સુરત શહેરના જહાંગીરપુરા વિસ્તારમાંથી એક ચોંકાવનારી અને ચિંતાજનક ઘટના સામે આવી છે. ધોરણ 12માં અભ્યાસ કરતા એક માસુમ વિદ્યાર્થીએ પરીક્ષાના ભારે માનસિક તણાવમાં આવીને પોતાનું જીવન ટૂંકાવવાનો પ્રયાસ કર્યો હતો. વિદ્યાર્થીએ સુરત મહાનગરપાલિકા સંચાલિત મોઝેક ગાર્ડનના શૌચાલયમાં જઈને પોતાના હાથની નસ કાપી નાખી હતી. નસ કાપ્યા બાદ અતિશય લોહી વહી જતાં વિદ્યાર્થી ત્યાં જ ઢળી પડ્યો હતો. બનાવની જાણ થતાં જ તેને અત્યંત ગંભીર હાલતમાં તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો છે.
ગંભીર હાલતમાં વિદ્યાર્થીને હોસ્પિટલ ખસેડાયો
આ વિદ્યાર્થી ધોરણ 12 બોર્ડના અભ્યાસ અને પરીક્ષાના તણાવથી ઝૂરતો હતો. પરીક્ષાના ડર અને અભ્યાસના ભારણને કારણે તેણે આ આત્યંતિક પગલું ભર્યું હોવાની પ્રબળ શંકા વ્યક્ત કરવામાં આવી રહી છે. ગાર્ડનમાં આવેલા શૌચાલયમાંથી લોહીલુહાણ હાલતમાં વિદ્યાર્થી મળી આવતાં જ આસપાસના લોકોમાં ભારે અરેરાટી વ્યાપી ગઈ હતી. હાલમાં હોસ્પિટલમાં તબીબો દ્વારા વિદ્યાર્થીની સઘન સારવાર કરવામાં આવી રહી છે.
જહાંગીરપુરા પોલીસે તપાસ હાથ ધરી
બનાવ અંગે જાણ થતાં જ જહાંગીરપુરા પોલીસનો કાફલો સ્થળ પર પહોંચી ગયો હતો અને કાયદેસરની તપાસ હાથ ધરી હતી. પોલીસે ઘટનાસ્થળેથી પુરાવા એકત્ર કરી વિદ્યાર્થીના પરિવારજનોને જાણ કરી છે. આ ઘટનાને પગલે સમગ્ર વિસ્તારના વાલીઓ અને શિક્ષકોમાં ભારે ચિંતાનું મોજું ફરી વળ્યું છે. નિષ્ણાતો અને પોલીસે પણ વાલીઓને અપીલ કરી છે કે પરીક્ષાના સમયે બાળકો પર અભ્યાસનું બિનજરૂરી દબાણ ન બનાવવું અને તેમના માનસિક સ્વાસ્થ્યનું વિશેષ ધ્યાન રાખવું.