શ્રાવણ માસ શરૂ થતાં જ સક્રિય થયેલા જુગારીઓ સામે ગાંધીનગર પોલીસે લાલ આંખ કરી છે. ગાંધીનગર નજીક આવેલા પોર ગામની સીમમાં આવેલા એક ખેતરમાં આ ગુપ્ત જુગારધામ ચાલી રહ્યું હોવાની માહિતી મળી હતી. જુગાર રમાડનારા તત્વોએ પોલીસથી બચવા માટે ખાસ ખેતરના નિર્જન વિસ્તારમાં આવેલી એક ઓરડી ભાડે રાખી હતી, જ્યાં બહારથી લોકોને બોલાવીને મોટા પાયે શ્રાવણીયો જુગાર રમાડવામાં આવી રહ્યો હતો.

પોલીસે દરોડો પાડી 21 જુગારીઓને રંગેહાથ ઝડપ્યા

ચોક્કસ બાતમીના આધારે પોલીસે ખેતરની તે ઓરડી પર અચાનક દરોડો પાડ્યો હતો. દરોડા દરમિયાન ઓરડીમાં જુગાર રમી રહેલા અને રમાડી રહેલા કુલ 21 જેટલા જુગારીઓ રંગેહાથ ઝડપાઈ ગયા હતા. અચાનક પડેલા પોલીસ દરોડાને કારણે જુગારીઓમાં ભારે નાસભાગ અને અફરાતફરી મચી ગઈ હતી, પરંતુ પોલીસે ચારેય તરફથી ઘેરાબંધી કરીને તમામ 21 શખ્સોને કસ્ટડીમાં લઈ લીધા હતા.

મુદ્દામાલ જપ્ત કરી આગળની કાનૂની કાર્યવાહી શરૂ

પોલીસે દરોડા દરમિયાન સ્થળ પરથી રોકડ રકમ તેમજ જુગારના સાહિત્ય સહિતનો મુદ્દામાલ કબ્જે કર્યો છે. ઓરડી ભાડે આપી જુગાર અડ્ડો ચલાવવામાં મદદ કરનાર અને જુગાર રમાડનાર મુખ્ય સંચાલકો સામે પણ ગુનો દાખલ કરવામાં આવ્યો છે. હાલ પોલીસે તમામ 21 આરોપીઓ વિરુદ્ધ જુગારધારા હેઠળ ગુનો નોંધી આગળની વધુ તપાસ હાથ ધરી છે.

આ પણ વાંચો : Ahmedabad News : કેનેડા-ઓસ્ટ્રેલિયા વિઝાના નામે લાખોની ઠગાઈ, ગાંધીનગરના પિતા-પુત્ર સામે ફરિયાદ