ભાવનગરના બગદાણા ગુરુઆશ્રમનો વિવાદ દિવસેને દિવસે વધુ ચર્ચામાં આવી રહ્યો છે. એક તરફ કોળી સમાજ દ્વારા આશ્રમના વહીવટ સામે 14 માગણીઓ રજૂ કરવામાં આવી છે, તો બીજી તરફ મોણપર સ્ટેટના ક્ષત્રિય સમાજના યુવાન કનકસિંહ ગોહિલે નવનીત બાલધિયા સામે ગંભીર આક્ષેપો કર્યા છે. આક્ષેપો અને પ્રતિઆક્ષેપો વચ્ચે હવે બગદાણા આશ્રમનો મુદ્દો સોશિયલ મીડિયા પર પણ ચર્ચાનું કેન્દ્ર બન્યો છે.

કોળી સમાજની 14 માગણીઓનો જવાબ નહીં મળ્યાનો દાવો

કોળી સમાજ દ્વારા આશ્રમના વહીવટમાં પોતાની સાથે અન્યાય થતો હોવાનો મુદ્દો ઉઠાવીને 14 માગણીઓ રજૂ કરવામાં આવી હતી. જોકે, કોળી સમાજના આગેવાન અશોકભાઈ મામસાના જણાવ્યા અનુસાર આશ્રમના વહીવટદાર તરફથી હજુ સુધી કોઈ પ્રતિક્રિયા આપવામાં આવી નથી. આ ઉપરાંત સમાજ સાથે કોઈ વાતચીત પણ કરવામાં આવી નથી.

આગામી રણનીતિ માટે બેઠક યોજવાની વાત

કોળી સમાજના આગેવાન અશોકભાઈ મામસા સાથે ટેલિફોનિક વાતચીત દરમિયાન તેમણે જણાવ્યું હતું કે આગામી સમયમાં સમાજના આગેવાનો સાથે બેઠક કરીને આગળની રણનીતિ નક્કી કરવામાં આવશે. હાલ આ મુદ્દે આશ્રમના વહીવટદારો તરફથી કોઈ સત્તાવાર પ્રતિક્રિયા સામે આવી નથી.

કનકસિંહ ગોહિલે નવનીત બાલધિયા સામે કર્યા આક્ષેપો

બીજી તરફ મોણપર સ્ટેટના ક્ષત્રિય સમાજના યુવાન કનકસિંહ ગોહિલે નવનીત બાલધિયા સામે ગંભીર આક્ષેપો કર્યા છે. કનકસિંહ ગોહિલના દાવા મુજબ, તેમના પૂર્વજોએ આશ્રમની જગ્યા પૂજારીને દાનમાં આપી હતી. તેમણે એવો પણ આક્ષેપ કર્યો છે કે કેટલાક તત્વો ગુરુઆશ્રમ બગદાણાને બદનામ કરવાનો પ્રયાસ કરી રહ્યા છે.

ગૌચરની જમીન પર ગેરકાયદે ખનનનો આક્ષેપ

કનકસિંહ ગોહિલે નવનીત બાલધિયા સામે ગૌચરની જમીન પર ગેરકાયદે ખનન કરાવવાનો પણ આરોપ લગાવ્યો છે. ખનન અને નાણાકીય વ્યવહારોના પુરાવા પોતાની પાસે હોવાનો તેમણે દાવો કર્યો છે. સાથે જ નવનીત બાલધિયા સમાજને ગેરમાર્ગે દોરી રાજકીય લાભ મેળવવાનો પ્રયાસ કરતા હોવાનો પણ આક્ષેપ કર્યો છે.

સમર્થન આપતાં પહેલાં જાણકારી મેળવવા અપીલ

કનકસિંહ ગોહિલે કોળી સમાજના રાજકીય આગેવાનોને અપીલ કરી છે કે નવનીત બાલધિયાને સમર્થન આપતાં પહેલાં તેમના વિશે સંપૂર્ણ જાણકારી મેળવી લેવી જોઈએ.

સોશિયલ મીડિયા પર પણ વિવાદની ચર્ચા

બગદાણા આશ્રમના મુદ્દે હાલ સોશિયલ મીડિયા પર પણ લોકો પોતાની પ્રતિક્રિયાઓ આપી રહ્યા છે. એક તરફ કોળી સમાજની માગણીઓ અને આશ્રમના વહીવટદારોની પ્રતિક્રિયાનો અભાવ ચર્ચામાં છે, તો બીજી તરફ નવા આક્ષેપોથી વિવાદમાં વધુ એક અધ્યાય ઉમેરાયો છે. જોકે, બંને પક્ષના આક્ષેપો અંગે આશ્રમના વહીવટદારોનો સત્તાવાર જવાબ સામે આવ્યો નથી. 

આ પણ વાંચો  :    Gujarat: ગોધરા કાંડની તપાસ પર સવાલ કેમ? IPS રાકેશ અસ્થાના સોનિયા ગાંધીના દાવા સામે આક્રમક, Video