સુરત શહેર પોલીસે સાઈબર ક્રાઈમ ક્ષેત્રે એક મોટી અને ઐતિહાસિક સફળતા મેળવતા રૂ. 125 કરોડથી વધુની રકમની ઓનલાઈન છેતરપિંડી આચરનારી શાતિર ગેંગનો પર્દાફાશ કર્યો છે. પોલીસે આંતરરાજ્ય રેકેટ સાથે સંકળાયેલા 4 મુખ્ય સાગરીતોની અટકાયત કરી છે. આ ગેંગે ટેકનોલોજીનો ગેરઉપયોગ કરીને દેશભરના હજારો નાગરિકોને પોતાની જાળમાં ફસાવીને કરોડો રૂપિયાનો ચૂનો લગાવ્યો હતો.

PNB જેવી ફેક એપ બનાવી 5,613 લોકોના ખાતા સાફ કર્યા

પોલીસ તપાસમાં બહાર આવેલા ચોંકાવનારા ખુલાસા મુજબ, આરોપીઓ પંજાબ નેશનલ બેંક (PNB) જેવી જ હૂબહૂ દેખાતી નકલી (ફેક) મોબાઈલ એપ્લિકેશન બનાવીને લોકોના ફોન હેક કરતા હતા. આ બોગસ એપ દ્વારા લોકોની બેંકિંગ વિગતો અને ઓટીપી (OTP) ચોરી કરીને ગેંગના સભ્યોએ અત્યાર સુધીમાં કુલ 5,613 નિર્દોષ લોકોના બેંક ખાતામાંથી તમામ રકમ સાફ કરી નાખી હતી.

નકલી એપ્લિકેશન બનાવનાર માસ્ટરમાઈન્ડ ઝડપાયો

સુરત પોલીસે આ સમગ્ર ઓનલાઈન ઠગાઈના નેટવર્કના મૂળ સુધી પહોંચીને નકલી એપ્લિકેશન કોડિંગ અને ડેવલપ કરનાર મુખ્ય સૂત્રધાર (ડેવલપર)ની પણ ધરપકડ કરી લીધી છે. પોલીસે આરોપીઓ પાસેથી હેકિંગમાં વપરાતા સાધનો અને ડિજિટલ પુરાવા કબજે કર્યા છે. આ સમગ્ર રેકેટમાં અન્ય કોઈ મોટા માથા કે આંતરરાષ્ટ્રીય કનેક્શન સંકળાયેલું છે કે નહીં તે દિશામાં સુરત પોલીસે વધુ ઊંડાણપૂર્વક તપાસ શરૂ કરી છે.

આ પણ વાંચો : Amreli News : રાજુલામાં યુવા ભાજપની ભવ્ય મશાલ રેલી, મોટી સંખ્યામાં યુવા શક્તિ અને નગરજનો જોડાયા