તાપી જિલ્લા ભાજપ કાર્યાલય ખાતે સ્વાતંત્ર્ય પર્વની ઉત્સાહભેર ઉજવણી કરવામાં આવી હતી. આ પ્રસંગે રાષ્ટ્રધ્વજ વંદન કાર્યક્રમનું આયોજન કરાયું હતું, જેમાં મોટી સંખ્યામાં કાર્યકર્તાઓ અને અગ્રણીઓ ઉપસ્થિત રહ્યા હતા. કાર્યક્રમની અધ્યક્ષતા કરતા સુરજ વસાવાએ રાષ્ટ્રધ્વજ તિરંગાને સલામી આપી હતી. તેમણે ઉપસ્થિત સૌને સ્વાતંત્ર્ય દિવસની શુભેચ્છાઓ પાઠવી હતી અને રાષ્ટ્રની એકતા, અખંડિતતા તથા વિકાસ માટે સંકલ્પબદ્ધ થવા પર ભાર મૂક્યો હતો. વસાવાએ દરેક નાગરિકને દેશને વધુ સશક્ત અને આત્મનિર્ભર બનાવવા માટે સાથે મળીને યોગદાન આપવા આહ્વાન કર્યું હતું. આ રાષ્ટ્રીય પર્વના પાવન અવસરે વ્યારાના ધારાસભ્ય મોહન કોકાણી વિશેષ ઉપસ્થિત રહ્યા હતા. તેમની સાથે જિલ્લા ભાજપના હોદ્દેદારો, પક્ષના વરિષ્ઠ અગ્રણીઓ, સક્રિય કાર્યકર્તાઓ અને યુવા વર્ગ પણ મોટી સંખ્યામાં હાજર રહ્યો હતો. સમગ્ર કાર્યક્રમ દરમિયાન દેશભક્તિના નારાઓથી વાતાવરણ ગુંજી ઉઠ્યું હતું અને સૌએ રાષ્ટ્રસેવાના શપથ લીધા હતા.