પાટણ. ઉત્તર ગુજરાત યુવક મંડળ સંચાલિત શેઠ એમ. એન. હાઈસ્કૂલની ધોરણ 11 આર્ટસમાં અભ્યાસ કરતી વિદ્યાર્થીની નાયક સુહાનીએ લાયન્સ અને લિયો ક્લબ ઓફ પાટણ દ્વારા આયોજિત શૌર્ય ગીત સ્પર્ધામાં પ્રથમ સ્થાન પ્રાપ્ત કર્યું છે. આ સિદ્ધિ બદલ સુહાનીને શિલ્ડ અને સર્ટિફિકેટ આપી સન્માનિત કરવામાં આવી હતી. સુહાની નાયક ગાયન પ્રતિભાની સાથે અભ્યાસમાં પણ હોશિયાર છે. તે શાળાની વિવિધ શૈક્ષણિક અને શિક્ષણેત્તર પ્રવૃત્તિઓમાં સક્રિયપણે ભાગ લે છે. આ સ્પર્ધાની તૈયારી દરમિયાન શાળાના મદદનીશ શિક્ષિકા ડૉ. ગીતાબેન પરમાર દ્વારા સુહાનીને માર્ગદર્શન પૂરું પાડવામાં આવ્યું હતું. ગીતની રજૂઆતમાં ઢોલક પર શાળાના કોમ્પ્યુટર શિક્ષક વિશાલભાઈ પ્રજાપતિએ અને હાર્મોનિયમ પર પી.પી.જી. એક્સપરિમેન્ટલ હાઈસ્કૂલના વિપુલભાઈ સોલંકીએ સંગત આપી હતી. સુહાનીની આ સફળતા બદલ શાળાના આચાર્ય ડૉ. ધનરાજભાઈ ઠક્કર અને સમગ્ર શાળા પરિવારે વિદ્યાર્થીની નાયક સુહાની તેમજ માર્ગદર્શક ડૉ. ગીતાબેન પરમારને અભિનંદન પાઠવ્યા હતા. આ ઉપરાંત, વિશાલભાઈ પ્રજાપતિ અને વિપુલભાઈ સોલંકીના સહયોગને પણ બિરદાવવામાં આવ્યો હતો.