સુરત શહેરના ડિંડોલી વિસ્તારમાં આવેલા RJD પ્લાઝા હોટલમાં હૃદય કંપાવી દે તેવી એક ઘટના સામે આવી છે. હોટલના રિસેપ્શન કાઉન્ટર પર ઉભા રહીને વાતચીત કરી રહેલો એક યુવક અચાનક જ બેભાન થઈને જમીન પર ઢળી પડ્યો હતો. યુવક જમીન પર પતંગની જેમ ઢળી પડતાં હોટલ સ્ટાફ અને આસપાસ ઉભેલા લોકો સ્તબ્ધ થઈ ગયા હતા. તુરંત જ તેને સારવાર અર્થે ખસેડવાની તજવીજ હાથ ધરવામાં આવી હતી, પરંતુ હોસ્પિટલ પહોંચે તે પહેલાં જ તેનું મોત નીપજ્યું હતું.
લાઈવ મોતના સીસીટીવી ફૂટેજ સામે આવ્યા
આ સમગ્ર કાળજું કંપાવનારી ઘટના હોટલના રિસેપ્શન વિસ્તારમાં લાગેલા સીસીટીવી (CCTV) કેમેરામાં કેદ થઈ ગઈ હતી. CCTV ફૂટેજમાં જોઈ શકાય છે કે યુવક સામાન્ય રીતે વાત કરી રહ્યો હતો અને સેકન્ડોના જ ભાગમાં અચાનક જ તેને છાતીમાં કંઈક ઉપડ્યું હોય તેમ તે સીધો જમીન પર પટકાયો હતો. આ ‘લાઈવ ડેથ’ના દ્રશ્યો સોશિયલ મીડિયા પર સામે આવતાં જ સમગ્ર સુરત શહેરમાં અરેરાટી સાથે ભારે સનસનાટી મચી ગઈ છે.
હાર્ટ એટેકની આશંકા: પોલીસે હાથ ધરી તપાસ
યુવકના આ પ્રકારે અચાનક થયેલા મોત પાછળ સાયલન્ટ હાર્ટ એટેક (Cardiac Arrest) હોવાની પ્રબળ આશંકા વ્યક્ત કરવામાં આવી રહી છે. ઘટના અંગે ડિંડોલી પોલીસને જાણ કરાતાં પોલીસ કાફલો સ્થળ પર દોડી ગયો હતો. પોલીસે CCTV ફૂટેજ કબ્જે કરીને મૃતદેહને પોસ્ટમોર્ટમ અર્થે હોસ્પિટલ મોકલી આપ્યો છે. યુવકની ઓળખ મેળવવાની સાથે પોસ્ટમોર્ટમ રિપોર્ટ આવ્યા બાદ જ કયા ચોક્કસ કારણે મોત નીપજ્યું તે અંગેનું સાચું કારણ સ્પષ્ટ થશે.