થાઈલેન્ડના ફૂકેટમાં ઇમારતમાં આગ, 11નાં મોત:મોટરસાયકલની દુકાનમાંથી આગ ફેલાઈ, નજીકના ટ્રાન્સફોર્મરમાં વિસ્ફોટ થયો હતો

📅 Published: November 16, 2026 | 📂 Category: International

થાઈલેન્ડના ફુકેટ ટાપુ પર સોમવારે વહેલી સવારે એક ઇમારતમાં આગ લાગવાથી 11 લોકોનાં મોત થયા છે, જ્યારે 17 લોકો ઘાયલ થયા છે. ઇમારતના ગ્રાઉન્ડ ફ્લોર પર મોટરસાઇકલ ભાડે આપવાની દુકાન હતી અને ઉપરના માળે લોકો રહેતા હતા. પ્રારંભિક તપાસમાં જાણવા મળ્યું છે કે આગ લાગ્યાના થોડા સમય પહેલાં નજીકના વીજ ટ્રાન્સફોર્મરમાં વિસ્ફોટ થયો હતો. જોકે, પોલીસ આગ લાગવાનું સાચું કારણ શોધી રહી છે. સ્થાનિક અધિકારીઓના જણાવ્યા અનુસાર, આગ મોડી રાતે 2 વાગ્યે લાગી હતી. અગ્નિશામક દળના જવાનોએ લગભગ એક કલાકની મહેનત બાદ આગ પર કાબૂ મેળવ્યો. શરૂઆતમાં કોઈ વિદેશી નાગરિકના જાનહાનિની માહિતી મળી નથી. દુકાનમાં રાખવામાં આવેલી 100 બાઇકને કારણે આગ ઝડપથી ફેલાઈ ફૂકેટના ગવર્નર ચોડનારિન કોએડસોમના જણાવ્યા મુજબ, ઇમારતના ગ્રાઉન્ડ ફ્લોર પર આવેલી દુકાનમાં આશરે 100 મોટરસાઇકલ રાખવામાં આવી હતી. ત્યાં ગેસ, એન્જિન ઑઇલ, પ્લાસ્ટિકનો સામાન અને ટાયર પણ રાખવામાં આવ્યા હતા. ગવર્નરે જણાવ્યું કે આ જ્વલનશીલ વસ્તુઓને કારણે આગ ઝડપથી ફેલાઈ શકે છે. તેમાંથી નીકળેલા ગાઢ અને ઝેરી ધુમાડાએ પણ લોકો માટે જોખમ વધારી દીધું. ત્રીજા અને પાંચમા માળે મૃતદેહો મળ્યા અધિકારીઓના જણાવ્યા મુજબ, આગ લાગ્યા બાદ લોકો બચવા માટે ઇમારતના ઉપરના માળ તરફ દોડ્યા હતા. એક મૃતદેહ ત્રીજા માળે મળ્યો, જ્યારે 10 મૃતદેહ પાંચમા માળે મળી આવ્યા. ઘટનાસ્થળે આવેલી ઇમારત ફૂકેટના પશ્ચિમ કિનારે આવેલા પ્રખ્યાત પાતોંગ બીચ પાસેના એક નગરમાં છે. ફૂકેટ દક્ષિણ થાઇલેન્ડનો એક ટાપુ છે અને પ્રવાસીઓમાં ખૂબ લોકપ્રિય છે. ચાર મહિના પહેલાં બેંગકોકના બારમાં આગ લાગી હતી લગભગ ચાર મહિના પહેલાં, 12 જુલાઈના રોજ થાઈલેન્ડની રાજધાની બેંકોકના ચાતુચક જિલ્લામાં આવેલી એક બારમાં આગ લાગી હતી. આ દુર્ઘટનામાં 27 લોકોનાં મોત થયાં હતાં, જ્યારે 63 લોકો ઘાયલ થયા હતા. પ્રાથમિક તપાસમાં વીજળીની સિસ્ટમમાં ખામી હોવાની આશંકા વ્યક્ત કરવામાં આવી હતી. એક સંગીતકારે જણાવ્યું હતું કે વીજળી જતી રહેવાના થોડા સમય પહેલાં મંચ પાસે લગાવવામાં આવેલા સર્કિટ બ્રેકરમાંથી ધુમાડો નીકળી રહ્યો હતો. ત્યારબાદ વિસ્ફોટનો અવાજ સંભળાયો અને જોતજોતામાં આખી બારમાં ધુમાડો ભરાઈ ગયો. ફાયર બ્રિગેડના કર્મચારીઓએ લગભગ અડધા કલાકમાં આગ પર કાબૂ મેળવી લીધો હતો.


📱 Share on WhatsApp 🌐 View Original Article

Leave a Reply

Your email address will not be published. Required fields are marked *