IPL 2027: કોની પાસે સૌથી વધુ પૈસા? IPL 2027 ઓક્શન પહેલાં 10 ટીમોનું ગણિત બદલાયું

📅 Published: November 17, 2026 | 📂 Category: cricket

IPL 2027ની મિની ઓક્શન પહેલાં તમામ 10 ફ્રેન્ચાઇઝીઓએ પોતાની ટીમમાં મોટા ફેરફાર કર્યા છે. કેટલીક ટીમોએ પોતાના જૂના ખેલાડીઓ પર ભરોસો જાળવી રાખ્યો છે, તો કેટલીક ટીમોએ મોટા નામોને રિલીઝ કરીને હરાજી માટે બજેટ ખાલી કર્યું છે. આ વખતે સૌથી વધુ ₹47.45 કરોડનું બજેટ લખનઉ સુપર જાયન્ટ્સ પાસે બચ્યું છે. કોલકાતા નાઇટ રાઇડર્સ ₹41.65 કરોડ સાથે બીજા સ્થાને છે. જ્યારે સનરાઇઝર્સ હૈદરાબાદ પાસે ₹40.15 કરોડ અને દિલ્હી કેપિટલ્સ પાસે ₹39.50 કરોડ બચ્યા છે.

લખનઉ પાસે સૌથી વધુ પૈસા, KKR પણ પાછળ નહીં

લખનઉ સુપર જાયન્ટ્સે 10 ખેલાડીઓને જાળવી રાખ્યા છે. તેમાં મિચેલ માર્શ, એડન માર્કરમ, આયુષ બદોની, મયંક યાદવ અને સેમ કરન જેવા નામ સામેલ છે. ટીમે મોહમ્મદ શમી, કુલદીપ યાદવ અને વાનિન્દુ હસરંગા જેવા ખેલાડીઓની અદલાબદલી બાદ હવે 7 જગ્યાઓ ખાલી રાખી છે. તેની પાસે ₹47.45 કરોડનું સૌથી મોટું બજેટ છે. 

કોલકાતા નાઇટ રાઇડર્સે 9 ખેલાડીઓને જાળવી રાખ્યા છે. કેમરન ગ્રીન, સુનીલ નારાયણ, વરુણ ચક્રવર્તી અને રિંકુ સિંહ જેવા ખેલાડીઓ ટીમમાં છે. KKRએ મથીશા પથિરાના, મુસ્તફિઝુર રહેમાન અને રચિન રવીન્દ્ર સહિત 12 ખેલાડીઓને રિલીઝ કર્યા છે. ટીમ પાસે 8 જગ્યાઓ ભરવાની છે અને ₹41.65 કરોડનું બજેટ બચ્યું છે.

CSKએ ધોની સહિત 10 ખેલાડીઓને કર્યા રિલીઝ

ચેન્નાઈ સુપર કિંગ્સે ઋતુરાજ ગાયકવાડ, સંજુ સેમસન, શિવમ દુબે, ડેવાલ્ડ બ્રેવિસ અને નૂર અહમદ જેવા ખેલાડીઓને જાળવી રાખ્યા છે. લિયામ લિવિંગસ્ટોન અને જેક એડવર્ડ્સ ટ્રેડ દ્વારા ટીમમાં આવ્યા છે. બીજી તરફ એમ.એસ. ધોનીની નિવૃત્તિ ઉપરાંત પ્રાશાંત વીર, મેથ્યુ હેનરી, મેથ્યુ શોર્ટ અને ઝેક ફોક્સ સહિત 10 ખેલાડીઓ ટીમમાંથી બહાર થયા છે. ચેન્નાઈ પાસે હવે 6 જગ્યાઓ ખાલી છે, જેમાં 2 વિદેશી ખેલાડીઓની જગ્યા સામેલ છે. ટીમ પાસે ₹28.05 કરોડનું બજેટ છે. એટલે મિની ઓક્શનમાં CSK પાસે સારા ખેલાડીઓ ખરીદવાની તક રહેશે.

દિલ્હી અને હૈદરાબાદ પાસે પણ મોટું બજેટ

દિલ્હી કેપિટલ્સે ઋષભ પંતને ટ્રેડ દ્વારા ટીમમાં સામેલ કર્યો છે. કેએલ રાહુલ, અક્ષર પટેલ, ટ્રિસ્ટન સ્ટબ્સ અને ડેવિડ મિલર જેવા ખેલાડીઓ પણ ટીમમાં યથાવત્ છે. જોકે, મિચેલ સ્ટાર્ક, નીતિશ રાણા અને પથુમ નિસાંકા જેવા ખેલાડીઓને રિલીઝ કરવામાં આવ્યા છે. દિલ્હી પાસે 9 જગ્યાઓ ખાલી છે અને ₹39.50 કરોડનું બજેટ છે.

સનરાઇઝર્સ હૈદરાબાદે અભિષેક શર્મા, હેનરિક ક્લાસેન, ઈશાન કિશન અને પેટ કમિન્સ જેવા ખેલાડીઓને જાળવી રાખ્યા છે. ટ્રેડ દ્વારા ખલીલ અહમદ, નાથન એલિસ અને ટી. નટરાજન ટીમમાં આવ્યા છે. ટ્રેવિસ હેડ અને ગેરાલ્ડ કોએત્ઝી સહિત 9 ખેલાડીઓને રિલીઝ કરવામાં આવ્યા છે. હૈદરાબાદ પાસે 7 જગ્યાઓ અને ₹40.15 કરોડનું બજેટ છે.

કઈ ટીમ પાસે કેટલું બજેટ બચ્યું?

ટીમ   બાકી બજેટ ખાલી જગ્યાઓ
લખનઉ સુપર જાયન્ટ્સ  ₹47.45 કરોડ  7
કોલકાતા નાઇટ રાઇડર્સ  ₹41.65 કરોડ  8
સનરાઇઝર્સ હૈદરાબાદ  ₹40.15 કરોડ  7
દિલ્હી કેપિટલ્સ  ₹39.50 કરોડ  9
મુંબઈ ઇન્ડિયન્સ  ₹32.60 કરોડ  9
ચેન્નાઈ સુપર કિંગ્સ  ₹28.05 કરોડ  6
રાજસ્થાન રોયલ્સ  ₹27.05 કરોડ  6
પંજાબ કિંગ્સ  ₹18.60 કરોડ  6
રોયલ ચેલેન્જર્સ બેંગલુરુ  ₹14.15 કરોડ 5
ગુજરાત ટાઇટન્સ  ₹8.75 કરોડ 3

ગુજરાત ટાઇટન્સ પાસે સૌથી ઓછું બજેટ

ગુજરાત ટાઇટન્સે શુભમન ગિલ, સાઈ સુદર્શન, જોસ બટલર, રાશિદ ખાન અને મોહમ્મદ સિરાજ સહિત 21 ખેલાડીઓને જાળવી રાખ્યા છે. હર્ષલ પટેલ ટ્રેડ દ્વારા ટીમમાં આવ્યો છે. ગુજરાતે શાહરૂખ ખાન, ઈશાંત શર્મા અને લ્યુક વુડ સહિત 5 ખેલાડીઓને રિલીઝ કર્યા છે. ટીમ પાસે માત્ર 3 જગ્યાઓ ખાલી છે અને ₹8.75 કરોડનું સૌથી ઓછું બજેટ બચ્યું છે.

મુંબઈ ઇન્ડિયન્સ પાસે ₹32.60 કરોડ છે અને 9 ખેલાડીઓની જગ્યા ખાલી છે. પંજાબ કિંગ્સ પાસે ₹18.60 કરોડ અને 6 જગ્યાઓ છે. રાજસ્થાન રોયલ્સ પાસે ₹27.05 કરોડ અને 6 જગ્યાઓ છે, જ્યારે રોયલ ચેલેન્જર્સ બેંગલુરુ પાસે ₹14.15 કરોડ અને 5 જગ્યાઓ ખાલી છે.

હવે 16 ડિસેમ્બરે ગોવામાં યોજાનારી મિની ઓક્શનમાં ટીમો આ ખાલી જગ્યાઓ ભરવા માટે મેદાનમાં ઉતરશે. સૌથી મોટું બજેટ ધરાવતી લખનઉ અને KKR પર સૌની નજર રહેશે. જ્યારે ઓછા બજેટ સાથે ગુજરાત ટાઇટન્સે પોતાની ત્રણ ખાલી જગ્યાઓ માટે ખાસ રણનીતિ બનાવવી પડશે.

આ પણ વાંચો: IPL 2027 નહીં રમે મિચેલ સ્ટાર્ક! ઓસ્ટ્રેલિયાની તૈયારી માટે લીધો મોટો નિર્ણય, દિલ્હી કેપિટલ્સને ઝટકો


📱 Share on WhatsApp 🌐 View Original Article

Leave a Reply

Your email address will not be published. Required fields are marked *