓને ઘરમાં રહેવામાં પણ મુશ્કેલી પડી રહી છે. સ્થાનિકોનો આક્ષેપ છે કે પાલિકાએ કચરાના યોગ્ય નિકાલની વ્યવસ્થા કરી નથી, તેથી આવી ઘટનાઓ વારંવાર બને છે. ચાર દિવસ પછી પણ આગ કાબૂમાં ન આવતાં સ્થાનિકોમાં પાલિકા સામે રોષ છે. લોકો આગ વહેલી તકે ઓલવવાની અને ડમ્પિંગ સાઇટની સમસ્યાનો કાયમી ઉકેલ લાવવાની માગ કરી રહ્યા છે.